1MMƆDO ubiom-ikpe iduhe aba inɔ mmɔ emi edude ke Christ Jesus.
2Koro ibet Spirit uwem ke Christ Jesus ama anam mi mbɔhɔ ibet ndiɔk-ŋkpɔ ye mkpa.
3Koro se ibet mikikemeke ndinam, ke emi obukidem esinde enye edi mmem-mmen, Abasi akanam; ke emi Enye osiode Eyen Esie ɔdɔŋ ke mbiet obukidem idiɔk-ŋkpɔ, onyuŋ adade Enye nte isop, anam ikpe obiom idiɔk-ŋkpɔ ke obukidem Esie:
4man nnyin, emi misaŋake ke obukidem, edi isaŋade ke spirit, ikpanam edinen ido ibet ɔyɔhɔ-ɔyɔhɔ.
5Koro mmɔ emi edide mbon obukidem ekere ŋkpɔ obukidem, edi mmɔ emi edide mbon spirit ekere ŋkpɔ spirit.
6Koro erikere ŋkpɔ obukidem ɔwɔrɔ mkpa; edi erikere ŋkpɔ sprit edi uwem ye emem:
7koro erikere ŋkpɔ obukidem edi eriŋwana ye Abasi; koro utɔ esit oro misukke ibuot inɔ ibet Abasi, minyuŋ ikemeke ndisuk ibuot.
8Mmɔ emi edude ke obukidem inyuŋ ikemeke ndinem Abasi esit.
9Edi mbufo iduhe ke obukidem, edi edu ke spirit, edieke Spirit Abasi oduŋde ke esit mbufo. Edi edieke owo minyeneke Spirit Christ, enye idige owo Christ.
10Edi edieke Christ odude ke esit mbufo, ikpɔhidem ama akpa oto ke idiɔk-ŋkpɔ, edi spirit ke odu uwem oto ke edinen ido.
11Edi edieke Spirit Abasi emi akanamde Jesus eset ke mkpa oduŋde ke esit mbufo, Enye emi akanamde Christ Jesus eset ke mkpa eyenyuŋ anam ikpɔhidem mbufo emi enyenede ndikpa edu uwem, oto ke Spirit Esie emi oduŋde ke esit mbufo.
12Mmɔdo, nditɔ-ete, nnyin idi mme akama-isɔn; edi nnyin ikamake obukidem isɔn, ndidu uwem nte obukidem etemede.
13Koro edieke mbufo edude uwem nte obukidem etemede, mbufo enyene ndikpa; edi edieke mbufo edade spirit, mbufo ewot erinam eke obukidem anamde, mbufo eyedu uwem.
14Koro adaŋa owo nte Spirit Abasi adade mmɔ usuŋ mmɔ oro edi editɔ Abasi.
15Koro mbufo mikɔbɔhɔ spirit ufin eke esinde mbufo etɔŋɔ ntak enyene ndik; edi mbufo ekɔbɔ spirit eke enyenede mmɔ emi edade esin ke ubon Abasi, emi anamde nnyin ikot Abasi, ite, Abba, Ete.
16Spirit ke Idem Esie etiene spirit nnyin edi ntiense ete, nnyin idi nditɔ Abasi.
17Edi edieke nnyin idide nditɔ, imonyuŋ inyene udeme ke se enimde enɔ nditɔ; imenyene udeme ke se Abasi onimde; imasaŋa ye Christ inyene udeme: koro ana nte nnyin ima ikut ndutuhɔ ye Enye, inyenyuŋ ida ubɔŋ ye Enye.
18Koro mbat nte ndutuhɔ eke ikutde idaha emi idige se idotde ndida ndomo ye ubɔŋ eke ediyararede ke idem nnyin.
19Koro ofuri ekondo etiede ke ɔkpɔsɔŋ udɔŋ, ebet ini eke ediyararede nditɔ Abasi.
20Koro ekenam ofuri ekondo osuk idem ɔnɔ ikpikpu ŋkpɔ, itoho ke erinyime esit, edi oto ke Enye emi akanamde enye osuk ntre, ye idori-enyin,
21ete ke eyenyaŋa ekondo ke idemesie nde esio ke itie ufin mbiara, esin ke itie eyenisɔŋ emi enyenede ubɔŋ eke nditɔ Abasi.
