EZEKIEL 40 - Efik Old Bible With Sectional Headings

Ŋkukut Nte Temple Editiede ke Ini Iso

1KE isua edip ye ition nte eketaŋ nnyin efep, ke eritɔŋɔ isua, ke ɔyɔhɔ usen ɔfiɔŋ duop, ke isua duopenaŋ nte ekesuan obio, ke idem usen oro ubɔk Jehovah odoro mi ke idem, onyuŋ emen mi edi ken.

2Enye ada mi ke ŋkukut Abasi edi ke isɔŋ Israel, onyuŋ onim mi ke enyɔŋ ata edikoŋ obot kiet, ndien se ibietde obio eke ebɔpde odoro enye ke enyɔŋ, ke edem usuk usuk.

3Ndien enye ada mi edi ken, ndien, sese, owo emi idem esie ebietde idem okpoho, ye uruk linen ke ubɔk, ye eto-okuk; ndien enye ada ke inua-otop.

4Ndien owo oro ɔdɔhɔ mi, ete, Eyen owo, se ke enyin fo, nyuŋ kop ke utɔŋ fo, nyuŋ nim esit fo ke kpukpru se ami ndiyakde fi okut; koro emi esin eda fi edi ken man ŋwut fi; men kpukpru se afo okutde tiŋ nɔ Israel.

5Ndien, sese, ibibene akan edem ufɔk okuk, ndien eto-idomo-okuk inaŋ odu owo oro ke ubɔk: ndien enye odomo ubara ibibene oro, eto kiet; idaha esie onyuŋ edi eto kiet.

6Ndien enye aka ke inua-otop emi akabarede ese edem usiaha-utin, ɔkɔdɔk udigukot esie, onyuŋ odomo asaŋudɔk inuaotop, ubom esie ekem eto kiet; asaŋudɔk kiet edi eto kiet ke ubom.

7Ndien ubet edi eto kiet ke uniɔŋ, ye eto kiet ke ubom; ibio-idomo-okuk ition enyuŋ esine ke ufɔt ubet ye ubet; ndien asaŋudɔk inua-otop ke ŋkaŋ etehe inua-otop ke esit edi eto kiet.

8Enye onyuŋ odomo etehe inua-otop ke esit, ekem eto kiet.

9Enye onyuŋ odomo etehe inua-otop, ekem ibio-idomo-okuk itiatia; ye mme adaha esie, ibio-idomo-okuk iba; ndien etehe inua-otop odu ke esit.

10Ndien mme ubet inuaotop usuŋ edem usiaha-utin edi ita ke edem emi, ye ita ke edem eken; mmɔ mbita esaŋa idomo kiet: ndien mme adaha edem mbiba enyene idomo kiet.

11Enye onyuŋ odomo ubom inua-otop, ekem ibio-idomo-okuk duop: uniɔŋ inua-otop edi ibio-idomo-okuk duopeba.

12Ndien mben ke iso mme ubet edi ibio-idomo-okuk kiet: ibio-idomo-okuk kiet onyuŋ edi mben ke edem eken: ubet oro onyuŋ edi ibio-idomo-okuk itiokiet ke edem kiet, ye ibio-idomo-okuk itiokiet ke edem eken.

13Ndien enye odomo inua-otop ɔtɔŋɔde ke ɔkɔm ubet kiet tutu osim ɔkɔm ubet kiet eken: ubom edi ibio-idomo-okuk edip ye ition,

14usuŋ ekem ye usuŋ. Enye onyuŋ anam adaha ibio-idomo-okuk ata, tutu osim adaha okure inua-otop akan okuk.

15Ndien ɔtɔŋɔde ke iso inua-otop emi edukde, tutu osim ke iso etehe inua-otop ke esit, edi ibio-idomi-okuk aba ye duop.

16Ndien window eke miberekede edu ke ubet oro ye ke mme adaha mmɔ, ekan ekuk ke esit inua-otop: kpasuk ntre ŋko ke mme etehe; window enyuŋ ekan ekuk ke esit: eyop enyuŋ edu ke mme adaha.

