1 NDIDEM 16 - Efik Old Bible With Sectional Headings

Mme Ndiden Efen Emi Ekedude ke Israel

1EKEM uyo Jehovah osim Jehu eyen Hanani, abaŋa Baasha, ete, Koro ŋkemenerede fi ke ntɔŋ,

2Koro ŋkemenerede fi ke ntɔŋ, nnyuŋ nnimde fi ke etubom ikɔt mi Israel; ndien afo ama akasaŋa ke usuŋ Jeroboam, onyuŋ esin ikɔt mi Israel ediɔk, enyuŋ eyat mi esit ke idiɔk mmɔ; sese,

3ami mmɔŋ ŋkpɔri Baasha ye ufɔk esie mfep; nyenyuŋ nnam ufɔk fo etie nte ufɔk Jeroboam eyen Nebat.

4Mme ebua eyeta owo Baasha eke akpade ke obio; mme inuen enyɔŋ eyenyuŋ eta owo esie eke akpade ke iŋwaŋ.

5Ndien ama edi ikɔ Baasha eŋwen, ye se enye akanamde, ye odudu esie, nte ikewetke mmɔ ke ŋwed ikɔ eyo ndidem Israel?

6Ekem Baasha ɔsuhɔre ana ye mme ete esie ede, onyuŋ ɔbuhɔ ke Tirzah: ndien Elah eyen esie osuk ke edidem ke itie esie.

7Ndien ikɔ Jehovah oto ke inua prophet Jehu eyen Hanani osim Baasha, ye ufɔk esie, ke abaŋa kpukpru mme idiɔk ido oro enye akanamde ke iso Jehovah, onyuŋ ayat enye esit ke utom ubɔk esie, onyuŋ ebiet ufɔk Jeroboam: koro enye okonyuŋ osobode enye.

8Ke ɔyɔhɔ isua Asa edidem Judah edip ye itiokiet, Elah eyen Baasha ada ubɔŋ ke Tirzah, ke isua iba.

9Ekem owo esie Zimri, etubom ubak mme chariot esie, oduk odu abaŋa enye. Ndien ke ini enye odude ke Tirzah, ɔŋwɔŋ mmin akpa ke ufɔk Arza etubom ufɔk esie ke Tirzah;

10Zimri aka okokim enye owot, ke ɔyɔhɔ isua Asa edidem Judah edip ye itiaba: ndien ada ubɔŋ ke itie esie.

11Edikem adaŋemi enye akadade ubɔŋ, onyuŋ etiede ke ebekpo esie, enye osobo ofuri ufɔk Baasha, ikpɔŋke baba erenowo kiet ke otu oruk esie, ye mme ufan esie, inɔ enye.

12Ntem ke Zimri osobo ofuri ufɔk Baasha, ekem ke uyo Jehovah oro enye akadade inua prophet Jehu,

13ɔdɔhɔ abaŋa Baasha; ke abaŋa kpukpru mme idiɔk ido Baasha, ye mme idiɔk ido Elah eyen esie, emi mmɔ ekenamde, enyuŋ edade esin Israel ediɔk, enyuŋ eyat Jehovah Abasi Israel esit, ke ndisime ido mmɔ.

14Ndien ama edi ikɔ Elah eŋwen, ye kpukpru se enye akanamde, nte ikewetke mmɔ isin ke ŋwed ikɔ eyo ndidem Israel?

15Ke ɔyɔhɔ isua Asa edidem Judah edip ye itiaba, Zimri ada ubɔŋ usen itiaba ke Tirzah. Ndien mbon-ekɔŋ ena ke nna - ekɔŋ eŋwana ye Gibbethon, emi enyenede mme Philistine.

16Ndien adaŋa emi mmɔ eke edude ke nna-ekɔŋ ekopde ete ke Zimri ama oduk odu, ama onyuŋ owot edidem ŋko, ofuri Israel eda Omri, etubom mboŋ-ekɔŋ, enim ke edidem ofuri Israel ke usen oro ke nna-ekɔŋ.

