1UWEM mi efek ukpɔŋ mi, nyeyak idem mi nnɔ eseme mi; nyedɔhɔ ikɔ ke iyaresit mi.
2Nyedɔhɔ Abasi, nte, Kunam ikpe obiom mi; sian mi se afo ɔtɔhɔde ye ami abaŋa.
3Nte ɔfɔn fi ndifik, nnyuŋ mmen utom ubɔk fo nduɔk, nnyuŋ ŋwaŋa uduak mme idiɔk owo?
4Nte afo emenyene enyin obukidem?
5Nte afo okut ŋkpɔ nte owo okutde? Nte mme usen fo etie nte mme usen owo? Nte isua fo ebiet usen owo?
6Koro afo oyomde idiɔk ido mi onyuŋ ɔduŋɔde ukwaŋ-ŋkpɔ mi?
7Okposuk edi nte afo ɔfiɔkde ete ke nnyeneke se nduede, baba owo kiet eke osiode ke ubɔk fo inyuŋ iduhe.
8Edi ubɔk fo okotim obot mi, onyuŋ anam ofuri idem mi akan okuk; ndien afo oyom ndisobo mi.
9Mbɔk, ti ete ke afo akanam mi nte mbat-eso, ndien ɔmɔŋ anam mi mfiak ke ntan!
10Nte afo ukaŋwaŋake mi nte mmɔŋ-eba, unyuŋ unam mi mbari nte edibari mmɔŋeba?
11Unyuŋ usine mi ikpɔk ye obuk? unyuŋ uda ɔkpɔ ye osip udɔk mi?
12Afo amada uwem ye ima ɔfɔn mi, ntim-ŋkama fo onyuŋ ekpeme ibifik mi.
13Edi afo omodip ŋkpɔ emi ke esit fo: mmɔfiɔk nte ke (uduak) emi odu ye afo.
14Ŋkpedue, afo ekpekpeme mi, ukponyuŋ uyakke mi mbɔhɔ ufen mi.
15Ŋkpanam idiɔk, ɔdɔdiɔk ɔnɔ mi: ŋkponyuŋ nnen, ŋkpekemeke ndimenere ibuot mi: koro esuene ɔyɔhɔde mi, nnyuŋ ŋkut ukut mi.
16Ŋkpemenere enye, afo ekpebine mi nte lion, okponyuŋ ɔtɔŋɔ ntak ada mme utibe ŋkpɔ fo etiene mi.
17Afo okpokot ntiense fo edi ke iso mi, okponyuŋ ɔdɔdiɔŋ ayat esit ye ami aka iso; udim etiene udim eyom mi.
18Anam didie, ndien, afo okosio mi ke itie-eyen? Ŋkpakpa, enyin ikponyuŋ ikwe mi.
19Ŋkpetie kpa nte ŋkpɔ eke mmenduhe, ekpesio mi ke idibi ebiom eka udi.
20Nte mme usen mi idige esisit? Yak Enye etre; yak Enye ɔkpɔŋ mi, man ŋŋwaŋa iso mi esisit;
21Ke mme ŋkaŋkaha kaŋa ke ɔtɔ eke mmendifiakke, ke isɔŋ ekim ye eke mfut mkpa,
22Ke isɔŋ emi okimde ɔkpɔsɔŋ ekim; eke mfut mkpa ye ndutime; emi uwemeyo etiede nte ekim.
Who We AreWhat We EelieveWhat We Do
2025 by iamachristian.org,Inc All rights reserved.