MME HEBREW 11 - Efik Old Bible With Sectional Headings

Nso Edi Mbuɔtidem?

1NDIEN mbuɔtidem ɔwɔrɔ ete, nnyin itim ibure ifiɔk ite iyebɔ se nnyin idoride enyin ke esit, inyuŋ itim inim ite se idibede owo ke enyin odudu.

2Oto mbuɔtidem ekebuk eti mbuk ebaŋa mbiowo.

3Oto mbuɔtidem nnyin inim ite, ekeda ikɔ-inua Abasi ebot ererimbot; ntem ke ikadaha mme ŋkpɔ eke ewɔrɔde ewut idem ibot se ekutde ke emi.

4Oto mbuɔtidem Abel ada uwa eke ɔfɔnde akan eke Cain awa ɔnɔ Abasi, emi otode ke esit etiŋ ikɔ edian enye, ete, enye edi edinen owo; Abasi ke Idem Esie edi ntiense abaŋa enɔ esie; ndien oto do enye osuk etetiŋ ikɔ, okposuk edi nte enye ama akakpa.

5Oto mbuɔtidem emen Enoch edɔk ke enyɔŋ, man enye okukut mkpa; owo inyuŋ ikwe enye, sia Abasi ekemende enye ɔnyɔŋ; koro ke ini mimenke enye kaŋa idɔk ekedi ntiense ebaŋa enye ete, enye enem Abasi esit:

6edi ke mbuɔtidem miduhe, owo ikemeke ndinem Abasi esit; koro owo eke asaŋade ekpere Abasi enyene ndinim ete Enye odudu, onyuŋ edi Andinɔ mmɔ emi eyomde Enye utip.

7Oto mbuɔtidem Noah, sia Abasi ɔnɔde enye ntɔt abaŋa se enyin mikwe kaŋa, ke uteŋe Abasi, ɔkɔŋ ubom ndida nnyaŋa ufɔk esie; ndien ke erinam emi enye obiom ererimbot ikpe, onyuŋ akabare edi andinyene edinen ido eke asaŋade ye mbuɔtidem.

8Oto mbuɔtidem Abraham, ke adaŋemi ekotde enye, okop uyo Abasi, ete ɔwɔrɔ aka ke isɔŋ eke enye edidade nte udeme esie enye onyuŋ ɔwɔrɔ aka, ifiɔkke ŋkaŋ eke enye akade.

9Oto mbuɔtidem enye akabare edi oduduŋ ke isɔŋ emi Abasi ɔkɔŋwɔŋɔde ɔnɔ enye, nte owo adaŋ ke isɔŋ eke minyeneke enye; onyuŋ oduŋ ntre ke tent ye Isaac ye Jacob, emi etienede enye edi mme andinyene uŋwɔŋɔ oro:

10koro enye odoride enyin ke Obio eke enyenede nsɔŋɔnda, eke Andibɔp ye Andinam Enye edi Abasi.

11Oto mbuɔtidem kpa Sarah ke idem esie ɔbɔ ukeme ndiyomo, ke ini enye ama ekebe ini uman, koro adade Enye emi ɔkɔŋwɔŋɔde uŋwɔŋɔ ɔnɔ enye ke anam-akpanikɔ:

12mmɔdo ndien ke idem owo kiet, emi etiede nte ukem-ukem ye akpa-mkpa, ediwak nditɔ ewɔŋɔ emana, ewak udim nte ntantafiɔŋ ke ikpa-enyɔŋ, enyuŋ ekak ibat nte ntan mben inyaŋ.

13Mmɔ emi kpukpru ekpaŋa ke mbuɔtidem; mmɔ ibɔhɔ se ekeŋwɔŋɔde enɔ mmɔ, edi eda nsan-nsan ekut, enyuŋ edara mme uŋwɔŋɔ oro, enyuŋ enyime ete mme imɔ idi isen owo ye oduduŋ ke isɔŋ.

14Koro mmɔ emi etiŋde oruk ikɔ emi eneŋere ewut ete, mme imɔ iyom isɔŋ idem mme imɔ.

15Ndien ke akpanikɔ, edieke mmɔ ekpesinde esit ke isɔŋ eke mmɔ eketode ke esit ewɔŋɔ, mmɔ ekpenyene ifet ndifiak nnyɔŋɔ.

16Edi ke emi mmɔ eyom isɔŋ eke ɔfɔnde akan, oro edi, isɔŋ eke odude ke heaven. Mmɔdo inamke Abasi but ndikere Abasi mmɔ; koro Enye ama ebeŋe Obio ɔnɔ mmɔ.

