MME HEBREW 12 - Efik Old Bible With Sectional Headings

1MMƆDO, sia otu ntiense eke ewakde ntem ekande nnyin ekuk, eyak nnyin nde ikpɔnɔre kpukpru mbiomo inim ŋkaŋ kiet, ye idiɔk-ŋkpɔ eke eyirede nnyin ke kpukpru edem; enyuŋ eyak ifehe mbuba eke anade nnyin ke iso ye ime,

2iwuk enyin ise Jesus Anditɔŋɔ mbuɔtidem nnyin ye Andinam enye ɔfɔn ama; emi okobiomde cross, onyuŋ abatde but ke ekpri ŋkpɔ, kabaŋa idaresit eke anade Enye ke iso; okonyuŋ ɔsuhɔrede etetie ke ubɔk nnasia ebekpo Abasi.

3Ese Enye emi okobiomde oruk idiɔk ndutiŋ oro mme idiɔk owo etiŋde edian Idem Esie, mbak mbufo edikpa mba, ekop mmem-idem ke ukpɔŋ.

4Mbufo ika-ŋwanake kaŋa tutu eduɔk iyip ke eŋwan mbufo ye idiɔk-ŋkpɔ.

5Emonyuŋ efre item, emi enemede ye mbufo nte nditɔ-ete,

Eyen mi, kubat ntunɔ Jehovah ke ekpri ŋkpɔ,

Kunyuŋ uyemere ke ini

Enye asuade ɔnɔ fi.

6Koro Jehovah ɔtunɔ owo eke Enye amade,

Onyuŋ amia eyen eke Enye adarade ufen.

7Mbufo ebiom ukut man edi ntunɔ ɔnɔ mbufo; Abasi anam ye mbufo nte nditɔ; koro ewe eyen odu eke ete mitunɔke?

8Edieke mbufo mikwe ntunɔ eke kpukpru nditɔ enyenede udeme ke esit, mbufo edi nditɔ akpara, idige ata nditɔ.

9Akan oro, nnyin imenyene mme ete obukidem emi eketunɔde nnyin, ndien nnyin iteŋe mmɔ: nte nnyin idisukke ibuot inɔ Ete mme spirit ikan, inyuŋ idu uwem?

10Koro ke akpanikɔ mmɔ oro ekɔtunɔ nnyin usen ifaŋ, nte mmɔ ekutde ete ɔfɔn; edi Abasi ɔtunɔ nnyin oyom udori nnyin, man nnyin inyene udeme ke edisana ido Esie.

11Idahemi kaŋa kpukpru ntunɔ itiehe inem-inem, edi ababiak; edi ke ukperedem, enye oŋwum mfri emem ɔnɔ mmɔ emi ekebede ke nsiŋere esie, kpa mfri edisana ido.

12Mmɔdo esɔŋɔ ubɔk eke ema ekemem mbufo, ye edɔŋ eke ema ekedoro ibikpai;

13enyuŋ esiak afaŋ eke enende enɔ ikpat mbufo, man ukot eke edide mbuŋɔ ekufebede, edi ekam enam mmɔ ekop nsɔŋidem.

14Etiŋ enyin esaŋa ke emem ye kpukpru owo; enyuŋ esaŋa ke edisana ido; koro esiode oro efep, baba owo kiet idikwe Ɔbɔŋ.

15Etim ese mbak owo ekededi editaba mfɔn Abasi; mbak oruŋ eke edide ndot-ndot editibe otimere mbufo, onyuŋ asabare ediwak owo ke otu mbufo;

16mbak owo use edidu ke otu mbufo, mme oburobut owo nte Esau, emi akanyamde itie-akpan esie ke ekpri esisit udia.

17Mbufo efiɔk ete, ke ukperedem, ke ini enye okoyomde ndibɔ eridiɔŋ nda, ekpɔnɔre enye enim ke ŋkaŋ kiet (enye ikonyuŋ ikwe ifet ndikabare esit), okposuk edi nte oyomde eridiɔŋ oro ye mmɔŋeyet.

18Koro mbufo ikasaŋake ikpere se owo ekemede ndituk ke ubɔk, ye ikaŋ eke asakde, ye obubit enyɔŋ, ye ekim, ye oyobio, ye uyo ukorowo, ye uyo ikɔ;

19eke mme andikop ekpede ubɔk ete, ekutiŋ aba enɔ mme imɔ:

20koro mmɔ mikemeke ndibɔ ewuhɔ emi enɔde, ete, Edieke kpa unam otukde obot oro, eyetɔŋɔ enye ke itiat ewot.

21Ofuri ebiet ekenyene ndik eti-eti ndise, tutu Moses ɔdɔhɔ ete, Ŋkop ndik, nnyuŋ nnyek idem eti-eti.

22Edi mbufo ekesaŋa ekpere Obot Zion, ye Obio Abasi uwem kpa Jerusalem enyɔŋ, ye ata ediwak angel, ye akwa esop ye ufɔk Abasi eke mmɔ emi edide ikpan,

23emi ewetde enyiŋ mmɔ ke heaven; enyuŋ esaŋa ekpere Abasi, Ebierikpe ofuri ekondo, ye mme spirit ndinen owo emi enamde mmɔ efɔn ema,

24ye Jesus emi edide esine-ufɔt obufa ediomi, ye erisime iyip, eke etiŋde se ifɔnde ikan iyip Abel.

25Ekpeme ekusin ndikop Enye emi etiŋde ikɔ ɔnɔ mbufo. Koro edieke mmɔ emi ekesinde uyo anditiŋ ikɔ nnɔ mmɔ ke isɔŋ mikɔbɔhɔke; nnyin idibɔhɔkebɔhɔ ikan oro, edieke nnyin iwɔŋɔrede ikpɔŋ Enye emi etiede ke heaven etiŋ ikɔ.

26Uyo Esie ekenyeŋe isɔŋ adaŋoro; edi ke emi Enye ɔŋwɔŋɔ ete, Osuk kaŋa esisit, ndien Ami nyenyeŋe isɔŋ ye enyɔŋ ŋko.

27Ikɔ oro ɔdɔhɔde ete, Osuk kaŋa esisit, ɔwɔrɔ ete, eyemen se idide nyek-nyek efep, nte ŋkpɔ eke ekebotde, man mme ŋkpɔ eke midige nyek-nyek esuhɔ.

28Mmɔdo sia nnyin inyenede Obio Ubɔŋ eke ŋkpɔ mikemeke ndinyeŋe, yak nnyin inyene esit ekɔm, inyuŋ ida emi inɔ Abasi, utom eke enemde Enye esit ke ukpono ye uteŋe.

29Koro Abasi nnyin edi ikaŋ eke atade ta.