1JEHOVAH ɔdɔhɔ ete, Osuk ɔdɔdiɔk ɔnɔ mme ɔbɔk erɔŋ eke esobode enyuŋ esuande ufene emi ami mbɔkde.
2Mmɔdo ntem ke Jehovah Abasi Israel ɔdɔhɔ abaŋa mme ɔbɔk erɔŋ emi ebɔkde ikɔt mi, ete: Mbufo emesuan ufene mi, enyuŋ ebin mmɔ efep, inyuŋ itiŋke mmɔ enyin ise: sese, ami nyenɔ mbufo ufen mbaŋa idiɔk ido mbufo: emi edi uyo Jehovah.
3Ndien ami nyetaŋ ufene mi emi esuhɔde ke kpukpru mme idut eke mbinde mmɔ nsin do, mbon, nyenyuŋ nda mmɔ mfiak ke ebiet nna mmɔ; ndien mmɔ eyetɔt enyuŋ ewak.
4Ndien nyedori mme ɔbɔk eke edibɔkde mmɔ, ndien mmɔ idifeheke aba ndik, idem idinyuŋ ikpaha aba mmɔ, mmɔ idinyuŋ isopke: ke edi Jehovah ɔdɔhɔ.
5Jehovah ɔdɔhɔ, ete, Sese, usen ke edi eke ndinamde edinen nsehe otibe ɔnɔ David, ndien edidem kiet eyeda ubɔŋ, onyuŋ okut unen, onyuŋ anam edinen ikpe ke isɔŋ.
6Ke eyo esie ke edinyaŋa Judah, Israel eyenyuŋ oduŋ ke ifure: ndien emi edi enyiŋ eke edisiode enye, JEHOVAH EDINEN IDO NNYIN.
7Jehovah ɔdɔhɔ ete, Mmɔdo, sese, mme usen ke edi eke mmɔ mididɔhɔke aba, ite, Ma uwem Jehovah, emi okosiode ubon ufɔk Israel ke isɔŋ Egypt ɔdɔk;
8edi eyedɔhɔ ete, Ma uwem Jehovah emi okosiode ubon ufɔk Israel efep ke isɔŋ edere, ye ke kpukpru mme idut eke ŋkebinde mmɔ nsin do, ada ɔdɔk; ndien mmɔ eyeduŋ ke isɔŋ mmɔ.
9Esit ɔbuŋɔ mi ke idem abaŋa mme prophet; kpukpru mme ɔkpɔ mi enyek; ŋkabare mbiet owo eke akpade mmin, mbiet owo eke mmin akande, mbaŋa Jehovah ye edisana ikɔ esie.
10Koro mme esin-efibe eyɔhɔde ke isɔŋ; koro isɔŋ atuade abaŋa isuŋi; mbiet wilderness emesat, ndien ido mmɔ ɔdiɔk, odudu mmɔ inyuŋ inenke.
11Koro mme prophet ŋko ye mme oku esuk enanam oburobut: kpa ke ufɔk mi ke ŋkut idiɔk ido mmɔ; Jehovah ɔdɔhɔ.
12Mmɔdo usuŋ mmɔ eyetie ye mmɔ nte mfɔfiɔnɔ ebiet ke ekim; eyebin mmɔ, ndien mmɔ eyeduɔŋɔ ke esit; koro nyeda idiɔk-ŋkpɔ, kpa isua ufen mmɔ, ntiene mmɔ: uyo Jehovah edi emi.
13Ŋkokut oburobut ŋkpɔ ke mme prophet Samaria; mmɔ eda Baal etiŋ prophecy, enyuŋ esin ikɔt mi Israel edue:
14ndien ŋkut ata ŋkpɔ ndidien ke mme prophet Jerusalem; ke esin efibe, ke esaŋa ke nsu; mmɔ enyuŋ esɔŋɔ mme idiɔk owo ubɔk, ndien owo ndomo kiet ikabakede ikpɔŋ idiɔk ido esie; kpukpru mmɔ etie ye ami nte Sodom, mme andiduŋ enye enyuŋ ebiet Gomorrah.
15Mmɔdo ntem ke Jehovah mme udim ɔdɔhɔ abaŋa mme prophet, ete, Sese, mmɔŋ nnɔ mmɔ wormwood edia, nnyuŋ nnɔ mmɔ mmɔŋ etidot eŋwɔŋ: koro oburobut ido otode mme prophet Jerusalem osim ofuri isɔŋ.
16Ntem ke Jehovah mme udim ɔdɔhɔ, ete, Mbufo ekukop ikɔ mme prophet emi etiŋde prophecy enɔ mbufo: mmɔ esin mbufo edama idat: etiŋ ŋkukut eke otode mmɔ ke esit, itoho Jehovah ke inua.
17Mmɔ esuk edɔhɔ ye mmɔ eke esinde mi ke ndek, ete, Jehovah ɔdɔhɔ, ete, Mbufo eyenyene emem; enyuŋ edɔhɔ kpukpru owo eke esaŋade ke itun esit mmɔ, ete, “Baba idiɔk-ŋkpɔ kiet idisimke mbufo.”
18Koro anie akada ke odu Jehovah, onyuŋ okut, onyuŋ okop uyo esie? Anie akakpaŋ utɔŋ ke ikɔ esie, onyuŋ okop?