17Ndien Omri ye ofuri Israel ŋko edaŋa ke Gibbethon, eka ekekan Tizah ekuk.

18Edikem adaŋemi Zimri okutde nte ema ekeda obio, enye oduk ke ufɔk-enyɔŋ ufɔk edidem, onyuŋ ɔfɔp ufɔk edidem ke ikaŋ, abaha idemesie, ndien akpa.

19Kabaŋa mme idiɔk ido esie oro enye akanamde, ke anam idiɔk ke iso Jehovah, onyuŋ asaŋa ke usuŋ Jeroboam, ye ke idiɔk ido esie oro enye akanamde, ke ndisin Israel ediɔk.

20Ndien ama edi ikɔ Zimri eŋwen, ye odu esie oro enye okodukde, nte ikewetke mmɔ isin ke ŋwed eyo ndidem Israel?

21Ndien nditɔ Israel ebahare edem iba: ubak mmɔ kiet etiene Tibni eyen Ginath, ete inim enye ke edidem; ubak eken enyuŋ etiene Omiri.

22Edi mmɔ oro etienede Omri esɔŋɔ ekan mmɔ oro etienede Tibni eyen Ginath: ntem ke Tibni akpa, ndien Omri ada ubɔŋ.

23Ke ɔyɔhɔ isua Asa edidem Judah edip ye duopekiet, Omri ada ubɔŋ Israel ke isua duopeba: enye edi edidem ke Tirzah ke isua itiokiet.

24Ndien enye edep obot Samaria ye Shemer ke talent silver iba, onyuŋ ɔbɔp (obio) ke obot oro, onyuŋ ada enyiŋ Shemer, andinyene obot, osio obio oro enye ɔkɔbɔpde, okot ete Samaria.

25Edi Omri anam idiɔk ke iso Jehovah, onyuŋ ɔdiɔk akan kpukpru mmɔ oro ekebemde enye iso.

26Koro enye asaŋade ke ofuri usuŋ Jeroboam eyen Nebat, ye ke idiɔk ido esie oro enye akadade esin Israel ediɔk, ke ayat Jehovah Abasi Israel esit ke ndisime ido mmɔ.

27Ndien ama edi ŋkpɔ Omri eŋwen emi enye akanamde, ye uko esie emi enye akanamde, nte ikewetke mmɔ isin ke ŋwed ikɔ eyo ndidem Israel?

28Ekem Omri ɔsuhɔre ana ye mme ete esie ede, onyuŋ ɔbuhɔ ke Samaria: ndien Ahab eyen esie ada ubɔŋ ke itie esie.

29Ekem Ahab eyen Omri ada itie edidem Israel ke ɔyɔhɔ isua Asa edidem Judah edip ye efureta: ndien Ahab eyen Omri edi edidem Israel ke Samaria ke isua edip ye iba.

30Ahab eyen Omri onyuŋ anam idiɔk ke iso Jehovah akan kpukpru mmɔ oro ekebemde enye iso.

31Edikem, (nte erisaŋa emi enye asaŋade ke mme idiɔk ido Jeroboam eyen Nebat edi ekpri ŋkpɔ), enye onyuŋ ada Jezebel eyen Ethbaal edidem mme Zidonian ɔdɔ, onyuŋ aka akanam ŋkpɔ Baal, onyuŋ atuak ibuot ɔnɔ enye.

32Enye onyuŋ anam itie-uwa ɔnɔ Baal ke ufɔk Baal oro enye ɔkɔbɔpde ke Samaria.

33Ahab onyuŋ anam eto-mkpe; Ahab onyuŋ ɔdɔdiɔŋ anam se iyatde Jehovah Abasi Israel esit, akan kpukpru ndidem Israel oro ekebemde enye iso.

34Hiel a Bethel ɔbɔp Jericho ke eyo esie: ɔtɔŋɔ ndibɔp ke Abiram akpan esie, onyuŋ ɔkɔŋ itim esie ke Segub ekpri eyen esie, ekem ke eyo Jehovah oro enye ɔkɔdɔhɔde ke inua Joshua eyen Nun.