ŊWED JOB 15 - Efik Old Bible With Sectional Headings

Eliphaz Etiŋ Ikɔ ye Job

1NDIEN Eliphaz Temanite ɔbɔrɔ, onyuŋ ɔdɔhɔ, ete,

2Nte enyene-ibuot owo ada ikpikpu ifiɔk ɔbɔrɔ; onyuŋ ada ofum ikɔrabak ɔyɔhɔ ke esit esie?

3Eneni ke ikɔ eke mifɔnke ke baba ŋkpɔ kiet, ye ke uyo eke enye mikemeke ndidori owo udori ke esit?

4Ŋkɔm afo ememen uteŋe Abasi ɔduɔk: onyuŋ ɔsuhɔre akam ke iso Abasi anam ekpri.

5Koro inua fo obukde idiɔk ido fo, afo onyuŋ emek edeme mbon ŋkari.

6Inua fo anam ikpe otip fi, idige ami, kpa mkpɔk-inua fo enyuŋ etiŋ ebaŋa fi.

7Nte afo edi akpa owo eke akamanade? Nte ekebem iso ebot fi ekpɔŋ ikpɔ obot?

8Nte afo omokop ke odu Abasi? onyuŋ ada ifiɔk onim ke idem fo?

9Afo ɔfiɔk nso eke nnyin mifiɔkke? Otim okut nso ŋkpɔ eke miduhe ye nnyin?

10Mbon iwat ye ŋkani iren, emi esɔŋde ekan usɔ, edu ke otu nnyin.

11Nte afo abat ndɔŋesit Abasi ke ekpri akan fi, ye ikɔ eke etiŋde suŋ-suŋ enɔ fi?

12Esit fo ada fi aka mmɔŋ? Enyin fo enyuŋ efumi nso,

13Eke esinde fi akabare esit fo asua Abasi, onyuŋ ayakde oruk ikɔ ntem ɔwɔrɔ ke inua fo?

14Owo edi nso eke enye akpasanade? Owo eke ŋwan amande onyuŋ edi nso eke enye ekpenende?

15Sese, Enye ibuɔtke idem esie ye edisana ikɔt esiemɔ, mme heaven inyuŋ isanake ke enyin esiemɔ:

16Ŋwaŋwa ediso se idehede inyuŋ ibiarade, kpa owo emi ɔŋwɔŋde idiɔk ido nte mmɔŋ!

17Nyeteme fi, kop uyo mi: ndien nyetiŋ ŋkpɔ eke ŋkokutde;

18Eke mme enyene-ibuot owo ekebɔde mme ete mmɔ etiŋ, inyuŋ idipke:

19Emi ekenɔde mmɔ isɔŋ ke idem mmɔ ikpɔŋ, ndien baba esen owo kiet isaŋake ke otu mmɔ ibe:

20Adaŋa ini nte idiɔk owo odude uwem enye okut ukut, ibat isua onyuŋ odibe owo utuk.

21Uyom ndik odu enye ke utɔŋ: ke ini emem ke andisobo edisim enye.

22Enye isehe ke akpanikɔ, ite ke imɔ idito ke ekim inyɔŋ idi, ndien emesio enye enim enɔ ofut.

23Enye ɔyɔrɔ oyom udia, ete, Enye? Ɔmɔfiɔk ete ke usen ekim ekpere imɔ ke ubɔk.

24Ndutuhɔ ye nnaneyin esin enye edikhe: mmɔ ekɔnɔ enye nte edidem eke otimde ŋkpɔ ɔnɔ ekɔŋ.

25Koro enye emenerede ubɔk esie aŋwana ye Abasi, onyuŋ anam uko ye Ata Ɔkpɔsɔŋ;

26Ada ɔkpɔsɔŋ itɔŋ, ada edidobi ekop otu-ekɔŋ esie obumere Enye.

27Koro enye ofukde iso esie ke ikpɔŋ, onyun anam isin esie okpon isek:

28Ndien enye oduŋ obio eke ewurede; oduŋ ufɔk eke baba owo miduŋke, eke ekenimde ete edi ibom-bom.

29Enye idinyeneke inyene, ubɔŋ esie idinyuŋ isɔŋɔke ida, ndien se enye enyenede iditɔtke ke isɔŋ.

30Enye iditoho ke ekim ifiak idi; edemikaŋ anam nsehe esie asat, ibifik inua esie onyuŋ emen enye efep.

31Yak enye okubuɔt idem esie ke idiɔk, eyebiaŋa enye: koro idiɔk eyedi utip esie.

32Ke mika-ikemke ke usen esie, eyesu, ŋkɔk esie idinyuŋ idige awawa.

33Eyekeŋ ŋkim-ŋkim mfri esie nte vine, onyuŋ ɔduɔk ikɔŋ esie nte olive.

34Koro esop mme oburobut owo eyebiara, ikaŋ eyenyuŋ ata mme tent inyene ukanedem.

35Ke eyomo ibak, ke eman idiɔk ido, ndien idibi mmɔ osuk ototim abiaŋa.