LEVITICUS 22 - Efik Old Bible With Sectional Headings

Mme Enɔ Uwa Enyene Ndidi Edisana

1NDIEN Jehovah ɔdɔhɔ Moses, ete, Dɔhɔ Aaron ye nditɔ esie, ete,

2Ebet ndisana ŋkpɔ nditɔ Israel, emi mmɔ enimde enɔ mi ke ndisana, man ekubiat edisana enyiŋ mi: ami ndi Jehovah.

3Dɔhɔ mmɔ ete, Owo ekededi ke ofuri ubon mbufo, ke emana mbufo, eke edisaŋade ekpere ndisana ŋkpɔ emi nditɔ Israel edidianarede enɔ Jehovah, ke ndek esie odude enye ke idem, yak esibe ukpɔŋ oro efep ke iso mi: ami ndi Jehovah.

4Baba owo kiet ke otu ubon Aaron eke ɔdɔŋɔde akpa-mfia, mme eke ŋkpɔ ɔwɔrɔde enye ke idem, okudia ndisana ŋkpɔ, tutu enye akabare edisana. Ndien ŋko ama edi owo eke otukde ndek okpo ekededi, mme eke owo eke idem eren-owo ɔbɔhɔde enye;

5mme owo eke otukde andinyɔŋi ekededi, eke edisabarede enye, mme otuk owo eke edisabarede enye ke mbubiam esie ekededi;

6ukpɔŋ eke otukde oruk ŋkpɔ oro, eyedehe ndien tutu osim mbubreyo, enye okunyuŋ adia edisana ŋkpɔ, ke enye miyetke idem esie ke mmɔŋ.

7Ndien adaŋemi eyo okutde, edi ndien edisana, yak enye adia ndien edisana ŋkpɔ: koro edide udia esie.

8Enye okuta se ikpade ikpɔŋ, ye se unam awaide, mbak edisabare idem esie ke esit: ami ndi Jehovah.

9Yak mmɔ enim ndien mme ewuhɔ mi, man ekubiom idiɔk-ŋkpɔ ke esit, ekunyuŋ ekpa ebaŋa enye; ami Jehovah nnim mmɔ ke edisana.

10Baba esen owo kiet okudia edisana ŋkpɔ: kuyak owo eke oduŋde ye oku, ye owo eke enɔde enye ŋkpɔ-eyen-utom, adia edisana ŋkpɔ.

11Edi edieke oku adade inyene esie edep owo, yak enye ye emana ke ufɔk esie edia ke esit: yak mme mmɔ emi edia udia esie.

12Ndien ŋko edieke eyen oku aŋwan ɔdɔde esen owo, enye okudia edimenere uwa edisana ŋkpɔ.

13Ama edi eyen oku aŋwan eke ebe esie akpade, mme eke esiode ke ndɔ, eke minyuŋ imanke eyen, onyuŋ afiakde ke ufɔk ete esie, yak enye adia udia ete esie, kpa nte ke ini uyen esie; edi baba esen kiet okudia enye.

14Ndien edieke owo adiade edisana ŋkpɔ ke ndudue, yak enye ɔkɔrɔ ɔyɔhɔ ubak ition ke esit, ndien ada edisana ŋkpɔ oro ɔsɔk oku.

15Ndien mmɔ ekubiat edisana ŋkpɔ nditɔ Israel, emi mmɔ emenerede enɔ Jehovah;

16ekunyuŋ esin mmɔ ebiom ukwaŋ-ŋkpɔ isop, ke ini mmɔ ediade edisana ŋkpɔ mmɔ: koro edi ami Jehovah nnim mmɔ ke edisana.

17Ndien Jehovah ɔdɔhɔ Moses, ete,

18Dɔhɔ Aaron, ye nditɔ esie, ye kpukpru nditɔ Israel, ete mmɔ, Ama edi owo ufɔk Israel ekededi, ye eke isen owo ke Israel, eke edidade enɔ esie edi, edide akaŋa mmɔ ekededi, onyuŋ edide ŋkpɔ ima esit mmɔ ekededi, eke mmɔ edidade enɔ Jehovah ke edifɔp uwa;

19mbufo enam ke ima esit mbufo ke eriwa ayara eke ɔfɔnde ama, edide enaŋ, onyuŋ edide erɔŋ, onyuŋ edide ebot.

20Mbufo ekuwa baba ŋkpɔ kiet eke obiomode ndo: koro midibɔhɔ mbufo ke ubɔk.

21Ndien ke ini owo awade uwa emem ɔnɔ Jehovah ete isio ata akaŋa imɔ, mme uwa ima esit, edide enaŋ, onyuŋ edide eke ŋkpri ufene, yak edi se ifɔnde ima, man ebɔ enye ke ubɔk; baba ndo kiet okudu enye ke idem.

22Edide nnan, onyuŋ edide mbuŋɔ, mme se idade unan, mme se inyuŋ itakde ndɔk, mme mfat, mme edide se idɔŋɔde mkpɔk, mbufo ekuwa mme mmɔ emi enɔ Jehovah, ekunyuŋ eda mmɔ enɔ Jehovah ke uwa ikaŋ ke itie-uwa.

23Edi afo emekeme ndida enaŋ, mme eyen erɔŋ eke edide utibe, ŋwa ke ŋkpɔ ima esit; edi ama edi akaŋa, idibɔhɔ fi.

24Ndien mbufo ekuda se etimde tim, mme se enuakde nuak, mme se esiode sio, mme se ekpide kpi, ewa enɔ Jehovah; ekunyuŋ enam (ŋkpɔ oro) ke isɔŋ mbufo.

25Mbufo ekunyuŋ ebɔ esen owo baba oruk ŋkpɔ emi kiet ke ubɔk, ewa uyo Abasi mbufo: koro mbiara odude ke esit, mmɔ ebiomo ndo: idibɔhɔ mbufo ŋkpɔ oro ke ubɔk.

26Ndien Jehovah ɔdɔhɔ Moses, ete,

27Ke adaŋemi enaŋ mme erɔŋ, mme ebot amanade, yak etie ye eka esie ke usen itiaba; ndien ɔtɔŋɔde ke ɔyɔhɔ usen itiaita, eyebɔ enye ke enɔ ikaŋ Jehovah.

28Mbufo ekunyuŋ ewot enaŋ mme erɔŋ, ye eyen esie ke usen kiet.

29Ndien adaŋemi mbufo ediwade uwa ekɔm Jehovah, ɔfɔn mbufo ewa ke ima esit mbufo.

30Ke suk usen oro ke mbufo edita enye; ekusuhɔ enye tutu eyo esiere: ami ndi Jehovah.

31Mbufo enim ndien mme ewuhɔ mi, enyuŋ enam mmɔ: ami ndi Jehovah.

32Mbufo ekunyuŋ ebiat edisana enyiŋ mi; edi yak enim mi ke edisana ke otu nditɔ Israel: edi ami Jehovah nnim mbufo ke edisana,

33ŋkonyuŋ nsioŋo mbufo ke isɔŋ Egypt mfep, kpaŋ ndi Abasi mbufo. Ami ndi Jehovah.