JEREMIAH 7 - Efik Old Bible With Sectional Headings

Jeremiah Ɔnɔ Etop ke Temple Ete: Eneŋede Usuŋ ye Edinam Mbufo

1UYO emi okoto Jehovah edisim Jeremiah, ete, Kada ke inua-otop ufɔk Jehovah,

2nyuŋ kwɔrɔ ikɔ emi do, nyuŋ dɔhɔ, ete, Ekop uyo Jehovah, mbufo ofuri ufɔk Judah, emi ebede inua-otop emi eduk edituak ibuot enɔ Jehovah.

3Ntem ke Jehovah mme udim, Abasi Israel, ɔdɔhɔ, ete, Mbufo ekabare usuŋ mbufo ye ido mbufo enam ɔfɔn, ndien ami nyeyak mbufo eduŋ ke ebiet emi.

4Mbufo ekubuɔt idem ke ikɔ nsu, ete, temple Jehovah, temple Jehovah, temple Jehovah edi mme mmɔ emi.

5Edi mbufo ema etim ekabare usuŋ mbufo ye ido mbufo enam ɔfɔn: ema etim enam se inende ke ufɔt owo ye mbɔhiduŋ esie;

6edieke mbufo mitukke esen owo, ye eyen-akpa, ye ebe-akpa, minyuŋ iduɔkke iyip owo eke miduehe isop ke ebiet emi, minyuŋ ibineke abasi efen, eke ɔdiɔkde ye mbufo:

7ndien nyeyak mbufo edu ke ebiet emi, ke nsinsi-nsinsi ke isɔŋ emi ŋkɔnɔde mme ete mbufo.

8Sese, mbufo ke ebuɔt idem ke ikɔ nsu eke midoroke owo udori.

9Nte mbufo eyip inɔ, ewot owo, enyuŋ esin efibe, enyuŋ etomo Abasi ke nsu, enyuŋ efɔp ŋkpɔ enɔ Baal, enyuŋ etiene abasi efen eke mbufo mikefiɔkke,

10ndien edi edida ke iso mi ke ufɔk emi ekerede enyiŋ mi, enyuŋ edɔhɔ, ete, Nnyin imɔbɔhɔ man inam ofuri mbubiam emi?

11Nte mbufo ese ete ke ufɔk emi ekerede enyiŋ mi amakabare edi obube mbon-afai? Ami ŋko, sese, mma ŋkut enye. Ke edi Jehovah ɔdɔhɔ.

12Mbufo ekam eka ke ebiet mi oro okodude ke Shiloh, emi ŋkayakde enyiŋ mi oduŋ do akpa, enyuŋ ekut se ŋkanamde ye enye, mbaŋa idiɔk ido ikɔt mi Israel.

13Ndien ke emi ke Jehovah ɔdɔhɔ, ete, Koro mbufo enamde kpukpru ŋkpɔ emi, ndien ami ŋkɔdɔhɔ ye mbufo, mbabak ndɔhɔ, ndien mbufo ikopke; ŋkonyuŋ ŋkot mbufo, ndien mbufo iyereke;

14mmɔdo nyenam ye ufɔk emi ekerede enyiŋ mi, emi mbufo ebuɔtde idem ke esit, nyenyuŋ nnam ye ebiet emi ŋkɔnɔde mbufo ye mme ete mbufo, kpa nte ŋkanamde ye Shiloh.

15Nyenyuŋ mmen mbufo ke iso mi nduɔk, kpasuk nte ŋkɔduɔkde kpukpru nditɔ-ete mbufo, kpa ofuri ubon Ephraim.

16Afo kunam ndien mkpe-ubɔk unɔ mbio emi, kunyuŋ umenere eseme ye akam ubaŋa mmɔ, kunyuŋ ukpe mi ubɔk: koro ami mendikopke uyo fo.

17Nte afo ukwe se mmɔ enamde ke mme obio Judah ye ke mme efak Jerusalem?

18Nditɔwɔŋ etaŋ ifia, mme ete enyuŋ ebara ikaŋ, iban enyuŋ ebuen ndom-uyo, man enam mfefere uyo enɔ ɔbɔŋ aŋwan enyɔŋ, enyuŋ enwaŋa ediŋwɔŋ uwa enɔ abasi efen, enyuŋ eyat mi esit. Jehovah ɔdɔhɔ, ete, Nte edi ami ke mmɔ eyat?

