DANIEL 11 - Efik Old Bible With Sectional Headings

Edidem Edere ye Edidem Usuk

1NDIEN ke akpa isua Darius eyen Media, ami nda ndinam enye ɔsɔŋɔ nnyuŋ nnam enye enyene odudu.

2Ndien ke emi nyesian fi akpanikɔ. Sese, ndidem ita eyedaha ke enyɔŋ kaŋa eda ke Persia; ndien ɔyɔhɔ inaŋ eyenyene akwa inyene akan mmɔ kpukpru: ndien adaŋemi enye ɔsɔŋɔde ke inyene esie, enye eyedemere kpukpru eka ekɔŋ ye edidem Javan.

3Ndien akamba edidem kiet eyeda, onyuŋ ada ubɔŋ ke akwa ubɔŋ, onyuŋ anam kpa nte enye amade.

4Ndien ke ini enye adahade ada, eyesuan ubɔŋ esie, enyuŋ ebahare enye esin ke mme ofum heaven mbinaŋ; ndien enye idinyeneke ubon esie; idinyuŋ ikemke ye ubɔŋ oro enye akadade: koro eyedibere ubɔŋ esie, enyuŋ eda enɔ owo eŋwen eke misaŋake ye mmɔ emi.

5Ndien edidem edem usuk, ye owo kiet emi otode ke mbɔŋ esie eyesɔŋɔ, ndien enye eyesɔŋɔ akan enye, onyuŋ ada ubɔŋ; ubɔŋ esie eyedi akamba ubɔŋ.

6Ndien ekem ke utit mme isua, mmɔ eyebuana ŋkpɔ; adiaha edidem edem usuk eyenyuŋ edi ke ɔtɔ edidem edem edere ndinam emem: ndien enye (adiaha) idisukke inyene odudu ubɔk; enye (edidem usuk) idinyuŋ idaha, ubɔk esie idinyuŋ idaha: ndien eyeyak enye (ŋwan) enɔ, ye mmɔ oro ekedade enye edi, ye andibon enye, ye enye ŋko emi akanamde enye ɔsɔŋɔ ke ini oro.

7Ndien owo kiet emi otode ke ŋkɔk oruŋ aŋwan oro, eyedaha ada ke itie esie, ndien enye eyesaŋa ye mbon-ekɔŋ edi, onyuŋ oduk ke ɔkpɔsɔŋ ebiet edidem edere, onyuŋ anam ŋkpɔ ke otu mmɔ, onyuŋ ɔsɔŋ akan:

8onyuŋ ataŋ mme abasi mmɔ ŋko, ye mbɔŋ mmɔ, ye ŋkpɔ utom mmɔ, kpa silver ye gold, ke mbuot-ekɔŋ ɔnyɔŋ ke Egypt: ndien enye eyedaŋ ndusuk isua akan edidem edem edere.

9Ntem ke edidem edem usuk edidi ke ubɔŋ esie, onyuŋ afiak ke isɔŋ esiemɔ.

10Ndien nditɔ esie eyedemere, enyuŋ ebon ediwak otu mbon-ekɔŋ: ndien owo kiet iditreke ndidi, nnyuŋ nyɔhɔ nte mmɔŋ, nnyuŋ nsaŋa mbe. Ndien enye eyefiak edem, onyuŋ emen idem tutu osim ke ɔkpɔsɔŋ ebiet esie.

11Ndien edidem usuk eyekpaha esit eti-eti, onyuŋ ɔwɔrɔ aka ekɔŋ ye enye, kpa ye edidem edem edere: eyenyuŋ onim akwa otu owo; ndien eyeda otu owo oro esin enye ke ubɔk.

12Ndien otu owo oro eyemenere idem mmɔ ke enyɔŋ, enye eyenyuŋ emenere esit esiemɔ onyuŋ ɔduɔk tɔsin duop, tɔsin duop, edi idisɔŋɔke.

13Ndien edidem edem edere eyefiak okotim akamba otu owo eke okponde akan eke akpa; ndien ke utit ndusuk isua enye iditreke ndida ediwak mbon-ekɔŋ ye ediwak inyene ndi.