19Sese, oyobio Jehovah ɔwɔrɔ ke iyaresit, kpa ibumere-ibumere oyobio: eyebumere ɔtɔ mme idiɔk owo ke ibuot.
20Iyaresit Jehovah idikabakede, tutu enye anam, onyuŋ ama uduak esit esie: mbufo eyetim efiɔk enye ke utit mme usen oro.
21Ami ŋkɔdɔŋke mme prophet oro utom, ndien mmɔ efeŋe, ŋkɔdɔhɔke ye mmɔ, ndien mmɔ etiŋ prophecy.
22Ekpedi nte, mmɔ ekedade ke odu mi, enyuŋ enamde ikɔt mi ekop ikɔ mi, mmɔ ekpekabare mmɔ ndien esio ke idiɔk usuŋ mmɔ, ye ke idiɔk ido mmɔ.
23Jehovah ɔdɔhɔ, ete, Nte ami ndi Abasi mkpet-mkpet, ndien ndige Abasi nsan-nsan?
24Jehovah ɔdɔhɔ ete, Nte owo ekeme ndidibe ke ndibe ebiet eke ami mmendikwe enye? Jehovah ɔdɔhɔ, ete, Nte ami nyɔhɔke ke ofuri enyɔŋ ye isɔŋ?
25Mmokop uyo mme prophet emi etiŋde nsunsu o-prophecy ke enyiŋ mi, ete, “Mmadaba ndap, mmadaba ndap.”
26Adaŋa didie ke ŋkpɔ emi edidu ke esit mme prophet emi etiŋde nsu-nsu o-prophecy? enyuŋ etiŋde abiaŋa esit mmɔ ke prophecy?
27Emi ekerede ete ke mmimɔ iyenam ikɔt mi efre enyiŋ mi ke ndap mmɔ eke mmɔ etiŋde kiet ye kiet, kpa nte Baal ekesinde mmɔ efre enyin mi.
28Yak prophet eke ndap odude ye enye etiŋ ndap; ndien yak owo eke ikɔ mi odude ye enye, etiŋ ikɔ mi akpan-akpan. Ikpɔk ibokpot asaŋa nso ye idem ibokpot? Jehovah ɔdɔhɔ.
29Jehovah ɔdɔhɔ, ete, Nte ikɔ mi ibietke ikaŋ? nte ibietke hammer eke obomde akamba itiat?
30Jehovah ɔdɔhɔ ete, Mmɔdo, sese, ami mmɔŋ nnam ikɔ ye mme prophet, emi eyipde ikɔ mi kiet ye mbɔhiduŋ esie.
31Jehovah ɔdɔhɔ ete, Sese, ami mmɔŋ nnam ikɔ ye mme prophet emi edade edeme mmɔ edɔhɔ, ete, Enye ɔdɔhɔ.
32Jehovah ɔdɔhɔ ete, Sese, mmɔŋ nnam ikɔ ye mmɔ eke etiŋde nsunsu ndap, enyuŋ ebukde mmɔ, enyuŋ enamde ikɔt mi edue ke nsu mmɔ ye ke use mmɔ; ndien ami ndɔŋke mmɔ, nnyuŋ ŋwukke mmɔ; ndien mmɔ ididoroke mbio emi baba udori. Ke edi Jehovah ɔdɔhɔ.
33Ndien ke ini mbio-obio emi edide prophet, onyuŋ edide oku, edibupde fi, ete, Nsidi uyo Jehovah? Dɔhɔ mmɔ, ndien, ete, Nso uyo? Ŋkɔm nyekpɔŋ mbufo: Jehovah ɔdɔhɔ.
34Ndien ama edi prophet, ye oku, ye mbio-obio emi, edidɔhɔde, ete, “Uyo Jehovah,” nyenɔ owo oro ufen, kpa owo ye ufɔk esie.
35Ntem ke mbufo edidɔhɔ kiet ye mbɔhiduŋ esie, ye owo ye eyen-eka esie, ete, Jehovah ɔbɔrɔ didie? Jehovah onyuŋ ɔdɔhɔ didie?
36Ndien mbufo iditiŋke aba uyo Jehovah: koro ikɔ owo eyedi uyo (Jehovah) esie; ndien mbufo emeyut ikɔ Abasi uwem, kpa eke Jehovah mme udim, Abasi nnyin.
37Dɔhɔ ntem ye prophet, ete, Jehovah ɔkɔbɔrɔ fi didie? Jehovah okonyuŋ ɔdɔhɔ didie?
38Ndien edieke mbufo edidɔhɔde, ete, “Uyo Jehovah”: mmɔdo ntem ke Jehovah ɔdɔhɔ ete, Koro mbufo edɔhɔde ikɔ emi, ete, Uyo Jehovah; ndien ami ndɔŋ ekedɔhɔ mbufo, ete, Mbufo ekudɔhɔ ete, Uyo Jehovah; mmɔdo, sese,
39ami nyefre mbufo tak-tak nnyuŋ nsio mbufo ye obio emi ŋkɔnɔde mbufo ye mme ete mbufo ke iso mi nduɔk:
40nyenyuŋ nnim mbufo ke ŋkpɔ nsinsi but, ye nsinsi esuene, eke owo midifreke.
Who We AreWhat We EelieveWhat We Do
2025 by iamachristian.org,Inc All rights reserved.
