JEREMIAH 35 - Efik Old Bible With Sectional Headings

Ŋkopitem Nditɔ Rechab

1IKƆ emi okoto Jehovah osim Jeremiah, ke eyo Jehoiakim eyen Josiah edidem Judah, ete,

2Ka ke ufɔk mme Rechabite, nyuŋ neme ye mmɔ, nyuŋ da mmɔ di ke ufɔk Jehovah ke ubet kiet, ndien nɔ mmɔ wine eŋwɔŋ.

3Ndien nda Jaazaniah eyen Jeremiah, eyen Habazziniah, ye nditɔ-ete esie, ye kpukpru nditɔ esie, ye ofuri ufɔk mme Rechabite:

4ndien nda mmɔ ndi ke ufɔk Jehovah, ke ubet nditɔ Hanan, eyen Igdaliah, owo Abasi, emi odude ke ŋkaŋ ubet mbɔŋ, emi odude ke enyɔŋ ubet Maaseiah eyen Shallum emi ekpemede inua otop.

5Ndien mmen otu emi wine ɔyɔhɔde ke esit ye cup nnim ke iso nditɔ ufɔk mme Rechabite, ndien ndɔhɔ mmɔ, nte, Mbufo eŋwɔŋ wine.

6Ndien mmɔ edɔhɔ ete, Nyin iŋwɔŋke wine: koro Jonadab eyen Rechab, ete nnyin, okowukde nnyin, ete, Mbufo ye nditɔ mbufo ekuŋwɔŋ wine ke nsinsi:

7ekunyuŋ ebɔp ufɔk, ekunyuŋ ewari mkpasip, ekunyuŋ etɔ iŋwaŋ-vine, ekunyuŋ enyene baba: edi mbufo eduŋ ke tent kpukpru usen mbufo; man usen mbufo ekpewak ke iso isɔŋ emi mbufo edide isen owo do.

8Ndien nnyin ikop uyo Jonadab eyen Rechab ete nyin ke kpukpru se enye okowukde nyin, ete ke ofuri usen nyin ikuŋwɔŋ wine, nnyin, ye iban nnyin, ye nditɔ-iren nnyin, ye nditɔ nnyin iban;

9ikunyuŋ ibɔp ufɔk eke iduŋde ke esit: ikunyuŋ inyene iŋwaŋ-vine, ye iŋwaŋ, ye mkpasip:

10ndien nnyin iduŋ ke tent, inyuŋ ikop, inyuŋ inam kpukpru, kpa nte Jonadab ete nnyin eketemede nnyin.

11Edikem ke ini Nebuchadrezzar edidem Babylon ɔdɔkde edi ke edem emi, nnyin idɔhɔ, ite, Yak nnyin ika Jerusalem, ibak mbon-ekɔŋ Babylon, ibak mbon-ekɔŋ Syrian ŋko: ntem ke nnyin iduŋ ke Jerusalem.

12Ndien uyo Jehovah osim Jeremiah, ete, Ntem ke Jehovah mme udim Abasi Israel ɔdɔhɔ, ete,

13Ka kɔdɔhɔ mbio Judah ye mme andiduŋ Jerusalem, ete, Nte mbufo inyimeke ndibɔ item, man ekop uyo mi? Jehovah ɔdɔhɔ.

14Ke enim uyo Jonadab eyen Rechab emi enye eketemede nditɔ esie, ete ekuŋwɔŋ wine; ndien mmɔ iŋwɔŋke tutu osim mfin emi; koro mmɔ ekopde ewuhɔ ete mmɔ. Edi ami ŋkɔdɔhɔ mbufo, mbabak ndɔhɔ; ndien mbufo ikopke uyo mi.

15Ami ŋko nnyuŋ ndɔŋ kpukpru ikɔt mi mme prophet utom ke ɔtɔ mbufo, mbabak ndɔŋ, nte, Mbɔk, mbufo kpukpru ekabare ekpɔŋ idiɔk usuŋ mbufo, enyuŋ ekabare ido mbufo enam ɔfɔn, ekunyuŋ ebine mme abasi efen ndinam ŋkpɔ nnɔ mmɔ, ndien mbufo eyeduŋ ke isɔŋ emi ŋkɔnɔde mbufo ye mme ete mbufo: ndien mbufo ikpaŋke utɔŋ mbufo, inyuŋ ikopke inɔ mi.

16Koro nditɔ Jonadab eyen Rechab ema enim ewuhɔ ete mmɔ, emi enye okowukde mmɔ; edi mbio emi ikopke uyo mi:

17mmɔdo ntem ke Jehovah Abasi mme udim Abasi Israel ɔdɔhɔ, ete, Sese, ami mmɔŋ nda ofuri idiɔk ŋkpɔ emi ŋkɔdɔhɔde mbaŋa mmɔ, ntiene Judah ye kpukpru mme andiduŋ Jerusalem: koro mma ndɔhɔ ye mmɔ, ndien mmɔ ikopke: mma nnyuŋ ŋkot mmɔ, ndien mmɔ iyereke.

18Ndien Jeremiah ɔdɔhɔ ufɔk mme Rechabite, ete, Ntem ke Jehovah mme udim Abasi Israel ɔdɔhɔ, ete, Koro mbufo ekopde ibet Jonadab ete mbufo, enyuŋ enimde kpukpru ibet esie, enyuŋ enam kpukpru nte enye eketemede mbufo:

19mmɔdo ntem ke Jehovah mme udim Abasi Israel ɔdɔhɔ, ete, Owo Jonadab eyen Rechab iditreke ndida ke iso mi kpukpru ini.