17Ndien enye ada mi aka ke akwa okure, ndien, sese, ubet, ubet, ye deck itiat emi enamde ke okure oro ekan ekuk: ubet edip ye duop edu ke deck itiat oro.

18Ndien deck itiat odu ke ŋkaŋ inua-otop ekem ye uniɔŋ inua-otop; deck itiat ke idak isɔŋ edi oro.

19Ndien enye odomo ubom ɔtɔŋɔde ke iso inua-otop ke idak isɔŋ, tutu osim ke iso esa, ke edem esa, ekem ibio-idomo-okuk ikie, ese edem usiaha-utin ye edem edere-edere.

20Ndien ama edi inua-otop akwa okure emi esede edem edere, enye odomo uniɔŋ esie ye ubom esie.

21Ndien ubet esie edi ita ita ke edem mbiba; mme adaha esie ye etehe esie ekem ukem ye idomo akpa inua-otop; uniɔŋ esie edi ibio-idomo-okuk aba ye duop, ubom esie onyuŋ edi ibio-idomo-okuk edip ye ition.

22Ndien mme window esie, ye etehe esie, ye eyop esie ekem ye idomo inua-otop emi esede edem usiaha-utin:

23owo enyuŋ edɔk ke udigi itiaba esim enye: mme etehe esie enyuŋ edu mmɔ ke iso. Ndien inua-otop esa asak iso ese inua-otop ke edem edere ye ke edem usiaha-utin: ndien enye odomo, ɔtɔŋɔde ke inua-otop kiet osim inua-otop eken, ibio-idomo-okuk ikie.

24Ndien enye ada mi aka usuŋ edem usuk, ndien, sese, inua-otop kiet ke usuŋ usuk: ndien enye odomo mme adaha esie ye etehe esie, ekem ke mme idomo emi.

25Window enyuŋ edu ke esit, ye ke etehe esie ekan ekuk, ebiet mme window eken: uniɔŋ esie edi ibio-idomo-okuk aba ye duop, ubom esie onyuŋ edi ibio-idomo-okuk edip ye ition.

26Enyuŋ edɔk ke udigi itiaba esim enye, etehe esie onyuŋ odu mmɔ ke iso: eyop enyuŋ edu ke esit, kiet ke edem kiet, kiet ke edem eken, ke mme adaha esie.

27Esa onyuŋ enyene inua-otop eke esede usuk; ndien enye ɔtɔŋɔ ke inua-otop kiet odomo osim inua-otop eken, ese usuk, ibio-idomo-okuk ikie.

28Ndien enye ada mi oduk ke esa, ke inua-otop edem usuk: onyuŋ odomo inua-otop edem usuk, ekem ye idomo emi.

29Mme ubet esie, ye mme adaha esie, ye etehe esie enyuŋ ekem ye mme idomo emi: ndien window enyuŋ edu enye ke esit ye ke etehe esien ekan ekuk: uniɔŋ esie edi ibio-idomo-okuk aba ye duop; ubom onyuŋ edi ibio-idomo-okuk edip ye ition.

30Etehe emi akande okuk onyuŋ edi ibio-idomo-okuk edip ye ition ke uniɔŋ, ye ibio-idomo-okuk ition ke ubom.

31Ndien etehe esie ese akwa okure ke idak isɔŋ; eyop enyuŋ edu ke mme adaha esie: enyuŋ edɔk ke udigi itiaba esim enye.

32Ndien enye ada mi oduk ke esa ese usuŋ edem usiaha-utin: onyuŋ odomo inua-otop esie, ekem ye mme idomo emi.

33Mme ubet esie, ye mme adaha esie, ye etehe esie enyuŋ ekem ye mme idomo emi: enye ye etehe esie enyuŋ enyene window ekan ekuk: uniɔŋ edi ibio-idomo-okuk aba ye duop, ubom onyuŋ edi ibio-idomo-okuk edip ye ition.

