ŊWED MBON ROME 9 - Efik Old Bible With Sectional Headings

Abasi ye Ikɔt Esie

1MMETIŊ akpanikɔ ke Christ nsuhu nsu, esit mi onyuŋ etiene mi edi ntiense ke Edisana Spirit, ete,

2mmenyene akwa mfuhɔ ye ubiak emi midoboke ke esit mi.

3Koro ŋkpoyom nte ekpadianare mi ke Christ nte ŋkpɔ-nsobo, man ɔfɔn ye nditɔ-ete mi, oruk mi ke obukidem:

4emi edide nditɔ Israel; ekeda mmɔ esin ke ubon Abasi; uyama ubɔŋ (Abasi), ye mme ediomi, ye erinɔ ibet, ye eriwa uwa nnɔ Abasi, ye mme uŋwɔŋɔ enyuŋ enyene mmɔ: mme ete enyuŋ edi eke mmɔ:

5Christ okonyuŋ oto ke otu mmɔ ke obukidem Esie: Enye edi Andikara kpukpru ŋkpɔ, Abasi, emi enyenede itoro ke nsinsi. Amen.

6Edi idige nte ŋkpɔ eke ikɔ Abasi amakabare edi ikpikpu. Koro idige kpukpru mmɔ emi etode ke ubon Israel edi Israel;

7mmɔ kpukpru inyuŋ idige nditɔ Abraham emi edide ubon Abraham; edi, Ke Isaac ke edikot ubon fo.

8Emi ɔwɔrɔ ete, idige nditɔ obukidem edi nditɔ Abasi, edi ebat nditɔ uŋwɔŋɔ ke ata ubon,

9Koro emi edi ikɔ uŋwɔŋɔ, ete, Adaŋa ini ntem nyedi, ndien Sarah eyeman eyen.

10Ikureke adaŋoro; edi Rebecca ŋko okoyomo idibi ɔnɔ owo kiet kpa ete nnyin Isaac;

11Ndien ke ini nditɔ mimanake kaŋa, minyuŋ inamke baba eti ŋkpɔ kiet mme idiɔk-ŋkpɔ, edɔhɔ eka mmɔ ete, Akpan eyenam ŋkpɔ ɔnɔ udɔ:

12man oto do uduak Abasi, emi asaŋade ye erimek, ɔkpɔsɔŋɔ ada, nte ŋkpɔ eke mitoho ke se owo anamde, edi otode ke Andikot.

13Kpa nte ewetde ete, Jacob ke ŋkama, edi ŋkasua Esau.

14Nso ke ididɔhɔ ndien? Nte ididɔhɔ ite, Abasi; ɔdiɔk ndinam?

15Nsa nnyin O! Koro Enye ɔdɔhɔ Moses ete, Nyetua owo mbɔm eke ntuade, nyenyuŋ mfɔn ye owo eke mfɔnde.

16Mmɔdo ŋkpɔ emi itoho owo emi oyomde yom, inyuŋ itoho owo emi efehede itɔk, edi oto Abasi emi enyenede mbɔm.

17Koro Ŋwed Abasi ɔdɔhɔ Pharaoh ete,

Edi emi ekesin Mi nnim fi

Man nda fi ŋwut odudu Mi,

Man enyuŋ etaŋa enyiŋ Mi ke ofuri isɔŋ.

18Ntre ke Enye enyene mbɔm ye owo eke Enye amade, onyuŋ ɔsɔŋ owo esit nte amade.

19Afo eyedɔhɔ mi ndien ete, Nsidi ntak Enye eyirede nditɔhɔ ye owo? Koro anie akaŋwana ye uduak Esie?

20Edi afo edi anie, O owo, emi ɔbɔrɔde adian Abasi ntem? Nte ŋkpɔ eke ebotde ekeme ndidɔhɔ andibot enye ete, Nsinam afo okobotde mi ntem?

21Mme nte obot-eso inyenede unen ndisio ubak mbat kiet mbot eso nnim nnɔ itie ukpono, nnyuŋ nsio ubak mbat eken mbot eso nnim nnɔ usuhɔre-itie?

22Edi ekpedi nte Abasi, emi onyimede ndiwut iyaresit Esie, ndiyuŋ nnam owo efiɔk odudu Esie, emede anyan ime ye mme eso iyaresit emi enade enɔ nsobo;

23man oto do Enye akpayarare uwak ubɔŋ Esie ke idem mme eso mbɔm, emi Enye ekebemde iso onim ɔnɔ ubɔŋ;

24kpa nnyin, emi Enye okonyuŋ okotde, idige ke otu mme Jew ikpɔŋ, edi ke otu mme Gentile nde?

25Nte emi Enye ɔdɔhɔde ke ŋwed Hosea ŋko, ete,

Nyekot mmɔ emi mikedige ikɔt Mi, nte, ikɔt Mi,

Nyenyuŋ ŋkot enye emi mikedige ŋkpɔ ima, nte edima ŋwan;

26Ndien ama ekem, ke ebiet eke ekɔdɔhɔde mmɔ ete, mbufo idige ikɔt Mi,

Kpa do ke edikot mmɔ nditɔ Abasi uwem.

27Edi Isaiah ofiori abaŋa Israel ete, Ibat nditɔ Israel akpawakde nte ntan mben inyaŋ, edi nsuhɔ ke edinyaŋa:

28koro Jehovah eyenam se Enye ɔkɔdɔhɔde ke isɔŋ, anam uyo Esie ama, onyuŋ ebiere enye ibibio.

29Ŋko, kpa nte Isaiah ekebemde iso ɔdɔhɔ ete,

Ke mikpedige Jehovah mme udim ayak ubon ɔsuhɔ ɔnɔ nnyin.

Nnyin ikpakabare itie nte Sodom, ikponyuŋ ibiet Gomorrah.

30Ididɔhɔ didie ndien? Ite, mme Gentile, emi mikaŋwanake nditiene edinen ido, ema esim edinen ido, kpa edinen ido eke otode ke mbuɔtidem:

31edi Israel, emi eŋwanade nditiene ibet eke akpadade edinen ido ɔsɔk owo, ikosimke ibet oro.

32Ntak asaŋa didie? Koro mmɔ mikadaha mbuɔtidem iyom enye, edi nte edade erinam utom eyom.

33Mmɔ etuak ukot eduɔ ke itiat iduɔ; kpa nte ewetde ete,

Sese mmonim itiat iduɔ ke Zion,

Ye akwa itiat emi anamde owo ɔduɔ;

Owo eke ɔbuɔtde idem ye Enye idinyuŋ ikwe but.