DEUTERONOMY 15 - Efik Old Bible With Sectional Headings

Ɔyɔhɔ Isua Itiaba: Isua Edidahado

1KE utit kpukpru isua itiaba nim eridahado. Ndien emi edi ikɔ eridahado emi:

2kpukpru owo eke enɔde mbɔhɔiduŋ mmɔ ŋkpɔ ke ebuɔt, eyeyak atak: mmɔ ekukpak aba mbɔhɔiduŋ mmɔ, mme eyen-ete mmɔ: koro ekerede eridahado Jehovah.

3Kpak esen owo: edi yak ubɔk fo adahado ke okuo eke odude eyen-usɔ ke ubɔk;

4man owo ubuene okudu ke otu fo: koro Jehovah eyedɔdiɔŋ fi ke isɔŋ emi Jehovah Abasi fo ɔnɔde fi ke udeme, man ada enye enyene:

5edieke afo edikopde uyo Jehovah abasi fo, onyuŋ ekpemede ndinim kpukpru mbet emi ami mbetde fi mfin emi.

6Koro Jehovah Abasi fo ɔdiɔŋde fi, kpa nte enye ɔkɔdɔhɔde fi: ndien afo eyenɔ idut ediwak ke ebuɔt, edi udubuɔtke ebuɔt; eyenyuŋ akan ediwak mme idut, edi mmɔ idikanke fi.

7Ke ini ubuene eke edide eyen usɔ kiet, edidude ke otu fo, ke obio fo kiet, ke isɔŋ fo emi Jehovah Abasi fo ɔnɔde fi, kusɔŋ esit fo, kunyuŋ ufat ubɔk fo ye eyen-usɔ eke edide ubuene:

8edi tatat ubɔk nɔ enye, nyuŋ buɔt enye se ikemde ye unana eke enye ananade.

9Kpeme idem fo mbak ikɔ edidu ke idiɔk esit fo ete, Ɔyɔhɔ isua itiaba, isua eridahado emekpere: ndien enyin fo akabare ɔdiɔk ye eyen-usɔ emi edide ubuene, ndien afo etre ndinɔ enye; enye onyuŋ eseme ɔnɔ Jehovah abaŋa fi, ndien idiɔk ŋkpɔ ɔsɔp fi.

10Kutre ndinɔ enye, esit fo okunyuŋ ɔdiɔk ke ini afo ɔnɔde enye: koro ŋkpɔ emi eyesin Jehovah Abasi fo ɔdiɔŋ fi ke kpukpru utom fo, ye ke kpukpru se afo ayande ubɔk fo ke esit.

11Koro mme ubuene midikureke ke isɔŋ: mmɔdo ami ntemede fi, nte, Tatat ubɔk fo nɔ eyen-usɔ, ye ubuene fo, ye owo unana fo ke isɔŋ fo.

12Ke adaŋemi eyen usɔ, mme Hebrew eren, mme Hebrew aŋwan, edinyamde idem esie ɔnɔ fi, edinyuŋ anamde utom ɔnɔ fi ke ofuri isua itiokiet; ndien ke ɔyɔhɔ isua itiaba, sio enye ke ufin fo efep.

13Ndien adaŋemi afo osiode enye ke ufin fo efep, kuyak enye asaŋa ubɔk-ubɔk:

14tat ubɔk fo sio ke ŋkpri ufene fo, ye ke ebiet ubek ibokpot fo, ye ke ebiet unyimi wine fo, fɔn ye enye: sio ke se Jehovah Abasi fo ɔdiɔŋde fi nɔ enye.

15Nyuŋ ti nte afo ekedide ofin ke isɔŋ Egypt, nte Jehovah Abasi fo okonyuŋ afakde fi; mmɔdo ami ntemede fi ŋkpɔ emi mfin emi.

16Ndien ama ekem, edieke enye ɔdɔhɔde fi, ete, Nnyimeke ndiwɔrɔ ŋkpɔŋ fi: koro enye amade fi ye ufɔk fo, koro ɔfɔnde ye enye ke ufɔk fo:

17ndien da utibi-ŋkpɔ, tibi enye utɔŋ dian ke itim, ndien enye eyedi ofin fo ke nsinsi. Ntre ke afo edinyuŋ anam ye ofin aŋwan fo ŋko.

18Kunam iyikhe-iyikhe ke afo osiode enye ke ufin fo ayak; koro enye ama anam ŋkpɔ ɔnɔ fi ke isua itiokiet, ekem ye ŋkpɔ eyen-utom owo emi ekpede enye utom, utim ikaba: ndien Jehovah Abasi fo eyediɔŋ fi ke kpukpru se afo anamde.

19Da kpukpru akpa nyara nditɔ emi amanade ke otu ikpɔ ye ŋkpri ufene fo, nim ke edisana ŋkpɔ Jehovah Abasi fo: kuda akpa eyen enaŋ fo unam utom, kunyuŋ ufat idet akpa eyen erɔŋ fo.

20Afo ye ufɔk fo eda enye eketa ke iso Jehovah Abasi fo kpukpru isua, ke ebiet emi Jehovah edimeke.

21Edi enye ama obiomo ndo, edide mbuŋɔ, onyuŋ edide nnan, mme ama obiomo idiɔk ndo ekededi, kuwa enye unɔ Jehovah Abasi fo.

22Da enye ta ke obio fo: owo eke edehede ye owo eke asanade, ubɔk kiet, nte okoyo, ye nte edop.

23Edi kudia iyip esie; duɔk enye ke isɔŋ nte mmɔŋ.