2 ŊWED CORINTH 1 - Efik Old Bible With Sectional Headings

1PAUL, emi edide apostle Christ Jesus ke uduak Abasi, ye Timothy eyen-ete nnyin, ewet ŋwed emi enɔ esɔk ufɔk Abasi emi odude ke Corinth, ye kpukpru ikɔt Abasi emi edude ke ofuri Achaia.

2Mfɔn ye emem akpakam oto Abasi Ete nnyin ye Ɔbɔŋ Jesus Christ osim mbufo.

3Itoro enyene Abasi ye Ete Ɔbɔŋ nnyin Jesus Christ, Ete mbɔm ye Abasi kpukpru ndɔŋesit:

4emi ɔdɔŋde nnyin esit ke kpukpru ukut nnyin, man nnyin ikpekeme ndida ndɔŋesit eke Abasi ɔnɔde nnyin ndɔŋ mmɔ emi edude ke ukut ekededi esit.

5Koro nte ndutuhɔ Christ etienede nnyin uwak-uwak, kpa ntre ke ndɔŋesit nnyin onyuŋ awak oto ke Christ.

6Edi edieke nnyin ikutde ukut, edi man mbufo enyene ndɔŋesit ye erinyaŋa; edieke ibɔde ndɔŋesit, edi man mbufo enyene ndɔŋesit, eke anamde mbufo enyene ukeme ndibiom ukem-ukem ndutuhɔ eke nnyin inyuŋ ikutde:

7imonyuŋ inyene ɔkpɔsɔŋ idori-enyin ibaŋa mbufo; koro nnyin ifiɔk ite, kpa nte mbufo ebuanade ke ndutuhɔ, ntre mbufo etiene ebuana ke ndɔŋesit.

8Koro nnyin ikpamaŋa mbufo etre ndifiɔk, nditɔ-ete, mbaŋa ukut emi ɔkɔwɔrɔde ɔnɔ nnyin ke Asia. Ekɔsɔŋɔ efik nnyin eti-eti, akan nte ikemede ndibiom, tutu iduɔk idori-enyin ite iyedu uwem:

9ke akpanikɔ esit nnyin eketetiŋ ɔnɔ nyin ete, iyekpa; man ikubuɔt idem ye idem nnyin, edi ye Abasi emi anamde mme akpa-mkpa eset:

10emi akanyaŋade nnyin osio ke utɔ akwa mkpa oro, eyenyuŋ anyaŋa: nnyin inyuŋ idori enyin ke Enye, ite, Enye eyemana osio nnyin:

11ke mbufo enyuŋ etienede enyaŋa ke mkpe-ubɔk mbufo; man ediwak owo ekpenɔ Abasi ekɔm ebaŋa nnyin, ke mfɔn eke Enye ɔfɔnde ye nnyin oto ke mkpe-ubɔk ediwak owo.

12Koro mbure eke nnyin iburede edi emi, kpa ikɔ-ntiense emi esit nnyin etiŋde ete, nnyin ikasaŋa ke edisana ido ye akpanikɔ Abasi idu uwem ke ererimbot; isaŋake ke ikike eke obukidem, edi ke mfɔn Abasi; inyuŋ isaŋa ntem idu uwem ke otu mbufo ikan.

13Koro nnyin iwetke ŋkpɔ efen inɔ esɔk mbufo, ibe se mbufo ekotde enyuŋ enyimede ete edi ntre, ŋdien mmodori enyin nte mbufo eyenyime ete edi ntre tutu amama;

14kpa nte mbufo enyimede ebaŋa nnyin esisit, ete, nnyin idi ŋkpɔ mbure mbufo, kpa nte mbufo edide ŋkpɔ mbure nnyin, ke usen Ɔbɔŋ nnyin Jesus.

15Sia nnimde emi ke akpanikɔ, ŋkoyom ndibem iso ndi ke ɔtɔ mbufo, man mbufo ekpekut utɔŋɔ-ntak ufɔn;

16ndinyuŋ mbe ke ŋkaŋ mbufo ŋka ke Macedonia, nnyuŋ nto ke Macedonia mfiak ndi ndise mbufo, man mbufo eda mi ekeyak ke erika mi ke Judea.

17Sia nyomde ndinam ntem, nte ŋwut nte ndi anana-iwuk? Mme se nduakde ndinam, nte ndaduak ke ido mbon obukidem, man ikɔ mi ɔkpɔwɔrɔ, “Edi ntre”, mme, “Idige ntre”?

18Nte Abasi edide akpanikɔ, ikɔ eke nnyin iketiŋde inɔ mbufo iwɔrɔke “Edi ntre, mme Idige ntre”.

19Koro Eyen Abasi, Jesus Christ, emi nnyin, kpa ami ye Silvanus ye Timothy, ikɔkwɔrɔde ke otu mbufo, idige “Edi ntre, mme, Idige ntre”; edi ke Enye ke Abasi etiŋ ete, “Edi ntre” (anam gospel ɔsɔŋɔ ada).

20Mme uŋwɔŋɔ Abasi enyuŋ ewak nte ewewak, ke Enye ke “Edi ntre” odu (mmɔ ewɔrɔ esu ke Enye): mmɔdo onyuŋ oto ke Enye nnyin ibɔrɔ ite, “Amen” (yak edi ntre), inɔ Abasi ubɔŋ.

21Ndien Andinam nnyin ye mbufo isɔŋɔ ida ke ŋkpɔ Christ, ye Andinim nnyin ke itie nnyin, edi Abasi;

22emi okonyuŋ efikde nnyin idiɔŋɔ ke idem, onyuŋ esinde Spirit Esie ke esit nnyin, nte akpa ubak udeme nnyin.

23Edi mmokot Abasi nte edidi ntiense abaŋa ukpɔŋ mi, ete ŋketre ndidi ke Corinth mbak ndisihere mbufo.

24Idige nte nnyin idedi mme andikara mbufo ke ŋkpɔ mbuɔtidem, edi nte idedi mme andiŋwam mbufo ndiyene idaresit. Koro ke mbuɔtidem ke mbufo edada.