1EKEM Hezekiah ɔdɔŋ owo utom ke ofuri Israel ye Judah, onyuŋ ewet ŋwed, ɔnɔ esɔk Ephraim ye Manasseh, ete, Yak mmɔ edi ke ufɔk Jehovah ke Jerusalem, edinim passover enɔ Jehovah Abasi Israel.
2Koro edidem, ye ikpɔ owo esie, ye ofuri esop ekesopde ibuot ke Jerusalem, ete inim passover ke udiana-akpa ɔfiɔŋ.
3Koro mmɔ mikekemeke ndinim enye ke ini oro, koro mme oku mikanamke idem mmɔ esana nte ekemde, mikonyuŋ idige kpukpru owo ebono ke Jerusalem.
4Ndien edidem ye ofuri esop ema ŋkpɔ oro.
5Ndien mmɔ ewuk ewuhɔ, ete etɔt ofuri Israel ntɔt, ɔtɔŋɔde ke Beer-sheba, tutu osim ke Dan, ete, Yak mmɔ edi edinam passover enɔ Jehovah Abasi Israel ke Jerusalem: koro toto ke anyan ini mmɔ mikanamke enye nte ekewetde.
6Ndien mbon-itɔk ebɔ edidem ye ikpɔ owo esie ŋwed, esaŋa ke ofuri Israel ye Judah, ndien mmɔ edɔhɔ kpa nte edidem eketemede, ete, Mbufo nditɔ Israel, efiak edem etiene Jehovah Abasi Abraham, ye Isaac, ye Israel, ndien enye eyefiak etiene mbufo emi esuhɔde, emi ebɔhɔde ndidem Assyria ke ubɔk.
7Mbufo ekubiet mme ete mbufo, ye nditɔ-ete mbufo, eke ekeduede Jehovah Abasi mme ete mmɔ; ndien Enye ada mmɔ onim ke ŋkpɔ iyikhe, kpa nte mbufo ekutde.
8Mbufo ekusɔŋ, ndien, obot-itɔŋ mbufo, nte mme ete mbufo, edi esuk idem enɔ Jehovah, enyuŋ edi ke edisana ebiet esie, emi enye anamde asana ke nsinsi: enyuŋ enam ŋkpɔ Jehovah Abasi mbufo, man ikaŋ iyaresit esie ɔwɔŋɔre ɔkpɔŋ mbufo.
9Koro edieke mbufo efiakde edem etiene Jehovah, nditɔ-ete mbufo, ye nditɔ mbufo eyekut mbɔm ke iso mmɔ eke eketaŋde mmɔ efep, enyuŋ efiak ke edem emi: koro Jehovah Abasi mbufo enyenede esit mfɔn ye mbɔm, midinyuŋ ikabakere iso esie ikpɔŋ mbufo, ke mbufo efiakde etiene enye.
10Ndien mbon-itɔk oro esaŋa ke obio, ke obio isɔŋ Ephraim ye eke Manasseh, tutu esim ke Zebulun; edi esak mmɔ, enyuŋ esuene mmɔ.
11Edi ndusuk owo emi etode ke Asher, ye ke Manasseh, ye ke Zebulun, esuhɔre idem mmɔ enim, enyuŋ edi ke Jerusalem.
12Ubɔk Abasi onyuŋ odu ke Judah ŋko ke ndinɔ mmɔ esit kiet, man enam ke ewuhɔ edidem, ye eke mbɔŋ, ke uyo Jehovah.
13Ntre ke ediwak owo ebono ke Jerusalem ndinim usɔrɔ uyo eke leaven miduhe, ke udiana-akpa ɔfiɔŋ, kpa ata akwa otu eti-eti.
14Ndien mmɔ edaha ke enyɔŋ ekesioŋo mme itie-uwa eke edude ke Jerusalem efep, enyuŋ esioŋo kpukpru mme itie-ufɔp incense efep, eduɔŋɔ mmɔ ke itihere Kidron.
15Ekem mmɔ ewot passover ke ɔyɔhɔ usen duopenaŋ ke udiana-akpa ɔfiɔŋ: ndien mme oku ye mme Levite enyene but, enyuŋ enam idem mmɔ esana, eda edifɔp uwa edi ke ufɔk Jehovah.
16Ndien mmɔ eda ke idaha mmɔ, kpa nte ekam esinamde, esin ke item Moses owo Abasi; mme oku ebɔ mme Levite iyip ke ubɔk esime.
17Koro ediwak owo eke mikanamke idem mmɔ esana edude ke esop: mmɔdo mme Levite edade ke ndiwot passover nnɔ kpukpru owo eke edehede, man enam mmɔ esana enɔ Jehovah.
18Koro ediwak otu owo emi etode ke Ephraim, ye ke Manasseh, ye ke Issachar, ye ke Zebulun, mikanamke idem mmɔ esana, edi mmɔ edia passover esin ke usuŋ nte mikewetke.
19Koro Hezekiah akanamde mkpe-ubɔk ɔnɔ mmɔ, ete, Eti Jehovah, fen kpukpru owo eke ewukde esit mmɔ eyom Abasi, Jehovah Abasi mme ete mmɔ, okposuk edi nte misaŋake ye edisana ido edisana ebiet.
20Ndien Jehovah okop ɔnɔ Hezekiah, onyuŋ efen kpukpru owo.
21Ndien nditɔ Israel eke edude ke Jerusalem, enim usɔrɔ uyo eke leaven miduhe, ke ofuri usen itiaba, ke akamba idara: ndien mme Levite ye mme oku ekama ŋkpɔ mbre Jehovah eke esɔŋde uyo, etoro Jehovah kpukpru usen.
22Ndien Hezekiah ɔdɔhɔ ufan-ufan ye kpukpru mme Levite eke etimde efiɔk eti ifiɔk ŋkpɔ Jehovah: ndien mmɔ edia usɔrɔ ke usen itiaba, ewa uwa ekɔm, enyuŋ etoro Jehovah Abasi mme ete mmɔ.
23Ndien kpukpru mbon-esop ediomi ndinim usen itiaba eŋwen: mmɔ enyuŋ enim usen itiaba eŋwen ke idaresit.
24Koro Hezekiah edidem Judah ɔnɔde esop oro tɔsin enaŋ ye tɔsin ŋkpri ufene itiaba: mbɔŋ ŋko enyuŋ enɔ esop tɔsin enaŋ ye tɔsin ŋkpri ufene duop: ediwak oku enyuŋ enam idem mmɔ esana.
25Ndien ofuri esop Judah, ye mme oku, ye mme Levite, ye ofuri esop oro okotode ke Israel, ye isen owo oro eketode ke isɔŋ Israel, ye mmɔ eke eduŋde ke Judah edat esit.
26Ntre ke akamba idara odu ke Jerusalem: koro toto ke eyo Solomon eyen David edidem Israel, oruk usɔrɔ nte emi mikoduhe ke Jerusalem.
27Ndien mme oku mme Levite edaha ke enyɔŋ ekediɔŋ kpukpru owo: ndien ekop uyo mmɔ, mkpe-ubɔk mmɔ onyuŋ osim ke edisana iduŋ esie ke enyɔŋ.
Who We AreWhat We EelieveWhat We Do
2025 by iamachristian.org,Inc All rights reserved.
