JUDGES 2 - Efik Old Bible With Sectional Headings

Angel Jehovah ke Bochim

1EKEM angel Jehovah oto ke Gilgal ɔdɔk ke Bochim, ɔkɔdɔhɔ ete, Ŋkada mbufo ke Egypt ndɔk, ŋkonyuŋ nda mbufo nduk ke isɔŋ emi ŋkɔŋwɔŋɔde nnɔ mme usɔ: ndien ŋkɔdɔhɔ nte, Ndibiatke ediomi mi ye mbufo ke nsinsi;

2mbufo ekunyuŋ ediomi ediomi ye mme andiduŋ isɔŋ emi; mbufo ewuri mme itie-uwa mmɔ. Edi mbufo ikokopke uyo mi: nsinam mbufo enamde emi?

3Mmɔdo ŋkonyuŋ ndɔhɔde nte, Ndisioŋoke mmɔ mfep ke iso mbufo; edi mmɔ eyedi mme asua mbufo, mme abasi mmɔ eyenyuŋ edi mfine ye mbufo.

4Edikem, ke ini angel Jehovah eketiŋde ikɔ emi ɔnɔ kpukpru nditɔ Israel, kpukpru owo emenere uyo mmɔ etua eyet.

5Ndien mmɔ esio ebiet oro enyiŋ Bochim (mme atua eyet): ndien mmɔ ewa uwa do enɔ Jehovah.

6Adaŋemi Joshua akayakde kpukpru owo enyɔŋɔ, kpukpru nditɔ Israel eka ke udeme mmɔ, ekeda isɔŋ enyene.

7Ndien mmɔ enam ŋkpɔ Jehovah ke ofuri eyo Joshua, ye ke ofuri eyo mbiowo oro ebigide uwem ekan Joshua, emi ekekutde kpukpru ikpɔ ŋkpɔ Jehovah, emi enye akanamde ye Israel.

8Ekem Joshua eyen Nun, owo Jehovah, akpa, ke enye ama okosim isua ikie ye duop.

9Ndien mmɔ ebuk enye ke adaŋa udeme esie, ke Timnath-heres, ke obot Ephraim, ke edem edere-edere obot Gaash.

10Ekem ofuri emana oro enyuŋ ebono ye mme ete mmɔ. Ndien emana efen emi mifiɔkke Jehovah, minyuŋ ifiɔkke ŋkpɔ emi enye akanamde ɔnɔ Israel, etiene mmɔ edem edaha eda.

11Ndien nditɔ Israel enam idiɔk ke enyin Jehovah, enyuŋ enam ŋkpɔ Baalim:

12ndien mmɔ ekpɔŋ Jehovah Abasi mme ete mmɔ, emi akadade mmɔ ke isɔŋ Egypt ɔwɔrɔ, enyuŋ etiene abasi efen ke otu mme abasi mme idut emi ekande mmɔ ekuk, enyuŋ enuhɔ enɔ mmɔ, enyuŋ eyat Jehovah esit.

13Ntem ke mmɔ ekpɔŋ Jehovah, enyuŋ enam ŋkpɔ Baal ye Ashtaroth.

14Ndien Jehovah ayat esit ye Israel, ndien emen mmɔ esin ke ubɔk mbon ŋwo eke ebumede mmɔ, onyuŋ anyam mmɔ esin ke ubɔk mme asua mmɔ emi ekande mmɔ ekuk, ndien mmɔ ikwe aba nte edade ke iso mme asua mmɔ.

15Ke kpukpru ebiet emi mmɔ ewɔŋɔde eka, ubɔk Jehovah odoro mmɔ ke idem idiɔk-idiɔk, kpa nte Jehovah ɔkɔdɔhɔde, ye nte Jehovah okonyuŋ ɔŋwɔŋɔde ɔnɔ mmɔ: ndien efik mmɔ eti-eti.

16Edi Jehovah anam mme ebierikpe edaha eda eke enyaŋade mmɔ esio ke ubɔk mmɔ eke efikde mmɔ.

17Ndien mmɔ ikopke uyo idem mme ebierikpe mmɔ, edi eka eketiene abasi efen, enyuŋ etuak ibuot enɔ mmɔ: mmɔ ewara ekabare ekpɔŋ usuŋ emi mme ete mmɔ ekesaŋade ke esit, ke erinim mbet Jehovah; edi mmɔ inamke ntre.

18Ndien adaŋemi Jehovah anamde mme ebierikpe edaha eda ɔnɔ mmɔ, Jehovah odu ye ebierikpe oro, onyuŋ anyaŋa mmɔ osio ke ubɔk mme asua mmɔ, ke ofuri eyo ebierikpe oro: koro mbɔm anamde Jehovah, ke ini mmɔ esemede ebaŋa mmɔ eke etukde mmɔ enyuŋ efikde mmɔ.

19Ndien edikem ke adaŋemi ebierikpe oro akpade, mmɔ etɔŋɔ ntak enam idiɔk ekan mme ete mmɔ, etiene abasi efen enam ŋkpɔ mmɔ, enyuŋ etuak ibuot enɔ mmɔ; mmɔ itreke ido mmɔ ye itun usuŋ mmɔ.

20Ndien Jehovah ayat esit ye Israel, enye onyuŋ ɔdɔhɔ ete, Koro mbio emi ema ekebiat ediomi mi emi ami ŋkowukde mme ete mmɔ, minyuŋ ikopke uyo mi;

21Ami ŋko ndisioŋoke aba owo mme idut emi Joshua akakpade ɔkpɔŋ, ke iso mmɔ mfep:

22man nda mɔ ndomo Israel, mme mmɔ eyekpeme usuŋ Jehovah, enyuŋ esaŋa ke esit, kpa nte mme ete mmɔ ekekpemede, mme idinamke.

23Ndien Jehovah ayak mme idut oro etie, inyuŋ iwarake ndibin mmɔ mfep; enye ikonyuŋ isinke mmɔ ke ubɔk Joshua.