ESTHER 2 - Efik Old Bible With Sectional Headings

Edidem Anam Esther Akabade Edi Ɔbɔŋ-Aŋwan

1KE ŋkpɔ emi ema ekebe, ke adaŋemi iyaresit edidem Ahasuerus ɔsuhɔde, enye eti Vashti, ye se enye akanamde, ye se ekewetde abaŋa enye.

2Ndien ikɔt edidem emi esaŋade utom enɔ enye, edɔhɔ, ete. Yak eyom nditɔ-iban eke eyede ndise enɔ edidem:

3yak edidem onyuŋ onim mme ndidaha ke kpukpru mme province ubɔŋ esie, man mmɔ etaŋ kpukpru nditɔ-iban eke eyede ndise, ebon ke palace Shushan, ke ufɔk iban, esin ke ubɔk Hegai, eunuch edidem emi ekpemede iban, enyuŋ enɔ se edade enam idem mmɔ esana:

4ndien ŋwan eke edidem edimade eyedi ɔbɔŋ-aŋwan ke ibuot Vashti. Ndien ikɔ oro ɔfɔn edidem ke iso; enye onyuŋ anam ntre.

5Eyen mme Jew kiet odu ke palace Shushan, ndien enyiŋ esie ekere Mordecai, eyen Jair, eyen Shimei, eyen Kish, eyen Ben-jamin;

6emi eketaŋde efep ke Jerusalem ye mbon ntaŋ-mfep oro eketaŋde efep ye Jeconiah edidem Judah, emi Nebuchadnezar edidem Babylon akataŋde efep.

7Ndien enye ɔbɔk Hadassah, emi edide Esther, eyen eyen-ete esiemɔ aŋwan: koro enye minyeneke ete, minyuŋ inyeneke eka; ndien eyen oro ɔfɔn ido, onyuŋ eye iso; ndien adaŋemi ete esie ye eka esie ekpade, Mordecai ada enye onim ke eyen esie aŋwan.

8Edikem adaŋemi ekopde uyo edidem, ye ewuhɔ esie, ediwak nditɔ iban enyuŋ ebonode ke palace Shushan, esine Hegai ke ubɔk, ndien enyuŋ eda Esther esɔk ke ufɔk edidem, ekesin Hegai andikpeme iban ke ubɔk.

9Ndien eyen oro eye enye ke enyin, ndien enye ɔfɔn ido ye eyen oro, onyuŋ awara ɔnɔ enye ŋkpɔ usana idem esie, ye enɔ esie, ye nditɔ-iban itiaba, emi emekde ke ufɔk edidem enɔ enye: ndien enye ɔkpuhɔre enye ye nditɔ-iban esie itie, esin ke ata eti ebiet ufɔk iban.

10Esther ika-isiakke oruk esie, ye emana esie: koro Mordecai eketemede enye, ete okusiak.

11Ndien kpukpru usen Mordecai asaŋa ke iso okure ufɔk iban, man enye ɔfiɔk ifure Esther, ye se edinamde ye enye.

12Ekem adaŋemi ekemde ke ini eke kpukpru nditɔ-iban edukde ke ɔtɔ edidem Ahasuerus, ke mmɔ ema eketie ke ɔfiɔŋ duopeba, nte asaŋade ke ewuhɔ iban: koro ntem ke mmɔ eyɔhɔ mme usen usana idem, eyere aran myrrh ke ɔfiɔŋ itiokiet, ye edifuɔŋ-ŋkpɔ, ye ŋkpɔ usana idem iban, ke ɔfiɔŋ itiokiet:

13ndien eyen-aŋwan oduk ke ɔtɔ edidem, ye ŋkpɔ emi ke ubɔk, kpukpru se enye ɔdɔhɔde ete enɔ imɔ, man ada oto ke ufɔk iban oduk ke ufɔk edidem.

14Ke mbubreyo enye oduk, ndien ke usenubɔk enye afiak ke ufɔk iban eken, oduk ke ubɔk Shaashgaz, eunuch edidem emi ekpemede iban-esa: enye idukke aba ke ɔtɔ edidem, ke mibɔhɔke ke ini edidem ama enye, ndien esiak enye ke enyiŋ.

15Ekem adaŋemi osimde ini Esther eyen Abihail, eyen-ete ete Mordecai, emi akadade enye onim ke eyen esiemɔ, ini eke enye odukde ke ɔtɔ edidem, enye iyomke baba ŋkpɔ kiet, ke mibɔhɔke se Hegai eunuch edidem andikpeme iban asiakde. Ndien kpukpru owo eke ekutde Esther, enyuŋ ema enye.

16Ekem eda Esther eduk ke ɔtɔ edidem Ahasuerus, ke ufɔk ubɔŋ esie, ke ɔyɔhɔ ɔfiɔŋ duop, oro edi ɔfiɔŋ Tebeth, ke ɔyɔhɔ isua ubɔŋ esie itiaba.

17Ndien edidem ama Esther akan kpukpru iban eken; Esther onyuŋ okut mfɔn ye ima ke iso esie, akan kpukpru nditɔ-iban eken; ndien edidem ada anyanya ubɔŋ ayara enye ke ibuot, onyuŋ onim enye ke ɔbɔŋ-aŋwan ke itie Vashti.

18Edidem onyuŋ anam akamba udia ɔnɔ ikpɔ owo esie ye ikɔt esie, kpa akamba udia Esther; onyuŋ ɔnɔ mme province nduɔk-odudu, onyuŋ ɔnɔ enɔ nte ekemde ye ubɔk edidem.

19Ndien adaŋemi nditɔ-iban etɔŋɔde ntak ebono, Mordecai onyuŋ etiede ke inua-otop edidem,

20Esther ikesiakke iman esie, ye oruk esie; kpa nte Mordecai eketemede enye: koro Esther anamde uyo Mordecai, kpa nte ke ini emi enye ɔkɔride ke ufɔk esie.

21Ke ini oro, nte Mordecai etiede ke inua-otop edidem, Bigthan, ye Teresh, eunuch edidem iba, emi etiede usuŋ otop, eyat esit, enyuŋ eyom usuŋ nte edoride edidem Ahasuerus ubɔk.

22Ndien Mordecai edifiɔk ikɔ oro, onyuŋ asian ɔnɔ Esther ɔbɔŋ-aŋwan, ndien Esther etiŋ ɔnɔ edidem esin ke enyiŋ Mordecai.

23Ekem adaŋemi mmɔ edomode ikɔ oro, mmɔ eyarare: mmɔdo eyiride mmɔ mbiba ke eto: enyuŋ ewet enye esin ke ŋwed ikɔ obio ke iso edidem.