JEREMIAH 30 - Efik Old Bible With Sectional Headings

Abasi Ɔŋwɔŋɔ Nditaŋ Ikɔt Esie Nsio ke Ntaŋ Mfep

1UYO emi okoto Jehovah osim Jeremiah, ete, ntem ke Jehovah Abasi Israel ɔdɔhɔ, ete,

2afo ke idem fo da ŋwed wet kpukpru ikɔ emi ndɔhɔde fi.

3Koro, sese, ini ke edi, Jehovah ɔdɔhɔ, ndien nyeda ikɔt mi Israel ye Judah emi eketaŋde efep mfiak ndi, Jehovah ɔdɔhɔ: nyenyuŋ nda mmɔ nnyɔŋ ndi ke isɔŋ emi ŋkɔnɔde mme ete mmɔ, ndien mmɔ eyeda enye enyene.

4Ndien mme mmɔ emi edi ikɔ oro Jehovah ɔkɔdɔhɔde Israel ye Judah, ete,

5Koro ntem ke Jehovah ɔdɔhɔ, ete, Nnyin ikop uyo unyek idem, ye eke ndik, emem inyuŋ iduhe.

6Mbufo ebup ndien, enyuŋ ese, mme eren owo aman eyen? Nnam didie ŋkut kpukpru mbon uko nte etɔde ubɔk ke isin, ebiet aŋwan uman, kpukpru iso enyuŋ ekabare akpai?

7Mbɔm, mbɔm, koro usen oro okponde! ndien baba kiet eke ebietde enye inyuŋ iduhe: enye onyuŋ edi ini ukut Jacob; edi eyenyaŋa enye esio ke esit.

8Jehovah mme udim onyuŋ ɔdɔhɔ, ete, Ama ekem ke usen oro, nyebuŋ fi ɔkpɔnɔ esie ke itɔŋ mfep, nnyuŋ ŋkibi fi uruk ke idem, ndien isen owo idinimke aba enye ke ofin.

9Ndien mmɔ eyenam ŋkpɔ Jehovah Abasi mmɔ, ye eke David edidem mmɔ emi ndimenerede nnim nnɔ mmɔ.

10Jehovah onyuŋ ɔdɔhɔ, ete, Afo owo mi Jacob, kufehe ndik; Israel, kunyuŋ ukpa idem: koro sese, ami nyenyaŋa fi nsio ke anyan idut, nnyuŋ nsio ubon fo ke isɔŋ oro etaŋde mmɔ eka; ndien Jacob eyefiak, onyuŋ etie suŋ ke ifure, baba owo kiet idinyuŋ inamke enye edikhe.

11Koro ami ndude ye afo, nte nnyaŋa fi. Jehovah ɔdɔhɔ: koro nyenam kpukpru mme idut eke ŋkasuande fi do etak, edi ndinamke fi atak: edi nyetunɔ fi nte enende, ndien ndiyakke fi ɔbɔhɔ ikpikpu.

12Koro ntem ke Jehovah ɔdɔhɔ, ete, Inyeneke nte ekɔkde unan fo, ufen fo ɔmɔdiɔk akan.

13Baba owo kiet eke ebierede ikɔ fo iduhe, man efuk fi unan: ama edi ibɔk, idianke fi baba.

14Kpukpru mme ufan fo emefre fi; mmɔ iyomke fi; koro ŋkamiade fi ufen usua, ye ata ɔkpɔsɔŋ ntunɔ: koro mme idiɔk ido fo ewakde; mme ukwaŋ ŋkpɔ fo enyuŋ ekɔride.

15Nsinam afo atuade abaŋa unan fo? Ubiak fo ɔmɔdiɔk akan: koro mme idiɔk ido fo ewakde, mme ukwaŋ-ŋkpɔ fo enyuŋ ekɔride, ami nnam fi ŋkpɔ emi.

16Mmɔdo eyedia kpukpru mmɔ eke ediade fi; kpukpru mme asua fo, kpukpru mmɔ eyeka ke otu mbon ntaŋ-mfep; ndien mmɔ eke ebumede fi eyedi se edibumede: nyenyuŋ nda mmɔ eke ewode fi nnim ke se ewode.

17Koro nyenɔ fi ŋkopidem nyenyuŋ ŋkɔk fi unan, Jehovah ɔdɔhɔ: koro ekotde fi, ete, Eyen mbin-mfep, ete, Enye edi Zion, baba owo kiet isaŋake iyom enye.

18Ntem ke Jehovah ɔdɔhɔ, ete, Sese, ami nyeda mme tent Jacob emi eketaŋde efep mfiak ndi, nnyuŋ ntua iduŋ esie mbɔm; eyenyuŋ ebɔp obio ke obot esiemɔ, ndien ufɔk edidem eyetie nte enye akam esitiede.

19Ndien ekɔm ye uyo mmɔ emi ebrede mbre eyewɔrɔ ke otu mmɔ: nyenyuŋ nnam mmɔ ewak, ndien mmɔ ididige esisit. Nyenyuŋ nnam ekpono mmɔ, ndien mmɔ idikprike.

20Nditɔ mmɔ eyenyuŋ etie nte eketiede ke eyo oko, ndien esop mmɔ eyesɔŋɔ ada ke iso mi, ndien ami nyenɔ kpukpru mmɔ eke etukde enye ufen.

21Ndien ɔbɔŋ mmɔ eyeto ke otu idem mmɔ: andikara mmɔ eyenyuŋ oto ke ufɔt mmɔ ɔwɔrɔ; ndien ami nyeyak enye asaŋa ekpere, ndien enye eyesim mi: koro anie owo edi emi onimde esit esie ubiɔŋ man osim mi?

22Emi edi uyo Jehovah. Ndien mbufo eyedi ikɔt mi, ami nyenyuŋ ndi Abasi mbufo.

23Sese, oyobio Jehovah ɔwɔrɔ ke ifuresit, oyobio eke ɔkpɔride ŋkpɔ efep: eyebumere ɔtɔ mme idiɔk owo ke ibuot.

24Ikaŋ iyaresit Jehovah idikabakede, tutu enye anam, tutu enye onyuŋ ama uduak esit esie; mbufo eyekere enye ke utit usen.