17Oto mbuɔtidem Abraham awa Isaac ke uwa, ke ini Abasi odomode enye ese; ŋkɔm enye, emi ɔkɔbɔde mme uŋwɔŋɔ ke idaresit, ɔmɔŋ ediwa ikpɔŋ-ikpɔŋ eyen esie;

18kpa Abraham, emi eketiŋde enɔ enye ete, Edikot ubon fo ke Isaac:

19sia okonim ete, Abasi ekeme ndisio enye ke otu mme akpa-mkpa nnam enye eset; ndien ke ido ŋke, enye okonyuŋ ɔtɔŋɔ ntak ɔbɔ enye ke mkpa ada.

20Oto mbuɔtidem Isaac ɔdiɔŋ Jacob ye Esau abaŋa se ididide.

21Oto mbuɔtidem Jacob, ke ini enye ɔmɔŋ edikpa, ɔdiɔŋ nditɔ Joseph mbiba; onyuŋ ɔnuhɔ ke ibuot esaŋ esie okpono Abasi.

22Oto mbuɔtidem Joseph, ke ini enye ɔmɔŋ edikpa, etiŋ abaŋa unyɔŋ nditɔ Israel, onyuŋ ɔnɔ uyo abaŋa mme ɔkpɔ esie.

23Oto mbuɔtidem ete ye eka Moses edip enye ke ɔfiɔŋ ita ke ini enye amanade, koro mmɔ ekutde ete enye edi ediye eyen;

24mmɔ inyuŋ ifeheke ewuhɔ edidem. Oto mbuɔtidem Moses, ke ini enye ama okopon, esin ndikere eyen adiaha Pharaoh;

25sia Enye emekde ndibiom ukut ye ikɔt Abasi, akan ndidia inemesit idiɔk-ŋkpɔ ke ekpri ini:

26enye onyuŋ abat esuene Christ nte inyene eke okponde akan ŋkpɔ uto Egypt: koro enye owukde enyin ese utip eke edinɔde enye.

27Oto mbuɔtidem enye ɔwɔrɔ ɔkpɔŋ Egypt, ifeheke iyaresit edidem; koro enye ɔsɔŋɔde ada nte ŋkpɔ eke okutde Enye emi enyin owo mikwe.

28Oto mbuɔtidem enye onim passover ye erisime iyip, mbak andisobo akpan edituk mmɔ.

29Oto mbuɔtidem mmɔ esaŋa ke Ididuot Inyaŋ ebe, nte owo ebe ke edisat isɔŋ; ndien, ke ini mbon Egypt edomode ndinam kpasuk ntre, mmɔ esomo ke mmɔŋ.

30Oto mbuɔtidem ibibene Jericho owure, ke nditɔ Israel ema ekanare enye ekuk usen itiaba.

31Oto mbuɔtidem Rahab, ŋwan akpara oro, etre nditiene mmɔ oro edide mbon ntut-utɔŋ mbuana ke nsobo, sia enye akadade mbon-uyep esin ke ufɔk ke emem.

32Ndien nso ke ndidɔdɔ mbe emi? Koro ini ididuhe ami ndibuk mbuk Gideon, ye Barak, ye Samson, ye Jephthah, ye David, ye Samuel,

33ye mme prophet; emi ekedade mbuɔtidem ekan mme idut, enam edinen ido, ebɔ mme uŋwɔŋɔ, ekibi mme lion inua, enime ide ikaŋ,

34ebɔhɔ iso ofut, ewɔŋɔ ekpɔŋ mmem-idem ekabare ekop idem, ewɔŋɔ edi uko ke ekɔŋ, enyuŋ enam udim-ekɔŋ mme idut efeŋe.

35Iban ebɔ mme akpa-mkpa ke eriset ke mkpa; mmɔ eken ekut ndutuhɔ, inyuŋ inyimeke ndibɔhɔ, man mmɔ ekpenyene eriset ke mkpa eke ɔfɔnde akan.

36Mmɔ efen ekut idomo oto nsahi ye ufen ye ŋkpɔkɔbi ye ufɔk-ŋkpɔkɔbi ŋko;

37etɔŋɔ mmɔ ke itiat, eyɔk mmɔ esibe mbio iba, edomo mmɔ, ewot mmɔ ke efut: mmɔ oro esine ikpa-erɔŋ ye ikpa-ebot eduyo;

38mmɔ enana ŋkpɔ, ekut ukut, ebɔ ndutuhɔ (edi ererimbot idotke mmɔ); mmɔ esaŋa eyo ke desert ye obot, ye obube, ye aba itiat isɔŋ.

39Etiŋ ŋkpɔ etuk kpukpru mmɔ kabaŋa mbuɔtidem mmɔ; edi mmɔ ikɔbɔhɔ se Abasi ɔkɔŋwɔŋɔde ndinɔ mmɔ;

40sia Abasi okonimde se ifɔnde ikan ɔnɔ nnyin; ntem ke ikemeke ndinam mmɔ efɔn ema ke nnyin miduhe.