EZEKIEL 24 - Efik Old Bible With Sectional Headings

Ŋke Eso Emi Etemde

1EKEM uyo Jehovah osim mi ke ɔyɔhɔ isua usukkiet, ke ɔyɔhɔ ɔfiɔŋ duop, ke ɔyɔhɔ usen ɔfiɔŋ duop, ete,

2Eyen owo wet enyiŋ usen ke idem fo, kpa idem mfin emi: edidem Babylon otibi ekɔŋ ye Jerusalem ke kpasuk usen emi.

3Nyuŋ ke ŋke baŋa ufɔk nsɔŋ-ibuot, nyuŋ dɔhɔ baŋa mmɔ, ete, Ntem ke Ɔbɔŋ Jehovah ɔdɔhɔ, ete, Tem eso, tem, nyuŋ ŋwaŋa mmɔŋ sin ke esit:

4taŋ ŋwa esie sin ke esit, kpukpru nti ŋwa, ukot, ye afara; da ata nti ɔkpɔ yɔhɔ ke esit.

5Da ata nti ufene-ŋkpɔ, nyuŋ da mme ɔkpɔ kubi enye otu ke idak, tim tem enye eti-eti, yak enyuŋ esɔbɔ mme ɔkpɔ esie ke esit.

6Mmɔdo ntem ke Ɔbɔŋ Jehovah ɔdɔhɔ ete, Osuk ɔdɔdiɔk ɔnɔ obio iyip, eso emi mbukpeŋ odude enye ke esit, emi mbukpeŋ esie minyuŋ inyimeke ndiwɔrɔ enye ke esit! Sio enye ke ubak ke ubak; mbufo ekusin afia ebaŋa enye.

7Koro iyip esie odude enye ke esit: enye odu ke edisat ikpɔ itiat: enye iduɔkke enye ke isɔŋ, man ntan ofuk enye;

8man ifuresit ɔdɔk, man esio usiene; mmada iyip esie nduɔk ke edisat itiat, man ekufuk enye.

9Mmɔdo ntem ke Ɔbɔŋ Jehovah ɔdɔhɔ, ete, Osuk ɔdɔdiɔk ɔnɔ obio iyip! ami ŋko nyenam ebok ikaŋ okpon.

10Sin ediwak ifia, bara ikaŋ; tem unam ma, nyuŋ tim buak mbuaha: yak enyuŋ efɔp mme ɔkpɔ.

11Ndien da enye ukpɔk tem ke ebok ikaŋ esie, man idem okpoho esie ofiop, onyuŋ ɔfɔbɔ, man ndek esie onyuŋ atara ke esit, man enyuŋ ema mbukpeŋ esie.

12Enam utom ekpa mba, akwa mbukpeŋ esie inyimeke ndiwɔrɔ ke esit; mbukpeŋ esie eyedu ke ikaŋ.

13Oburobut ido odu ke ndek fo: koro nnamde fi edi edisana, ndien afo usanake, idisioho aba fi ndek fo ke idem inam asana, tutu nda ifuresit mi ndori fi ke idem.

14Ami Jehovah ndɔhɔ: enye edi, ami nnyuŋ nnam: ndiyakke, ndinyuŋ nnyeneke mbɔm, ndinyuŋ ntuaha mkpɔfiɔk. Mmɔ eyenam ikpe ye afo nte ekemde ye ido fo, ye se afo akanamde. Emi edi uyo Ɔbɔŋ Jehovah.

15Edikem uyo Jehovah osim mi, ete,

16Eyen owo, sese, ami mmɔŋ mbɔ fi se enyin fo amade, ndisi, ndisi: ndien kuseme, kunyuŋ utua eyet, kunyuŋ uyak mmɔŋ eyet fo ɔsuhɔre.

17Seme ke ndop-uyo, kunam ntuaŋa mme akpa-mkpa; yara ŋkpɔ fo ke ibuot fo, nyuŋ sine ikpa-ukot ke ukot fo, kunyuŋ ufuk mkpɔk-inua, kunyuŋ uta uyo owo.

18Ndien ami ndɔhɔ kpukpru owo ke usenubɔk: ndien ŋwan mi akpa ke mbubreyo; ami nnyuŋ nnam ke usenubɔk kpa nte ekewukde mi.

19Ndien kpukpru owo edɔhɔ mi, ete, Nte afo usianke nnyin nte nnyin isaŋade ke ŋkpɔ emi, eke esinde fi anam ntre?

20Ndien ami ndɔhɔ mmɔ, nte, uyo Jehovah osim mi, ete, Dɔhɔ ufɔk Israel, ete,

21Ntem ke Ɔbɔŋ Jehovah ɔdɔhɔ ete, Sese, ami, mmɔŋ mbiat edisana ebiet mi, ubɔŋ odudu mbufo, ŋkpɔ emi enyin mbufo emade, ye se ukpɔŋ mbufo enyenede mbɔm ke esit: ndien nditɔ-iren mbufo ye nditɔ mbufo iban emi mbufo ekpɔŋde eye-duɔŋɔ ke ofut.

22Ndien mbufo eyenam kpasuk nte ami nnamde: ekufuk ntaŋ-ebek, ekunyuŋ eta uyo owo.

23Enyuŋ eyara ŋkpɔ mbufo ke ibuot, enyuŋ esine ikpa-ukot mbufo ke ukot mbufo: ekuseme, ekunyuŋ etua eyet; ndien mbufo eyeyemere ke mme idiɔk ido mbufo, enyuŋ eseme kiet ye kiet.

24Ntem ke Ezekiel edi ŋkpɔ idiɔŋɔ mbufo: mbufo enam kpukpru se enye akanamde: ndien adaŋemi ŋkpɔ emi edisude, mbufo eyefiɔk, ete ke ami ndi Ɔbɔŋ Jehovah.

25Ndien afo, eyen owo, nte idisuhe ke usen emi mbɔde mmɔ odudu mmɔ, uyai mmɔ emi enemde mmɔ esit, ye se enyin mmɔ emade, ye se idɔŋde mmɔ esit, nditɔ-iren mmɔ ye nditɔ mmɔ iban?

26Ke usen oro owo eke ɔbɔhɔde eyetiene fi, man anam fi okop ke utɔŋ.

27Ke usen oro inua fo eyetara ɔnɔ owo eke ɔbɔhɔde, ndien afo eyedɔhɔ ikɔ, udunyuŋ udige aba imum: edi afo eyedi ŋkpɔ ndyɔ ye mmɔ; ndien mmɔ eyefiɔk ete ke ami ndi Jehovah.