NEHEMIAH 6 - Efik Old Bible With Sectional Headings

Mme Asua Eduak Idiɔk Uduak Ebaŋa Nehemiah ye Utom Esie

1EDIKEM adaŋemi Sanballat, ye Tobiah, ye Geshem Arabian, ye mme asua nnyin efen, ekopde ete ke mmɔbɔp ibibene, ke ŋwure inyuŋ isuhɔke ke esit; (okposuk edi nte mme ŋkaŋkɔŋke itim ke inua-otop ke ini oro).

2Ndien Sanballat ye Geshem edɔŋ edidɔhɔ mi ete, Di, nnyin isop idem ɔtɔ kiet ke obio ke itihere Ono. Edi mmɔ eduak ndinam mi idiɔk-ŋkpɔ.

3Ndien ndɔŋ mme isuŋutom ke etɔ mmɔ, nte, Ami mmɔŋ nnam akamba utom, ndien ŋkwe nte nsuhɔrede: utom edinam didie odop, adaŋemi ami ŋkpɔŋde enye nsuhɔre ntiene mbufo?

4Ndien mmɔ edɔŋ owo utom ikanaŋ ke ɔtɔ mi, edidɔhɔ ikɔ emi: ndien ami nnyuŋ mbɔrɔ mmɔ ntem.

5Ekem Sanballat ɔdɔŋ owo esie utom ikotion ke ɔtɔ, mi edidɔhɔ suk ikɔ emi, akama ŋwed ana iŋwaŋ ke ubɔk esie;

6ekewet ke esit, ete, Ke ekop ke otu mme idut, Gashmu onyuŋ ɔdɔhɔ, ete ke afo ye mme Jew ekere ndisɔŋ ibuot: oro esin afo ɔbɔp ibibene, afo onyuŋ akabare edi edidem mmɔ, kpa nte mme ikɔ emi esaŋade.

7Ndien ŋko afo omonim prophet, ete ekwɔrɔ ebaŋa fi ke Jerusalem, ete ke edidem mmɔdo ke Judah: ndien ke emi ke editiŋ enɔ edidem, nte ikɔ emi asaŋade. Yak nnyin isop idem ɔtɔ kiet, ndien ikere se ikpanamde.

8Ndien ami ndɔŋ utom ke ɔtɔ esie, nte “Ikemke ke ikɔ emi afo ɔdɔhɔde, edi afo otibi mmɔ ke esit fo.”

9Koro kpukpru mmɔ enamde nnyin idikhe, ete, “Ubɔk eyemem mmɔ ke utom, man ekunam enye.” Sɔŋ mi ubɔk, ndien, O Abasi.

10Ndien ami nduk ke ufɔk She-maiah eyen Dalaiah, eyen Mehe-tabel, emi ɔkukhɔde; ndien enye ɔdɔhɔ, ete, Yak nnyin isop ke ufɔk Abasi, ke esit temple, inyuŋ isin usuŋ temple: koro mmɔ edidide ndiwot fi; kpa ke okoneyo ke mmɔ edidi ediwot fi.

11Ndien ndɔhɔ, Nte owo ntem nte ami ekpefehe? Ndien anie owo ntem nte ami okpoduk ke temple man odu uwem? Ndukke.

12Ndien, sese, ŋkut nte ke idige Abasi ɔdɔŋ enye utom; edi enye eketiŋ prophecy emi abaŋa mi: koro Tobiah ye Sanballat ekenɔde enye ŋkpɔ.

13Mmɔdo ekenɔde enye ŋkpɔ, man ami ndikhe, nnyuŋ nnam ntem, nnyuŋ ndue, man edi idiɔk etop ye mmɔ, man mmɔ esuene mi.

14O Abasi, ti Tobiah ye Sanballat, kpa nte ŋkpɔ emi mmɔ enamde esaŋade, nyuŋ ti Noadiah prophet aŋwan, ye mme prophet efen emi esinde mi ndik.

15Ekem mmɔ ema ibibene ke ɔyɔhɔ usen Elul edip ye duop, ke Usen aba ye duopeba.

16Edikem adaŋemi kpukpru mme asua nnyin ekopde, adaŋemi kpukpru mme idut eke ekande nnyin ekuk ekutde ŋko, mmɔ esuhɔre eti-eti ke enyin idem mmɔ; ndien mmɔ efiɔk ete ke edi Abasi nnyin esin enam utom emi.

17Ke mme usen oro ŋko mbɔŋ Judah enɔ ediwak ŋwed esɔk Tobiah, ndien eke Tobiah enyuŋ esim mmɔ.

18Koro ediwak owo ke Judah ekeŋwɔŋɔde uŋwɔŋɔ enɔ enye, koro enye edide ukot Shecaniah eyen Arah: ndien Jehohanan eyen esie okonyuŋ ɔdɔ eyen Meshullam eyen Berechiah.

19Ndien mmɔ enyuŋ etiŋ nti ido esie ke iso mi, enyuŋ emen uyo mi etiŋ enɔ enye ŋko. Tobiah ɔnɔ ŋwed esɔk mi, ete esin mi ndik.