22Koro nnyin imɔfiɔk ite ofuri ekondo ke omum mmum, onyuŋ odu ke ubiak uman tutu osim emi.
23Idige ntre ikpɔŋ, edi nnyin ke idem nnyin ŋko-ŋko, emi inyenede akpa mfri Spirit, nnyin ke idem nnyin ke imomum mmum ke esit nnyin, itie ibet ini eke edidade nnyin isin ke ubon Abasi, oro edi, ini eke edifakde ikpɔhidem nnyin.
24Koro ema enyaŋa nnyin ke idori-enyin emi: edi idori-enyin eke owo okutde ke enyin idige idori-enyin; koro anie odori enyin abaŋa se enye okutde?
25Edi edieke nnyin idoride enyin ibaŋa se nnyin mikwe, adaŋoro nnyin itie ke ime ibet ŋkpɔ oro.
26Kpa ntre ŋko ke Spirit onyuŋ anyaŋa mmemidem nnyin: koro nnyin mifiɔkke ndibɔŋ akam nte nnyin ikpɔbɔŋde: edi Spirit ke Idem Esie anam mkpe-ubɔk ɔnɔ nnyin ye mmum eke owo mikemeke nditiŋ.
27Enye emi ɔduŋɔrede esit owo omonyuŋ ɔfiɔk se ekikere Spirit edide, koro spirit anamde mkpe-ubɔk ɔnɔ ikɔt Abasi nte ekemde ye uduak Abasi.
28Edi imɔfiɔk ite kpukpru ŋkpɔ esaŋa ɔtɔ kiet enam ufɔn enɔ mmɔ eke emade Abasi, kpa mmɔ emi ekotde nte ekemde ye uduak Esie.
29Koro mme owo emi Enye ekebemde iso ɔfiɔk, ke Enye okonyuŋ ebem iso onim ete mmɔ ekpekabare ebiet Imɔ, man Enye oro edidi akpan ke otu ediwak nditɔ-ete:
30ndien mmɔ emi Enye ekebemde iso onim ntem, ke Enye onyuŋ okot mmɔ; mmɔ emi Enye okotde, ke Enye etebe mmɔ ikpe; ndien mmɔ emi Enye etebede mmɔ ikpe, ke Enye onyuŋ ɔnɔ mmɔ ubɔŋ.
31Nso ke ididɔhɔ ndien ibaŋa ŋkpɔ emi? Edieke Abasi adade ye nnyin, anie edikeme ndibiɔŋɔ nnyin?
32Enye emi mikesinke ndinɔ Eyen Esiemɔ, edi ayakde Enye ɔnɔ ke ibuot nnyin kpukpru, Enye edikeme didie nditre ndinɔ nnyin kpukpru ŋkpɔ ndian ye Enye?
33Anie edidori ndimek ikɔt Abasi ikɔ?
34Edi Abasi etebe mmɔ ikpe; anie edibiom mmɔ? Ndi Christ Jesus emi akakpade, ŋkpakam ndɔhɔ nte, Jesus emi ekesetde ke mkpa, emi odude ke ubɔk nnasia Abasi, emi onyuŋ anamde mkpe-ubɔk ɔnɔ nnyin?
35Anie edidianare nnyin ke ima Christ? Nte ukut edidianare, mme ndutuhɔ, mme isin-enyin, mme akaŋ, mme ubuene ye unana, mme ŋkpɔ-ndik, mme ofut?
36Kpa nte ewetde ete,
Ewot nnyin ke ofuri usen ebaŋa fi;
Ekebat nnyin ke erɔŋ mkpa.
37Edi ke kpukpru ŋkpɔ emi nnyin imakan, inyuŋ idɔdiɔŋ ikan, oto ke Enye emi akamade nnyin.
38Koro mmotim mbure mfiɔk nte, mkpa ye uwem, ye mme angel ye mbɔŋ, ye ŋkpɔ eke edude ke emi, ye ŋkpɔ eke edidide, ye mme odudu,
39ye ukoŋ ye utuŋɔ, ye ŋkpɔ efen ekededi eke ebotde, idikemeke ndidianare nnyin ke ima Abasi, emi odude ke Christ Jesus Ɔbɔŋ nnyin.
Who We AreWhat We EelieveWhat We Do
2025 by iamachristian.org,Inc All rights reserved.
