MATTHEW 23 - Efik Old Bible With Sectional Headings

Jesus Oduri Mbet Esie Utɔŋ Abaŋa Edu Uwem Mme Pharisee ye Mme Ekpep Mbet(Mk 12.38-40; Lk 11.37-54; 20.45-47)

1EKEM Jesus etiŋ ɔnɔ mme otu owo ye mbet Esie, ete,

2mme scribe ye mme Pharisee etie ke itie Moses:

3mmɔdo mbufo enam enyuŋ enim kpukpru ŋkpɔ eke mmɔ etemede mbufo: edi ekunam nte mmɔ enamde; koro mmɔ edɔhɔ, edi inamke nam.

4Mmɔ ebɔp ndidobi mbiomo eke esɔŋde ndibiom, edori owo ke afara: edi mmɔ ke idemmɔ inyimeke ndida nnuenubɔk ntuk mmɔ.

5Edi mmɔ enam kpukpru mme utom mmɔ man owo ekut: koro mmɔ enam mme phylactery mmɔ eŋwaŋa, enyuŋ enam nyeriye ɔfɔŋ-idem mmɔ ekpon,

6enyuŋ ema itie-ukpono ke udia,

7ye ikpɔ itie ke mme synagogue, ye ekɔm ke aŋwa-urua: enyuŋ ema owo ekot mmɔ, ete,

8Rabbi (Andikpep mi). Edi ekuyak ekot mbufo, ete, Rabbi: koro Kiet edi Andikpep mbufo, kpukpru mbufo enyuŋ edi nditɔ-ete.

9Ekunyuŋ ekot ndomo owo kiet ke isɔŋ, ete, Ete; koro Kiet edi Ete mbufo, kpa Enye emi odude ke heaven.

10Ekunyuŋ eyak ekot mbufo, ete, Mbɔŋ; koro Kiet edi Ɔbɔŋ mbufo, kpa Christ.

11Edi enye emi okponde akan ke otu mbufo edidi asaŋutom mbufo.

12Edi owo ekededi eke edimenerede idem, eyesuhɔre enye enim; edi owo ekededi eke edisuhɔrede idem, eyemenere enye.

13 Edi eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo eberi Obio Ubɔŋ heaven ebaha owo: koro mbufo idukke ke idem mbufo, inyuŋ iyakke mmɔ emi eyomde ndiduk ebe eduk.

14Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo ekade ufɔk mme ebekpa, enyuŋ ebɔŋde akam ke abiaŋa; mmɔdo mbufo eyebɔ ufen eke okponde akan.

15 Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo ekanarede inyaŋ ye obot, ete inam kpa owo kiet okpono Abasi ke ido mbufo; ndien ke enye ama akabare etie ntem, mbufo enam enye edi eyen hell utim ikaba akan idem mbufo.

16 Eyedɔdiɔk ɔnɔ mbufo, mme eteme-usuŋ eke edide nnan, emi edɔhɔde ete, Owo ama ɔŋwɔŋɔ uŋwɔŋɔ ke enyiŋ temple, oro idige ŋkpɔ; edi owo ama ɔŋwɔŋɔ uŋwɔŋɔ ke enyiŋ gold eke temple, enye edi akama-isɔn.

17Mbufo ndisime ye nnan; koro ewe okpon akan, mme edi gold, mme edi temple emi anamde gold edi ibet?

18Ŋko-ŋko, owo ama ɔŋwɔŋɔ ke enyiŋ itie-uwa, oro idige ŋkpɔ, edi owo ama ɔŋwɔŋɔ ke enyiŋ enɔ eke odorode ke esit, enye edi akama-isɔn.

19Mbufo mme nnan: koro ewe okpon akan mme edi enɔ, mme edi itie-uwa emi anamde enɔ edi ibet?

20Owo eke ɔŋwɔŋɔde ndien ke enyiŋ itie-uwa ada uŋwŋɔ ke enyiŋ itie oro ye kpukpru se idorode do.

