JEREMIAH 48 - Efik Old Bible With Sectional Headings

Uyo Abasi ke Abaŋa Mbon Moab

1NTEM ke Jehovah mme udim Abasi Israel ɔdɔhɔ abaŋa Moab, ete, Ɔdɔdiɔk ɔnɔ Nebo! koro ebumede enye: enam Kiriathaim but, enyuŋ eda enye: enam edikoŋ ebiet but ye ndik.

2Itoro Moab iduhe aba: mmɔ eduak idiɔk-ŋkpɔ ebaŋa enye ke Heshbon; ete, mbufo edi nnyin isibe enye ifep, man okudi aba idut. Eyenyuŋ ebiat fi, O Madmen; ofut eyebine fi ke edem.

3Uyo eseme oto ke Horonaim, mbume ye akwa ŋwure.

4Moab omowure; ŋkpri nditɔ esie enam owo ekop eseme.

5Koro ke obot Luhith ntua eyet ke ɔdɔdiɔŋ ɔdɔk; koro ke usuhɔre Horonaim mme asua ekop eseme ŋwure.

6Mbufo efeŋe, enyaŋa uwem mbufo, enyuŋ ebiet juniper ke wilderness.

7Ŋkɔm eyenyuŋ emum fi ŋko, koro afo ɔbuɔtde idem ke se afo akanamde ye ke inyene fo: eyenyuŋ etaŋ Chemosh efep ye mme oku esie, ye mbɔŋ esie, ini kiet.

8Ndien andibume eyesim kpukpru obio, baba obio kiet idinyuŋ ibɔhɔke: ndien itihere eyebiara, una-isɔŋ eyenyuŋ osobo, kpa nte Jehovah ɔkɔdɔhɔde.

9Mbufo enɔ Moab mba, man enye ɔwɔrɔ efe: ndien mme obio esie eyedobo, ndien owo eke oduŋde ididuhe.

10Osuk ɔdɔdiɔk ɔnɔ owo eke edinamde utom Jehovah enyɔŋ-enyɔŋ! onyuŋ osuk ɔdɔdiɔk ɔnɔ owo eke emende ofut esie ke iyip efep!

11Moab ama oduŋ ke ifure toto ke ini uyen esie, enye ama onyuŋ etie ke ntak esie, ika-inyuŋ ikaŋake enye ke abaŋ kiet isin ke abaŋ eken, ika-inyuŋ itaŋke enye ifep: oro esin inem esie ebigi enye ke esit, ufuɔŋ esie inyuŋ ikpuhɔkede.

12Jehovah ɔdɔhɔ ete, Mmɔdo mme usen ke edi, eke ndidɔŋde owo eke etukde, utom ke ɔtɔ esie, ndien eyetuk enye eduɔk, enyuŋ eŋwaŋa abaŋ esie, enyuŋ esuan mme ikpa wine mmɔ.

13Ndien but eyenam Moab abaŋa Chemosh, kpasuk nte but akanamde ufɔk Israel abaŋa Bethel mbuɔtidem mmɔ.

14Mbufo enam didie edɔhɔ ete, Nnyin idi mbon uko ye mkpɔsɔŋ owo ke ekɔŋ?

15Moab amabiara, mme obio esie enyuŋ edɔk (ke nsuŋikaŋ), ndimek mkparawa esie enyuŋ esuhɔre ete ekewot mmɔ; emi edi uyo edidem. Jehovah mme udim edi enyiŋ esie.

16Nsobo Moab asaŋa ekpere, idiɔk-ŋkpɔ esie onyuŋ awara eti-eti edi.

17Mbufo kpukpru mmɔ emi ekande enye ekuk etua enye; yak kpukpru mmɔ eke efiɔkde enyiŋ esie enyuŋ edɔhɔ, ete, Anam didie ebuŋ ɔkpɔsɔŋ esaŋ, mmɔnyɔ uyai!

18Wɔrɔ ke ubɔŋ, suhɔre tie ke nsat-itɔŋ, O eyen-aŋwan emi oduŋde ke Dibon; koro andibiat Moab ɔmɔdɔk osim fi, enye eyesobo mkpɔsɔŋ ebiet fo.

19O andi-duŋ Aroer, da ke usuŋ, nyuŋ kpeme; bup enye emi efehede onyuŋ ɔbɔhɔde; dɔhɔ, ete, Nsitibe?

20But anam Moab, koro enye owurede: fiori nyuŋ seme; mbufo etiŋ ke Arnon, ete ke Moab amabiara.

21Ikpe ɔmɔnyuŋ osim ke una-isɔŋ; kpa Holon, ye Jahzah,

22ye Mephaath, ye Dibon, ye Nebo, ye Beth-diblathaim,

23ye Kiriathaim, ye Beth-gamul,

24ye Beth-meon, ye Kerioth, ye Bozrah, ye kpukpru mme obio isɔŋ Moab mkpet-mkpet ye nsan-nsan.