34Mme etehe esie enyuŋ ese edem akwa okure, eyop enyuŋ edu ke mme adaha esie ke edem mbiba: enyuŋ edɔk udigi itiaita esim enye.

35Ndien enye ada mi aka ke inuaotop edem edere, onyuŋ odomo nte ekemde ye mme idomo emi;

36mme ubet esie, ye mme adaha esie, ye etehe esie, ye mme window emi ekande enye ekuk: uniɔŋ edi ibio-idomo-okuk aba ye duop, ubom onyuŋ edi ibio-idomo-okuk edip ye ition.

37Mme adaha esie enyuŋ ese akwa okure; eyop enyuŋ edu ke mme adaha esie, edem mbiba: enyuŋ edɔk udugi itiaita esim enye.

38Ndien mme ubet esie, ye enyin-usuŋ esie ekpere mme adaha inua-otop, do ke mmɔ eyet ndifɔp uwa.

39Ndien okpokoro iba edu ke etehe inua-otop ke edem emi, okpokoro iba enyuŋ edu ke edem eken, eke ewotde ndifɔp uwa, ye uwa idiɔk ido, ye uwa ndudue ke esit.

40Okpokoro iba enyuŋ edu ke esien ke ŋkaŋ ɔtɔ nte edɔkde ke usuŋ inua-otop ke edem edere-edere; okpokoro iba enyuŋ edu ke ŋkaŋ eken emi odude ke etehe inua-otop.

41Okpokoro inaŋ edu ke edem emi, okpokoro inaŋ enyuŋ edu ke edem eken, ke ŋkaŋ inua-otop; okpokoro itiaita: mmɔ ewot unam ke esit.

42Ndien okpokoro edifɔp uwa mbinaŋ edi edisɔi itiat, ibio-idomo-okuk kiet ye ubak ke uniɔŋ, ye ibio-idomo-okuk kiet ye ubak ke ubom, idaha esie onyuŋ edi ibio-idomo-okuk kiet; ndien mmɔ eda ŋkpɔ eke ewotde edifɔp uwa ye uwa emem ke esit edori mmɔ ke enyɔŋ.

43Ndien mben ekem ye ekaubɔk kiet ewuhɔ ke esit ekan ekuk: unam uwa onyuŋ odoro ke mme okpokoro oro.

44Ndien ke edem inua-otop emi odude ke esit, ubet mme ɔkwɔ-ikwɔ edu ke esa, emi edude ke ŋkaŋ inua-otop edem edere, enyuŋ esede usuk-usuk; kiet onyuŋ odu ke ŋkaŋ inua-otop edem usiaha-utin ese edem edere-edere.

45Ndien enye ɔdɔhɔ mi, ete, Ubet emi esede edem usuk enyene mme oku emi esaŋade utom ufɔk.

46Ndien ubet emi esede edem edere enyene mme oku emi esaŋade utom itie-uwa: mme mmɔ emi edi nditɔ Zadok emi etode ke nditɔ Levi esaŋa ekpere Jehovah ndinam ŋkpɔ nnɔ enye.

47Ndien enye odomo esa; uniɔŋ esie edi ibio-idomo-okuk ikie, ubom esie onyuŋ edi ibio-idomo-okuk ikie, ukem-ukem; itie-uwa onyuŋ odu ke iso ufɔk.

48Ndien enye ada mi aka ke etehe ufɔk, onyuŋ odomo ibio-idomo-okuk ition ke edem emi, ye ibio-idomo-okuk ition ke edem eken, ɔnɔ etehe: ubom inua-otop onyuŋ edi ibio-idomo-okuk ita ke edem emi, ye ibio-idomo-okuk ita ke edem eken.

49Uniɔŋ etehe edi ibio-idomo-okuk edip, ubom esie onyuŋ edi ibio-idomo-okuk duopekiet; ndien ke udigukot emi mmɔ edɔkde ke esit, obubɔk enyuŋ edu ke ɔtɔ mme adaha, kiet ke edem emi, ye kiet ke edem eken.