2 CHRONICLES 24 - Efik Old Bible With Sectional Headings

Joash Ɔtɔŋɔ Ntak Ɔbɔp Temple

1JOASH osim isua itiaba ke ini enye adade ubɔŋ, enye onyuŋ edi edidem ke Jerusalem ke isua aba. Enyiŋ eka esie onyuŋ ekere Zibiah a Beer-sheba.

2Ndien Joash anam se inende ke iso Jehovah ke ofuri eyo Jehoiada oku.

3Jehoiada onyuŋ ada iban iba ɔnɔ enye; ndien enye obon nditɔ-iren ye nditɔ-iban.

4Edikem ke ŋkpɔ emi ebede, oduk Joash esit ndidiɔŋ ufɔk Jehovah.

5Ndien enye obon mme oku ye mme Levite ɔtɔ kiet, onyuŋ ɔdɔhɔ mmɔ, ete, Mbufo ewɔŋɔ eka ke mme obio Judah, ekebɔ ofuri Israel inyene ebon, man ediɔŋ ufɔk Abasi mbufo kpukpru isua, mbufo enyuŋ emen idem enam ŋkpɔ emi. Edi mme Levite imenke idem.

6Ekem edidem okot Jehoiada etubom, onyuŋ ɔdɔhɔ enye, ete, Nsinam afo mukpakke mme Levite, ete ebɔ Judah ye Jerusalem utomo Moses, owo Jehovah, ye eke esop Israel, eda edi ke efe ntiense?

7Koro Athaliah idiɔk ŋwan oro, ye nditɔ esie ekewuride ufɔk Abasi; ekenyuŋ edade kpukpru edisana ŋkpɔ ufɔk Jehovah esɔk Baalim.

8Ndien edidem ɔdɔhɔ mmɔ ete enam ekebe kiet, enyuŋ ediɔk enye ke enyin-usuŋ ufɔk Jehovah ke okure.

9Ndien mmɔ enɔ uyo ke Judah ye Jerusalem, ete eda utomo emi Moses owo Abasi okodoride Israel ke wilderness, edisɔk Jehovah.

10Ndien kpukpru mbɔŋ ye ofuri mbio-obio edat esit, enyuŋ eda edi edisin ke ekebe, tutu mmɔ ema.

11Edikem ke ini emi owo adade ekebe oro, edi edisɔk mmɔ emi edidem okonimde ke ubɔk mme Levite, ndien adaŋemi mmɔ ekutde ete ke inyene awak, ewet-ŋwed edidem ye adidaha ɔbɔŋ-oku edi ediŋwaŋa ekebe, ndien eda enye efiak ekenim ke itie esie. Ntem ke mmɔ enam ke usen, ke usen, enyuŋ ebon ediwak inyene.

12Ndien edidem ye Jehoiada eda enye enɔ mbon-usɔ oro ekenamde utom ufɔk Jehovah, mmɔ enyuŋ ekpe mme andisɔi itiat ye carpenter inyene, man ediɔŋ ufɔk Jehovah, enyuŋ ekpe mbon-usɔ ukwak, ye mbon-usɔ okpoho, man enam ufɔk Jehovah ɔsɔŋɔ.

13Ndien mbon-usɔ enam utom enyuŋ ediɔŋ enam utom ema ke ubɔk mmɔ, ndien mmɔ enim ufɔk Abasi ke akani itie esie, enyuŋ enam enye ɔsɔŋɔ.

14Ekem ke mmɔ ema ekenam ema, mmɔ eda inyene eke esuhɔde edi ke iso edidem ye Jehoiada, ndien mmɔ eda enye enam mkpoduoho enɔ ufɔk Jehovah, kpa ŋkpɔ unam utom, ye ŋkpɔ uwa, ye ikpaŋ-idaŋ, ye mkpoduoho gold ye silver. Ndien mmɔ ewa edifɔp uwa ke ufɔk Jehovah kpukpru ini ke ofuri eyo Jehoiada.

15Ekem Jehoiada akabare edi ebio-owo, onyuŋ ɔyuhɔ usen, onyuŋ akpa; enye onyuŋ osim isua ikie ye edip ye duop ke ini enye akpade.

16Ndien mmɔ ebuk enye ke obio David ke otu ndidem, koro enye akanamde Israel eti ŋkpɔ, ke ŋkpɔ Abasi, ye ke ŋkpɔ ufɔk esie.

17Ekem ke ini Jehoiada akpade, mme etubom Judah edi edituak ibuot enɔ edidem. Ndien edidem okop uyo mmɔ.

18Ndien mmɔ ekpɔŋ ufɔk Jehovah Abasi mme ete mmɔ, eka ekenam ŋkpɔ eto-mkpe, ye eke nsunsu abasi: ndien iyaresit odoro Judah ye Jerusalem abaŋa isop mmɔ emi.

19Edi enye ɔdɔŋ prophet utom ke ɔtɔ mmɔ: ete eda mmɔ efiak etiene Jehovah; ndien mmɔ esua enɔ mmɔ: edi mmɔ ikpaŋke utɔŋ.

20Ekem Spirit Abasi oto ediduk Zechariah eyen Jehoiada oku ke idem, ndien enye ada ke enyɔŋ kpukpru owo, onyuŋ ɔdɔhɔ mmɔ, ete, Ntem ke Abasi ɔdɔhɔ, ete, Nsinam mbufo ebiatde mbet Jehovah? Mbufo idikwe unen. Koro mbufo ekpɔŋde Jehovah, enye omonyuŋ ɔkpɔŋ mbufo.

21Ndien mmɔ eduk odu ebaŋa enye, enyuŋ etɔŋɔ enye ke itiat ke okure ufɔk Jehovah, ke uyo edidem.

22Ntre ke Joash edidem etre nditi mfɔn oro Jehoiada ete esie akanamde ye enye, edi owot eyen esie; ndien ke ini enye oyomde ndikpa, enye ɔdɔhɔ ete, Yak Jehovah ese, onyuŋ oyom.

23Edikem ke ukabare-isua, mbon-ekɔŋ Syria edɔk ediŋwana ekɔŋ ye enye: ndien mmɔ esim Judah ye Jerusalem, enyuŋ esobo kpukpru mbɔŋ obio efep ke obio; enyuŋ eda kpukpru mbume mmɔ enɔ esɔk edidem Damascus.

24Koro mbon-ekɔŋ Syria esaŋade ye ekpri udim owo edi, ndien Jehovah ada ata ediwak mbon-ekɔŋ esin mmɔ ke ubɔk koro mmɔ ekekpɔŋde Jehovah Abasi mme ete mmɔ. Ndien mmɔ ekpe ikpe ye Joash.

25Ekem adaŋoro mmɔ edaŋade ke ɔtɔ esie, (koro mmɔ ekpɔŋde enye ke ediwak udɔŋɔ) ikɔt esie eduk odu ebaŋa enye, ebaŋa ikɔ iyip nditɔ Jehoiada oku, ndien mmɔ ewot enye ke bed esie; ntre ke enye akpa: ndien mmɔ ebuk enye ke obio David, edi ibukke enye ke udi ndidem.

26Ndien mme mmɔ emi edi mme andiduk odu mbaŋa enye; Zabad eyen Shimeath ŋwan Ammon, ye Jehozabad eyen Shimrith ŋwan Moab.

27Ndien nditɔ-iren esie ye ediwak utomo oro ekedoride enye, ye eridiɔŋ ufɔk Abasi, sese, ekewet mmɔ esin ke ŋwed-usuan ŋkpɔ ndidem. Ndien Amaziah eyen esie ada ubɔŋ ke itie esie.