25Jehovah ɔdɔhɔ ete, Emesibe Moab nduk efep, ubɔk onyuŋ ɔbuŋɔ enye.

26Mbufo enɔ enye mmin ɔŋwɔŋ akpa: koro enye okokde idem esie ye Jehovah: ndien Moab eyemiaŋa ke ikpɔhi esie, enye ŋko eyenyuŋ edi se esakde.

27Nte Israel ikedige se afo asakde? Nte ekekut enye ke otu mbon inɔ? Koro adaŋa ini nte afo ɔkɔdɔhɔde abaŋa enye, afo oyibi ibuot.

28Mbufo mme andiduŋ Moab ekpɔŋ mme obio, ndien eduŋ ke itiat, enyuŋ etie nte ibiom eke anamde efɔk esie ke odudu inua obube.

29Nyin imokop iseri Moab, enye eseri iseri eti-eti, ye ntaŋ-idem esie, ye ŋkok-idem esie, ye iseŋ esie, ye nte esit esie okoŋde.

30Jehovah ɔdɔhɔ, ete, Ami mmɔfiɔk ifuresit esie; ndien inenke; ye mbure esie; mmɔ enam se minenke.

31Mmɔdo nyefiori mbaŋa Moab, nyeseme mbaŋa ofuri Moab: owo eyemum mbio-obio Heres.

32Nyeda ntua eyet Jazer ntua eyet mbaŋa fi, O vine Sibmah: nnyɔninyɔ fo ebe inyaŋ, mmɔ esim ke inyaŋ Jazer: andibiat amabiat ndat-ndat mfri fo ye utet vine fo.

33Enyuŋ esioŋo idara ye mbre ke eti iŋwaŋ ye ke isɔŋ Moab efep; mma nnyuŋ nnam wine etre ke ebiet udigi: owo ididigike ye mkpo: mkpo ididige mkpo.

34Mmɔ esioro uyo ɔtɔŋɔde ke eseme Heshbon tutu osim ke Elealeh, ye ke Jahaz: ɔtɔŋɔde ke Zoar tutu osim ke Horonaim, Eglath-shelishiyah: koro mmɔŋ Nimrim ŋko eyekabare asat.

35Jehovah onyuŋ ɔdɔhɔ, ete, Nyenam owo eke awade uwa ke ibombom, ye eke ɔfɔpde ŋkpɔ ɔnɔ mme abasi esie etre ke Moab.

36Oro eyesin esit mi oyomo nti ifiom abaŋa Moab, esit mi onyuŋ oyomo nte ifiom abaŋa mbio-obio Kir-heres: koro inyene oro enye ɔkɔkɔde omosop.

37Koro kpukpru ibuot enyenede ibɔ, enyuŋ efat kpukpru ntaŋebek: enyuŋ ekpi kpukpru ubɔk, ɔfɔŋ-ikpo onyuŋ okune kpukpru isin.

38Ntuaŋa mmɔdo ke enyɔŋ kpukpru ɔkɔm ufɔk Moab, ye ke esit aŋwa esie: koro mmanuak Moab nte abaŋ eke minemke owo baba: uyo Jehovah edi emi.

39Mmɔ efiori ete, Enye asuana didie! didie ke but esin Moab akpa edem! Moab onyuŋ akabare edi ŋkpɔ nsahi ye mkpa-idem ɔnɔ kpukpru mmɔ eke ekande enye ekuk.

40Koro ntem ke Jehovah ɔdɔhɔ, ete, Sese, enye efefe nte ntrukpom, onyuŋ atat mba esie ofuk Moab.

41Eda mme obio, emum mkpɔsɔŋ ebiet, ndien esit mbon uko Moab ke usen oro eyebiet esit aŋwan uman.

42Eyenyuŋ esobo Moab, ndien enye ididige aba obio, koro enye okokokde idemesie ye Jehovah.

43Jehovah ɔdɔhɔ ete, Ndik, ye obube, ye afia ena enɔ fi, O andiduŋ Moab.

44Owo eke efeghede abak ndik eyeduŋ ke obube; ndien owo eke otode ke obube ɔdɔk eyemum ke afia: koro nyeda isua ufen mmɔ ntiene enye kpa Moab; uyo Jehovah edi emi.

45Mbon itɔk eda ke mfut Heshbon enana odudu: koro ikaŋ otode ke Heshbon, edemikaŋ onyuŋ oto ke ufɔt Sihon, ndien enye eyeta inuk Moab, ata nditɔ ndutime etiŋe-ibuot.

46Osuk ɔdɔ-diɔk ɔnɔ fi, Moab! Ikɔt Chemosh emebiara: koro etaŋde nditɔ-iren fo efep, etaŋ nditɔ-iban fo nte mbuot-ekɔŋ.

47Jehovah onyuŋ ɔdɔhɔ, ete, Nyeda nditɔ Moab emi etaŋde mmɔ efep, nnyɔŋ ndi ke utit eyo. Ikpe Moab etie ntem.