ISAIAH 43 - Efik Old Bible With Sectional Headings

Abasi Ɔŋwɔŋɔ Ndifak Ikɔt Esie

1NDIEN ntem ke Jehovah, emi akanamde fi, Jacob, okonyuŋ obotde fi, Israel, ɔdɔhɔ ete, Kufehe; koro ami mfakde fi, ŋkosio fi enyiŋ; afo edi okimmɔ.

2Ke ini afo edisaŋade ke mmɔŋ ebe, ami nyedu ye afo; ye ke mme akpa mmɔŋ, mmɔ idifukke fi: ke ini afo edisaŋade ke ikaŋ udufɔbɔke; edemikaŋ idinyuŋ itaha fi.

3Koro ami Jehovah ndide Abasi fo; ami Edisana Abasi Israel, ndi Andinyaŋa fi: nda Egypt nnɔ ke ŋkpɔ-ufak fo, nnɔ Kush ye Sheba ke ibuot fo.

4Koro ŋkesede fi ke ŋkpɔ uto, afo emenyene ukpono, ami nnyuŋ mma fi: ndien nyenɔ owo ke ibuot fo, nyenɔ mme idut ke ibuot uwem fo.

5Kufehe, koro ami ndude ye afo: nyeda ubon fo ke edem usiaha-utin ndi, nyetaŋ fi ke edem usop-utin mbon:

6nyedɔhɔ edem edere, nte, Yak nɔ: nyedɔhɔ usuk, nte, Kubaha: da nditɔ-iren mi ke anyan idut di, ye nditɔ-iban mi ke utit ererimbot;

7kpa kpukpru mmɔ eke ekerede enyiŋ mi: ndien mmanam enye mbaŋa ubɔŋ mi, mbot enye, ŋkɔm mmanam enye.

8Sio mbon nnan, ndien mmɔ enyene enyin; sio mbon-inan, ndien mmɔ enyene utɔŋ.

9Kpukpru mme idut emebono ɔtɔ kiet, mme obio emenyuŋ esop idem: anie ke otu mmɔ editiŋ emi, onyuŋ anam nnyin ikop mbemiso ŋkpɔ? Yak mmɔ enɔ ntiense mmɔ, enyuŋ ekaŋ idem mmɔ: ndien yak mmɔ ekop, enyuŋ edɔhɔ, ete, Akpanikɔ.

10Jehovah ɔdɔhɔ, ete, Mbufo edi ntiense mi, ye owo emi ŋkemekde: man mbufo efiɔk enyuŋ enim uyo mi ke akpanikɔ, enyuŋ ekut ete ke ami ndi enye: ikebemke mi iso ibot Abasi, baba kiet idinyuŋ itieneke mi edem.

11Ami, ami ndi Jehovah; ndien baba andinyaŋa kiet iduhe ke mibɔhɔke ami.

12Ami ŋketiŋ nnyuŋ nnyaŋa, nnyuŋ nnam mbufo ekop, ndien baba esen abasi kiet iduhe ke otu mbufo: Jehovah onyuŋ ɔdɔhɔ ete, Mbufo edi ntiense mi, ndien ami ndi Abasi.

13Ndien ŋko toto ke usen oro ami ndi enye; ndien baba owo kiet eke ekemede ndisio ke ubɔk mi iduhe; nyenam ŋkpɔ, ndien anie owo edikabare enye?

14Ntem ke Jehovah, andifak mbufo, Edisana Abasi Israel, ɔdɔhɔ ete, Ŋkɔdɔŋ utom ke Babylon mbaŋa mbufo, nnyuŋ nsuhɔre mbon itɔk kpukpru mmɔ; ye mme Chaldean, mkpo mmɔ odu ke ubom mmɔ.

15Ami ndi Jehovah, Edisana Abasi mbufo, andibot Israel, edidem mbufo.

16Emi edi uyo Jehovah emi ɔnɔde usuŋ ke inyaŋ, ye ɔkpɔ-usuŋ ke mkpɔsɔŋ mmɔŋ.

17Emi osiode chariot ye horse, mbon-ekɔŋ ye odudu; mmɔ eyesuhɔre ena ɔtɔ kiet, ididahake ke enyɔŋ: mmɔ enime nte ɔfɔŋ utuenikaŋ, emenime.

18Mbufo ekuti mbemiso ŋkpɔ, ekunyuŋ ekere ŋkpɔ eset.

19Sese, ami mmɔŋ nnam obufa ŋkpɔ, ke emi ke editibe: nte mbufo idifiɔkke enye? Ŋkɔm nyenim usuŋ ke wilderness, ye akpa mmɔŋ ke desert.

20Unam ikɔt eyetoro mi, mme jackal ye mme ostrich: koro mmɔnɔ mmɔŋ ke wilderness, ye akpa mmɔŋ ke desert, nte ndinɔ; ndimek ikɔt mi se eŋwɔŋde.

21Mma mbot mbio emi nnɔ idem mi; mmɔ eyebuk itoro mi.

22Ndien afo, O Jacob, usemeke ukot mi: koro ami mfekde fi, O Israel.

23Afo ukadaha ŋkpri ufene ufɔp uwa fo usɔk mi, ukonyuŋ ukponoke mi ke mme uwa emem fo. Ŋkesinke fi anam ŋkpɔ mi ke uwa, nnyuŋ nsinke incense efek fi.

24Afo ukedepke mbɔkɔk ke okuk unɔ mi, ukonyuŋ uyuhɔke mi ke ikpɔŋ mme uwa fo; afo emesin mi nnam ŋkpɔ ke mme idiɔk ido fo ikpɔŋ-ikpɔŋ, omonyuŋ ada mme ukwaŋ-ŋkpɔ fo efek mi.

25Ami, ami ndi andisɔhi mme idiɔk ido fo mfep mbaŋa idem mi, ndinyuŋ ntihi mme ukwaŋ-ŋkpɔ fo.

26Nam mi nti: yak nnyin ikpe ikɔ ɔtɔ kiet: afo tiŋ man akaŋ idem fo.

27Akpa usɔ akanam idiɔk, mme mmɔ emi esiande fi enyuŋ esɔŋ ibuot ye ami.

28Ndien nyesabare ndisana mbɔŋ, nnyuŋ nda Jacob nnɔ nsobo, nda Israel nnɔ nduari.