1 CHRONICLES 11 - Efik Old Bible With Sectional Headings

David Edi Edidem ke Isrel ye ke Judah

1EKEM ofuri Israel ebono ke ɔtɔ David ke Hebron, ete, Sese, nnyin idi ɔkpɔ fo ye obuk fo.

2Ŋko-ŋko ke ini oko ekebede, kpa ke ini Saul ekedide edidem, edi afo akada Israel ɔwɔrɔ, onyuŋ ada oduk; Jehovah abasi fo okonyuŋ ɔdɔhɔ fi, ete, Afo edibɔk ikɔt mi Israel, afo edinyuŋ edi andikara ikɔt mi Israel.

3Ekem kpukpru mbiowo Israel eka ke ebiet edidem ke Hebron; ndien David anam ediomi ye mmɔ ke Hebron ke iso Jehovah, ndien mmɔ eyet David aran enim ke edidem Israel, ekem ke uyo Jehovah, ke inua Samuel.

4Ekem David ye ofuri Israel eka ke Jerusalem, enye edi Jebus; ndien mme Jebusite, mme andiduŋ isɔŋ, edu do.

5Ndien mme andiduŋ Jebus edɔhɔ David, ete, Afo udukemeke ndiduk mi. Edi David ada ɔkpɔsɔŋ ebiet Zion, emi edide obio David.

6Ndien David ɔdɔhɔ ete, Owo ekededi eke ebemde iso asuan mme Jebusite, eyedi etubom ye ɔbɔŋ. Ndien Joab eyen Zeruiah ebem iso ɔdɔk, ndien enye akabare edi etubom.

7Ndien David oduŋ ke ɔkpɔsɔŋ ebiet oro; mmɔdo esiode enye enyiŋ obio David.

8Enye onyuŋ ɔbɔp obio oro, ɔtɔŋɔde ke Millo akan okuk: Joab onyuŋ ɔdiɔŋ ubak obio emi ɔsuhɔde.

9Ntem ke David ɔdɔdiɔŋ okpon aka iso: koro Jehovah mme udim odude ye enye.

10Ndien mme mmɔ emi edi mme etubom mbon uko oro David ekenyenede, emi esɔŋɔde eda ye enye ke ubɔŋ esie, ye ofuri Israel, enyuŋ enimde enye ke edidem, ekem ke uyo Jehovah oro abaŋade Israel.

11Mme mmɔ emi ŋko edi ibat mbon uko oro David enyenede, Jashobeam, Hachmonite kiet, etubom mme ndidaha; enye ekemen eduat esie asuan owo ikie ita, owot mmɔ ɔtɔ kiet.

12Ndien Eleazar eyen Dodo, Ahohite, edi udiana esie; enye odu ke otu owo uko ita oro.

13Enye odu ye David ke Pasdammim, mme Philistine ekenyuŋ ebono do ndiŋwana ekɔŋ, iŋwaŋ emi barley ɔyɔhɔde ke esit onyuŋ odu do: ndien kpukpru owo efeŋe ke iso mme Philistine.

14Ndien mmɔ etuak eda ke ufɔt iŋwaŋ oro, enyuŋ enyaŋa enye, enyuŋ ewot mme Philistine; ntem ke Jehovah anyaŋa mmɔ akamba erinyaŋa.

15Ekem owo ita ke otu mme ndidaha edip ye duop oro esuhɔre ke akwa itiat etiene David ke aba itiat Adullam: ndien udim mme Philistine ena ke itihere mme Rephaim.

16David onyuŋ odu ke ɔkpɔsɔŋ ebiet, ke ini oro, udim ukpeme mme Philistine enyuŋ edu ke Beth-lehem ke ini oro.

17Ekem itɔŋ asat David, ndien enye ɔdɔhɔ, ete, Owo akpakam okoi mmɔŋ ke obube Beth-lehem, emi odude ke inua-otop, ɔsɔk mi ŋŋwɔŋ!