14Ndien ke ini oro ediwak owo eyedaha ke enyɔŋ eŋwana ekɔŋ ye edidem edem usuk; ndien mmɔ emi efikde oruk fo eyemenere idem-mmɔ ke enyɔŋ, man enam ŋkukut oro ɔwɔrɔ; ndien mmɔ eyeduɔŋɔ.

15Ndien edidem edem edere eyedi edikubi ibombom, eyenyuŋ ada obio ibibene ekɔŋ: ndien ubɔk edem usuk idisɔŋɔke ida; ndien ama edi mbio emi enye ekemekde, odudu eke mmɔ ekemede ndisɔŋɔ nda ididuhe.

16Ndien enye emi otode edi ekɔŋ ye enye eyenam kpa nte enye amade, baba owo kiet eke edidade enye ke iso idinyuŋ iduhe: ndien enye eyeda ke isɔŋ inemesit, ubɔk esie eyenyuŋ abiat enye.

17Ndien enye eyenim iso esiemɔ, ete ida odudu ofuri ubɔŋ esie iduk, ye ndinen owo ŋko; ntem ke enye edinam: eyenyuŋ eda adiaha iban enɔ enye, man abiat enye; edi enye (adiaha) ididaha ye enye, idinyuŋ iduhe ke edem esie.

18Ndien enye eyekabare iso esie ese mme isuo, onyuŋ ada ediwak; ndien etubom ekɔŋ kiet eyenam esuene esie okure, man esuene esie okutɔŋɔ ntak osim enye.

19Ndien enye eyekabare iso esie ese ɔkpɔsɔŋ ebiet isɔŋ esiemɔ: eyenyuŋ atuak ukot ɔduɔ: ndien idikwe enye.

20Ndien owo eyeda ke itie esie emi ediyakde ɔbɔ-utomo asaŋa ke ediye idut ebe: ndien enye eyesuana ke ini esisit, itoho ke iyaresit, inyuŋ itoho ke ekɔŋ.

21Ndien obukpo owo kiet eyedaha ada ke itie esie, edi idinɔŋɔ enye ubɔŋ itie edidem: ndien enye eyesaŋa suŋ-suŋ edi, onyuŋ ada ubɔŋ ke nnem-inua.

22Ndien ubɔk mmɔŋ ukwɔ emi editode enye ke iso eyefuk, onyuŋ obuŋ mmɔ, ye ɔbɔŋ ediomi ŋko.

23Ndien adaŋemi mmɔ emanade iman ye enye ema, enye eyenam abiaŋa: ndien enye eyedɔk, eyenyuŋ akabare ɔsɔŋɔ oto ke ekpri mbio esisit.

24Enye eyesaŋa suŋ oduk ke ata eti ubak esien ŋko; onyuŋ anam se mme ete esie ekenam minamke, ye mme ete ete esie; enye eyeda mbume ye ŋkpɔ ŋwo ye inyene asuan ɔnɔ mmɔ: eyenyuŋ ekere ekikere esie abaŋa mkpɔsɔŋ ebiet mmɔ, tutu osim ndusuk ini.

25Ndien enye eyedemere odudu esie ye esit esie aŋwana ye edidem edem usuk ke akamba udim mbon-ekɔŋ. Ndien edidem edem usuk eyemen idem ada akwa ye ɔkpɔsɔŋ udim eti-eti aŋwana ekɔŋ; edi enye idikemeke ndisɔŋɔ nda: koro mmɔ eyeduak uduak ebaŋa enye:

26kpa mmɔ emi edidiade udeme udia esie eyesobo enye; ndien mbon-ekɔŋ esie eyefiɔrɔ nte mmɔŋ: ndien ediwak owo eyeduɔŋɔ afai.

27Ndien esit edidem mbiba emi eyeyom ndinam idiɔk; ndien mmɔ etiŋ ikɔ nsu ke okpokoro kiet; edi idikwe unen: koro utit eyesuk odu ke ini emi ekedoride.

28Ndien enye eyeda ediwak inyene afiak ke isɔŋ esie; esit esie eyenyuŋ asua edisana ediomi: ndien enye eyenam (nte aduakde); eyenyuŋ afiak ke isɔŋ esiemɔ.

29Ke ini emi ekedoride enye eyefiak aka edem usuk: edi ukperedem idibietke mbemiso.