19Nte idige idem-mmɔ? ndien oto do mmɔ eda but ke iso.

20Mmɔdo ntem ke Ɔbɔŋ Jehovah ɔdɔhɔ, ete, Sese, ke eŋwaŋa iyaresit mi ye ifuresit mi ke ebiet emi, odoro owo, ye ufene, ye eto ikɔt, ye mbuŋwum iŋwaŋ; ndien enye eyesak, idinyuŋ inimeke.

21Ntem ke Jehovah mme udim Abasi Israel ɔdɔhɔ ete, Mbufo ekɔrɔ edifɔp uwa mbufo ke mme uwa emem mbufo, enyuŋ eta unam.

22Koro mme -ŋkɔdɔhɔke mme ete mbufo, nnyuŋ ŋwukke mmɔ mbaŋa edifɔp uwa ye uwa emem, ke usen oro ŋkosiode mmɔ ke isɔŋ Egypt mfep:

23ibɔhɔke ikɔ emi ke ŋkowuk mmɔ, nte, Mbufo ekop uyo mi, ndien nyedi Abasi mbufo, mbufo eyenyuŋ edi ikɔt mi: ndien mbufo eyesaŋa ke ofuri usuŋ oro ŋkowukde mbufo, man ɔfɔn ye mbufo.

24Ndien mmɔ ikopke, inyuŋ ikpaŋke utɔŋ mmɔ, edi esaŋa ke uduak ye ke itun idiɔk esit mmɔ, enyuŋ efiak edem, ikaha iso.

25Ɔtɔŋɔde ke usen oro mme ete mbufo eketode ke Egypt edi, tutu osim mfin emi, mma nnyuŋ ndɔŋ kpukpru ikɔt mi mme prophet utom ke ɔtɔ mbufo, kpukpru usen mbabak ndɔŋ:

26ndien mmɔ ikopke uyo mi, inyuŋ ikpaŋke utɔŋ mmɔ, edi esɔŋ obot-itɔŋ mmɔ: ediɔk ekan mme ete mmɔ.

27Dɔhɔ mmɔ ndien kpukpru ikɔ emi; edi mmɔ idikokpe uyo fo: nyuŋ fiori kot mmɔ: edi mmɔ idiyereke fi.

28Nyuŋ dɔhɔ mmɔ, ete, Emi edi idut eke mikopke uyo Jehovah Abasi mmɔ, minyuŋ ibɔhɔ item: akpanikɔ omokure, enyuŋ esibe enye ke inua mmɔ efep.

29O Jerusalem, fat idet fo nyuŋ duɔk; nyuŋ menere eseme ke ŋkokoŋo ebiet: koro Jehovah amasua onyuŋ ɔduɔk emana emi enye ayatde esit ye mmɔ.

30Koro nditɔ Judah enamde idiɔk ke enyin mi, Jehovah ɔdɔhɔ: mmɔ emen ŋkpɔ mbubiam mmɔ esin ke ufɔk emi ekerede enyiŋ mi, enyuŋ esabare enye.

31Mmɔ ema enyuŋ ebɔp ŋkokoŋo ebiet o-Topheth emi odude ke itihere eyen Hinnom, enyuŋ efɔp nditɔ-iren mmɔ ye nditɔ-iban mmɔ ke ikaŋ; emi mme -ŋkowukke mmɔ, mikonyuŋ idukke mi ke esit.

32Jehovah ɔdɔhɔ ete, Sese, oro esin mme usen edi, eke enye midikereke aba Topheth, ye itihere eyen Hinnom, edi Itihere Obom: ndien mmɔ eyebuk owo ke Topheth tutu ebiet iduhe aba.

33Ndien ama ekem, mme okpo mbio emi eyekabare edi udia mme inuen enyɔŋ ye eke unam-isɔŋ; baba owo kiet eke ebinde mmɔ efep idinyuŋ iduhe.

34Ndien ami nyenam uyom mbre, ye uyom idara, uyo ɔdɔ-ŋwan, ye uyo ŋwan ndɔ, odop ke mme obio Judah ye ke mme efak Jerusalem: koro isɔŋ eyebiara.