18Ndien mbita oro esiak usuŋ ke ufɔt mme Philistine, ekekoi mmɔŋ ke obube Beth-lehem, emi odude ke inua-otop, eda edisɔk David: David inyimeke ndiŋwɔŋ enye, edi aŋwaŋa enye ɔnɔ Jehovah.

19Ndien enye ɔdɔhɔ ete, Nsa mi O! Abasi akpan mi ndinam ŋkpɔ emi! Nte ndiŋwɔŋ iyip mme mmɔ emi ye uwem mmɔ? Koro mmɔ ekedade uwem mmɔ eda enye edi: mmɔdo enye minyimeke ndiŋwɔŋ enye. Owo uko ita oro ekenam ŋkpɔ emi.

20Ndien edi Abishai eyen-eka Joab edi etubom mbita oro. Enye ekemen eduat esie, akan owo ikie ita, owot, onyuŋ enyene enyiŋ ke otu mbita oro.

21Enye enyene ukpono akan iba ke otu mbita oro; onyuŋ edi etubom mmɔ: edi isimke mbita oro.

22Benaiah eyen Jehoiada, eyen owo uko emi okponde ese, emi okotode ke Kabzeel; enye owot ata mkpɔsɔŋ owo Moab iba: enye onyuŋ ɔsuhɔre aka okowot lion ke esit obube kiet ke ini snow.

23Enye onyuŋ owot eyen Egypt kiet, ata anyan owo, ibio idomo-okuk ition; ndien eduat, ebiet eto ɔdɔk-ɔfɔŋ, odu eyen Egypt oro ke ubɔk; ndien enye ada eto ɔsuhɔre etiene enye, onyuŋ afabere eyen Egypt oro eduat ke ubɔk, owot enye ke eduat esiemɔ.

24Benaiah eyen Jehoiada akanam ŋkpɔ emi, ndien enyene enyiŋ ke otu mbon uko mbita oro.

25Sese, enye enyene ukpono ke otu edip ye duop oro, edi isimke mbita eken; ndien David onim enye ke etubom mme andikpeme enye.

26Ndien mbon-uko edi Asahel eyen-eka Joab, Elhanan eyen

27Dodo a Beth-lehem, Shammoth

28Harorite, Helez Pelonite, Ira eyen Ikkesh Tekoite, Abiezer

29Anathothite, Sibbecai Hushathite,

30Ilai Ahohite, Maharai Netopha-thite

31Heled eyen Baanah Neto-phathite, Ithai eyen Ribai, emi otode ke Gibeah nditɔ Benjamin,

32Benaiah Pirathonite, Hurai emi otode ke mme ebedeŋ Gaash,

33Abiel Arbathite, Azmaveth Baharumite, Eliahba Shaalbonite,

34nditɔ Hashem Gizonite, Jonathan

35eyen Shage Hararite, Ahiam eyen Sacar Hararite, Eliphal eyen Ur,

36Hepher Mecherathite, Ahijah

37Pelonite, Hezro Carmelite, Naari

38eyen Ezbai, Joel eyen ete Nathan,

39Mibhar eyen Hagri, Zelek Ammonite, Naharai Berothite, andikama ŋkpɔ-ekɔŋ Joab eyen Zeruiah,

40Ira Ithrite, Gareb

41Ithrite, Uriah Hittite, Zabad

42eyen Ahlai, Adina eyen Shiza Reubenite, etubom mme Reubenite kiet, ye owo edip ye duop

43ediana enye, Hanan eyen Maa-chah,

44ye Joshaphat Mithnite, Uzzia Ashterathite, Shama ye Jeiel,

45nditɔ Hotham Aroerite, Jediael eyen Shimri, ye Joha eyen ete esie,

46Tizite, Eliel Mahavite, ye Jeribai, ye Joshaviah, nditɔ El-naam,

47ye Ithmah Moabite, Eliel, ye Obed, ye Jaasiel Mezobaite.