EZEKIEL 11 - Efik Old Bible With Sectional Headings

Abasi Asua Ɔnɔ Mme Ndiɔi Ada-usuŋ

1NDIEN spirit emenere mi ke enyɔŋ, ada mi aka ke inua-otop ufɔk Jehovah edem usiaha-utin, emi esede edem usiaha-utin; ndien, sese, owo edip ye ition ke enyin-usuŋ eda; ndien, sese, ŋkut Jaazaniah eyen Azzur ke otu mmɔ, ye Pelatiah eyen Benaiah, mbɔŋ obio.

2Ndien enye ɔdɔhɔ mi, ete, Eyen owo, mme mmɔ emi edi mmɔ oro eduakde idiɔk, uduak enyuŋ etemede idiɔk item ke obio emi:

3emi edɔhɔde ete, Eribɔp ufɔk ikpereke: enye (obio) edi eso, nnyin inyuŋ idi unam.

4Tiŋ ndien prophecy dian mmɔ, tiŋ prophecy, O eyen owo.

5Ndien spirit Jehovah ɔduɔ mi ke idem, onyuŋ ɔdɔhɔ mi, ete, Tiŋ, ete, Ntem ke Jehovah ɔdɔhɔ, ete, Ntem ke mbufo edɔhɔ, O ufɔk Israel; ndien ami mfiɔk kpasuk se idɔkde iduk mbufo esit.

6Mbufo emenam mmɔ emi ekpaŋade afai ewak ke obio emi; emenyuŋ eda mmɔ emi ekpaŋade afai eyɔhɔ ke efak esie.

7Mmɔdo ntem ke Ɔbɔŋ Jehovah ɔdɔhɔ, ete, Mme mmɔ emi mbufo ekewotde, emi mbufo edade enim ke ufɔt esie, kpa mmɔ edi unam, ndien enye (obio) onyuŋ edi eso: ndien owo eyesioŋo mbufo ke esit efep.

8Mbufo ke ebak ofut; ndien ami nyeda ofut ntiene mbufo: emi edi uyo Ɔbɔŋ Jehovah.

9Nyenyuŋ nsioŋo mbufo ke ufɔt esie, nnyuŋ nda mbufo nsin isen owo ke ubɔk; nnyuŋ ŋkpe ikpe ke otu mbufo.

10Mbufo eyeduɔŋɔ ke ofut; nyekpe ikpe mbufo ke adaŋa Israel; ndien mbufo eyefiɔk ete ke ami ndi Jehovah.

11Obio emi ididige eso mbufo, mbufo idinyuŋ idige unam ke esit; ke adaŋa Israel ke ndikpe ikpe ye mbufo.

12Ndien mbufo eyefiɔk ete ke ami ndi Jehovah, emi mbufo mikesaŋake ke ewuhɔ mi, minyuŋ inamke ido mi; ndien mbufo enam nte ekemde ye ido mme idut emi ekande mbufo ekuk.

13Edikem adaŋemi nsuk ntetiŋ prophecy, Pelatiah eyen Benaiah akpa. Ndien nduɔ ke isɔŋ ŋkubi iso mi, nnyuŋ mfiori ke ɔkpɔsɔŋ uyo, nnyuŋ ndɔhɔ nte. Ah, Ɔbɔŋ Jehovah, nte afo ɔmɔŋ anam ubak Israel emi esuhɔde ama?

14Ndien uyo Jehovah osim mi, ete,

15Eyen owo, nditɔ-usɔ, nditɔ-usɔ edi mbio oruk fo, ye ofuri ufɔk Israel akpaimɔ, mme mmɔ emi mme andiduŋ Jerusalem edɔhɔde ebaŋa mmɔ, ete: Mbufo ekpɔŋ Jehovah anyan usuŋ: emenɔ nnyin isɔŋ emi ida inyene.

16Dɔhɔ ntem ndien, ete, Ntem ke Ɔbɔŋ Jehovah ɔdɔhɔ, ete, Koro mma mbin mmɔ mfep nnim anyan ebiet ke otu mme idut, mma nnyuŋ nsuan mmɔ ke otu mme obio, ntre ke ndikabare ndi edisana ebiet mmɔ ke ini esisit ke mme obio emi mmɔ ekade do.

17Dɔhɔ, ndien, ete, Ntem ke Ɔbɔŋ Jehovah ɔdɔhɔ, ete, Nditreke nditaŋ mbufo ke otu mme idut, nnyuŋ nsioŋo mbufo ke mme obio emi mbufo esuanade ke otu mmɔ, mbon; nnyuŋ nnɔ mbufo isɔŋ Israel.

18Ndien mmɔ eyesim ko, eyenyuŋ esioŋo kpukpru ŋkpɔ ndek esie, ye kpukpru mbubiam esie efep ke esit.

19Nyenyuŋ nnɔ mmɔ esit kiet, nnyuŋ nsin mbufo obufa spirit ke esit idem; nnyuŋ nsio mmɔ esit enyene itiat ke obukidem mfep, nnyuŋ nnɔ mmɔ esit enyene obuk:

20man mmɔ esaŋa ke mme ewuhɔ mi, enyuŋ enim mbet mi, enyuŋ enam mmɔ: ndien mmɔ eyekabare edi ikɔt mi, ami nyenyuŋ ndi Abasi mmɔ.

21Edi ama edi mmɔ emi esit mmɔ asaŋade ke ŋkpɔ ndek mmɔ ye mbubiam ŋkpɔ mmɔ, nyeda usuŋ mmɔ ndori mmɔ ke ibuot; emi edi uyo Ɔbɔŋ Jehovah.

22Ekem mme cherubim emenere mba mmɔ, ye mme wheel ekem ye mmɔ; ndien ubɔŋ Abasi Israel onyuŋ odoro mmɔ ke enyɔŋ.

23Ndien ubɔŋ Jehovah adaha ke ufɔt obio ɔdɔk akada ke enyɔŋ akamba obot emi odude ke edem usiaha-utin obio.

24Ndien spirit emen mi, onyuŋ ada mi ke ŋkukut ke spirit Abasi aka ke Chaldea ke ɔtɔ mbon ntaŋ-mfep. Ndien ŋkukut emi ŋkokutde ɔkpɔŋ mi ɔdɔk.

25Ndien mmen kpukpru ikɔ Jehovah emi enye okowutde mi, ntiŋ nnɔ mbon ntaŋ-mfep.