30Ndien mme ubom mbakara Kittim eyedi ekɔŋ ye enye: ndien esit eyeduɔ enye, enye eyenyuŋ afiak onyuŋ akpaha esit abaŋa edisana ediomi: ntre ke enye edinam: enye eyefiak onyuŋ onim ibuot esie abaŋa mmɔ emi ekpɔŋde edisana ediomi.

31Ndien ubɔk eyeto enye ke idem edaha eda, enyuŋ esabare edisana ebiet odudu, enyuŋ esio nsinsi uwa efep, enyuŋ enim mbubiam ŋkpɔ eke osobode.

32Ndien enye eyeda nnem-inua abiat mmɔ emi ediɔkde ye ediomi oro. Edi mmɔ eke efiɔkde Abasi mmɔ eyesɔŋ idem enyuŋ enam ŋkpɔ.

33Ndien mbon ɔniɔŋ ke otu mbio-obio eyeteme ediwak owo: ndien mmɔ eyeduɔŋɔ ke ofut, ye ke edem-ikaŋ, ye ke ntaŋ-mfep, ye ke mbume, ediwak usen.

34Ndien adaŋemi mmɔ eduɔŋɔde, eyenɔ mmɔ uŋwam esisit: ndien ediwak owo eyeda nnem-inua eyire ye mmɔ.

35Ndien ndusuk mmɔ emi edide ɔniɔŋ eyeduɔŋɔ, man edomo mmɔ, enyuŋ esio mmɔ ndek ke idem efep, enyuŋ enam mmɔ esana, tutu osim ke utit ini: koro osuk ebetde ini emi ekedoride.

36Ndien edidem eyenam kpa nte enye amade, onyuŋ emenere idem esie ke enyɔŋ, onyuŋ onim idem esie ke akamba akan kpukpru abasi, onyuŋ etiŋ mme utibe ŋkpɔ abaŋa Abasi mme abasi, eyenyuŋ oforo tutu ikpahesit okure ama: koro enye eyenam se ekewukde.

37Enye idinyuŋ ikereke mme abasi mme ete esie, idinyuŋ ikereke se iban emade, ikereke baba abasi kiet: koro enye eyenim idem esie ke akamba akan kpukpru.

38Edi enye eyekpono abasi mkpɔsɔŋ ebiet ke itie esie; onyuŋ ada gold, ye silver, ye ɔsɔŋ-urua itiat, ye ŋkpɔ-uto okpono abasi eke mme ete esie mikɔfiɔkke.

39Ntem ke enye edinam ke ata mkpɔsɔŋ ebiet ye esen abasi kiet, emi enye edidiɔŋɔde edinyuŋ anamde okpon ke ubɔŋ: onyuŋ anam mmɔ ekara ediwak owo, onyuŋ edeme isɔŋ ɔnɔ ke ŋkpɔ eyen-utom.

40Ama ekem ke utit ini, edidem usuk eyenuk enye: edidem edere eyenyuŋ ada chariot, ye mbon horse, ye ubom mbakara ediwak, obumere anam enye nte oyobio; ndien enye eyeduk ke mme idut oro, onyuŋ ofuk mmɔ, onyuŋ asaŋa ebe.

41Enye eyenyuŋ oduk ke edinem isɔŋ, ediwak owo eyeduɔŋɔ: edi mme mmɔ emi eyebɔhɔ enye ke ubɔk, kpa Edom, ye Moab, ye akpan owo nditɔ Ammon.

42Enye eyenyanare ubɔk esie odori mme idut ke idem: ndien isɔŋ Egypt ididige se idibɔhɔde.

43Ndien enye eyedi etubom mme ebiet unim gold ye silver, ye eke kpukpru ŋkpɔ-uto Egypt: nditɔ Lybia ye Ethiopia eyenyuŋ esaŋa ye enye ikpat kiet.

44Ndien etop emi editode ke edem usiaha-utin, ye ke edem edere eyetimere enye; ndien enye eyewɔrɔ ke akwa ifuresit, ete isuan inyuŋ isobo ediwak owo fap.

45Ndien enye eyewuk mme tent ebiet-iduŋ esie ke ufaŋ mme inyaŋ ke ediye ye edisana obot; ndien enye eyesim utit esie, baba owo kiet eke anyaŋade enye iduhe.