1MBUFO ekabare ekpebe mi kpa nte ami ŋkpebede Christ.
2Edi mmotoro mbufo ke emi mbufo etide mi ke kpukpru ŋkpɔ, enyuŋ esɔŋɔde emum mme item mi ekama, kpa nte ŋkayakde mmɔ nnɔ mbufo.
3Edi nyom mbufo ediɔŋɔ ete Christ edi Ibuot ɔnɔ kpukpru irenowo; erenowo onyuŋ edi ibuot ɔnɔ ŋwan; Abasi onyuŋ edi Ibuot ɔnɔ Christ.
4Kpukpru erenowo, eke ayarade ŋkpɔ ke ibuot ɔbɔŋ akam onyuŋ ɔkwɔrɔ ikɔ, esuene Enye emi edide Ibuot ɔnɔ enye.
5Kpukpru ŋwan, eke ɔbɔŋde akam onyuŋ ɔkwɔrɔde ikɔ ye ibuot iŋwaŋ, esuene enye emi edide ibuot ɔnɔ enye; koro oro etiede ukem-ukem nte enye okpokporode idet.
6Edieke ŋwan mifuhɔke ŋkpɔ ke ibuot, yak enye afat idet ɔkɔrɔ do. Edi edieke edide ŋkpɔ but ye ŋwan ndifat me ndikporo idet, yak enye ɔfuhɔ ŋkpɔ ke ibuot.
7Erenowo ikpɔfuhɔke ŋkpɔ ke ibuot, sia enye edide mbiet ye ubɔŋ Abasi; edi ŋwan edi ubɔŋ erenowo.
8Koro ikosioho erenowo ke idem ŋwan, edi esio ŋwan ke idem erenowo;
9ikonyuŋ ibotke erenowo inɔ ŋwan edi ebot ŋwan enɔ erenowo.
10Ke ntak emi ŋwan ekpenyene ndiyara idiɔŋɔ erikara ke ibuot, kabaŋa mme angel.
11Edi ke Ɔbɔŋ, ŋwan iduhe ke erenowo miduhe, erenowo inyuŋ iduhe ke ŋwan mi duhe.
12Koro kpa nte ŋwan okotode ke erenowo, ntre ke erenowo oto ŋwan amana; edi kpukpru ŋkpɔ eto Abasi.
13Ese ke idem mbufo; nte odot ŋwan ndibɔŋ akam nnɔ Abasi ye ibuot iŋwaŋ ntre?
14Nte kpa idem ibuot mbufo ikpepke mbufo ite edi ŋkpɔ but ɔnɔ erenowo ndinyene anyan idet?
15Edi edieke ŋwan enyenede anyan idet, edi ubɔŋ ɔnɔ enye; koro enɔ enye idet esie nte ufuhɔ-ŋkpɔ.
16Edi ke owo ekededi osuk eyirede ndineni ŋkpɔ emi, nnyin inyeneke oruk ido oro, mme ufɔk Abasi inyuŋ inyeneke.
17Edi ke erinɔ mbufo item, emi, ntoroke mbufo, koro eribono eke mbufo ebonode ɔtɔ kiet miwɔrɔke mbufo ufɔn, edi akam ɔwɔrɔ mbufo idiɔk.
18Ke akpa itie, ke adaŋemi mbufo edide edibono ke ufɔk Abasi, ŋkop nte ubahare ke edodu ke otu mbufo; ŋkɔm nnim oro ke akpanikɔ.
19Koro eribahare nda ŋka-ŋka enyene ndidu ke otu mbufo, man eyarare efiɔk mmɔ emi edide ata ikɔt Abasi ke otu mbufo.
20Ke ntak emi, ke ini mbufo esopde idem ɔtɔ kiet, mbufo ikemeke ndidia Udia Ɔbɔŋ.
21Koro ke eridia ntem, edi udia mbubreyo esiemɔ ke owo kiet kiet edibem iso adia: ndien owo kiet etie biɔŋ, enye eken ɔŋwɔŋ ɔyuhɔ.
22Mme nte mbufo inyeneke ufɔk eke etiede ke esit edia enyuŋ eŋwɔŋ ŋkpɔ? mme nte mbufo esin ufɔk Abasi ke ndek, enyuŋ esuene mmɔ emi edide ubuene? nso ke ŋkpetetiŋ ye mbufo? Nte nditoro mbufo ke ŋkpɔ emi? Ntoroke mbufo.
23Koro ŋkɔbɔde ke ubɔk Ɔbɔŋ se ŋkonyuŋ nyakde nnɔ mbufo, nte, ke okoneyo oro edade Enye enɔ,
24Ɔbɔŋ Jesus emen uyo; ndien ke Enye ama ɔkɔnɔ Abasi ekɔm, Enye obuŋ uyo, onyuŋ ɔdɔhɔ ete, Ebɔ, eta; emi edi ikpɔhidem Mi ɔnɔ mbufo; enam emi nditi Mi.
25Kpa ntre ŋko ke Enye emen cup, ke ema ekedia ŋkpɔ ema, ete, Cup emi edi obufa ediomi ke iyip Mi; enam emi, adaŋa ini nte eŋwɔŋwɔŋ, ke eriti Mi.
26Koro adaŋa ini nte edadia uyo emi enyuŋ eŋwɔŋ cup emi, mbufo ekwɔrɔ mkpa ɔbɔŋ tutu Enye edi.
27Mmɔdo owo ekededi eke edidiade uyo Ɔbɔŋ edinyuŋ ɔŋwɔŋde cup Ɔbɔŋ ke usuŋ eke midotke, eyenyene isop abaŋa ikpɔhidem ye iyip Ɔbɔŋ.
28Edi yak owo odomo idem esie ɔfiɔk, onyuŋ adia uyo, onyuŋ ɔŋwɔŋ cup ntre;
29koro owo eke adiade onyuŋ ɔŋwɔŋde, ke enye midiɔŋɔke ikpɔhidem, ke adia onyuŋ ɔŋwɔŋ ubiom-ikpe odoro idem esie.
30Ke ntak emi ediwak owo ke otu mbufo ekop mmem-idem enyuŋ eduk udɔŋɔ, ediwak enyuŋ edede.
31Edi edieke nnyin ikpɔduŋɔrede idem nnyin ise, Abasi ikpekpehe ikpe ye nnyin.
32Edi ke ini Ɔbɔŋ ekpede ikpe ye nnyin, Enye ɔtunɔ nnyin, mbak edibiom nnyin ikpe ye ererimbot.
33Ntre nditɔ-ete, ke adaŋemi mbufo ebonode ɔtɔ kiet ndidia udia, etie ebet kiet eken.
34Edieke biɔŋ ɔdɔŋde owo, yak enye adia ŋkpɔ ke ufɔk; man eribono eke mbufo ebonode ɔtɔ kiet okudi se idiwɔrɔde ubiom-ikpe inɔ mbufo. Nyeneŋere mme ŋkpɔ eken nnim ke adaŋemi ndidide do.
Who We AreWhat We EelieveWhat We Do
2025 by iamachristian.org,Inc All rights reserved.