21Owo eke onyuŋ ɔŋwɔŋɔde ke enyiŋ temple ada uŋwɔŋɔ ke enyiŋ ɔtɔ oro, ye Enye emi oduŋde kesit.

22Owo eke onyuŋ ɔŋwɔŋɔde ke enyiŋ heaven ada uŋwɔŋɔ ke enyiŋ ebekpo Abasi, ye Enye emi etiede do.

23 Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo esiode ubak ikɔŋ ye mfri ye mkpasip kiet ke itie duop enɔ Abasi, enyuŋ etrede ndinam ikpɔ ŋkpɔ ibet, ikpe, ye mbɔm, ye mbuɔtidem.

24Edi mbufo ekpanam mme ŋkpɔ emi, ikponyuŋ itreke ndinam mmɔ eken. Mbufo nnan mme eteme-usuŋ, emi eduhɔrede nsuŋ esio, enyuŋ emen camel.

25 Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo eyetde edem cup ye usan asana, edi esit mmɔ eyɔhɔ ye uŋwo ye unana ufat ke idem.

26Afo nnan Pharisee, bem iso yet esit cup ye usan asana, man edem esie onyuŋ akabare asana ŋko.

27 Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo ebietde udi eke eyetde ndom, eke eyede ndise edem-edem, edi ke esit-esit eyɔhɔde ye mme okpo mme akpa-mkpa ye kpukpru ndek.

28Kpa ntre ke mbufo ewut idem edem-edem nte ndinen owo, edi ke esit-esit mbufo eyɔhɔ ye mbubik ye ukwaŋido.

29 Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo ebotde udi mme prophet, enyuŋ ediɔŋde udi nti owo;

30enyuŋ edɔhɔde ete, Edieke nnyin ikpodude ke mme usen mme ete nnyin, nnyin ikpetieneke mmɔ ibuana ke iyip mme prophet.

31Mmɔdo mbufo edi ntiense edian idem mbufo, ete mme imɔ idi nditɔ mmɔ emi ekowotde mme prophet.

32Mbufo enyuŋ enam idomo idiɔk-ŋkpɔ mme ete mbufo ɔyɔhɔ ndien.

33Mbufo mme urukikɔt, mbufo nditɔ ibɔm, edisaŋa didie ebɔhɔ ikpe hell?

34Mmɔdo sese, Ami mmosio mme prophet ye mme ɔfiɔk-ŋkpɔ owo ye mme scribe ndɔŋ ke ɔtɔ mbufo; mbufo eyewot, enyuŋ ekɔŋ ndusuk mmɔ ke cross; mbufo eyenyuŋ emia ndusuk mmɔ ke synagogue mbufo, enyuŋ ekɔbɔ ebine mmɔ ke obio ke obio:

35man ofuri edinen iyip emi eduɔkde ke isɔŋ ɔkpɔkɔbɔ mbufo, ɔtɔŋɔde ke iyip edinen Abel, tutu osim iyip Zachariah, eyen Barachiah, emi mbufo ekowotde ke ufaŋ emi odude ke ufɔt temple ye itie-uwa.

36Ke akpanikɔ ke ndɔhɔ mbufo, kpukpru ŋkpɔ emi eyesim emana emi.

37 O Jerusalem, Jerusalem, emi owotde mme prophet, onyuŋ ɔtɔŋɔde mmɔ eke edɔŋde etiene fi ke itiat. Adaŋa ediwak ini didie ke ŋkoyom ndibon nditɔ fo ɔtɔ kiet, kpa nte unen obonde nditɔ esie ke idak mba esie, ndien mbufo ikonyimeke.

38Sese, eyak ufɔk mbufo ekpɔŋ enɔ mbufo nte ndon.

39Koro ndɔhɔ mbufo nte, Mbufo idikwe Mi aba, tutu mbufo edɔhɔ ete,

Itoro enyene Enye emi edide ke enyiŋ Jehovah.