JUDGES 4 - Efik Old Bible With Sectional Headings

Deborah Ye Barak Ekan Sisera

1NDIEN nditɔ Israel etɔŋɔ ntak enam idiɔk ke iso Jehovah, adaŋemi Ehud ama akakpa.

2Ndien Jehovah anyam mmɔ esin ke ubɔk Jabin edidem Canaan, emi akadade ubɔŋ ke Hazor: ndien etubom mbon ekɔŋ esie edi Sisera, emi oduŋde ke Harosheeth mme idut.

3Ekem nditɔ Israel eseme enɔ Jehovah: koro enye ekenyenede chariot ukwak ikie usukkiet; onyuŋ ɔsɔŋɔ otuk nditɔ Israel ke ofuri isua edip.

4Ndien Deborah prophet aŋwan, ŋwan Lappidoth, ekpe ikpe Israel ke ini oro.

5Ndien enye etie ke idak eyop Deborah ke ufɔt Ramah ye Bethel ke obot Ephraim: nditɔ Israel enyuŋ edɔk eka ikpe ke ɔtɔ esie.

6Ndien enye ɔdɔŋ ekekot Barak eyen Abinoam ke Kedesh-naphtali edi, ndien ɔdɔhɔ enye, ete, Nte Jehovah Abasi Israel iwukke, ite, Saŋa udim udim ka ke akamba obot Tabor, nyuŋ da tɔsin owo duop ŋko ke otu nditɔ Naphtali ye nditɔ Zebulum dian idem?

7Ndien ami nyenam Sisera, etubom ekɔŋ Jabin, ye chariot esie, ye mbon ekɔŋ esie, esaŋa udim udim etiene fi ke edem akpa mmɔŋ Kishon; ndien nyeda enye nsin fi ke ubɔk.

8Ndien Barak ɔbɔrɔ enye ete, Edieke afo editienede mi aka, nyeka: edi mutieneke mi uka, ndikaha.

9Ndien enye ɔdɔhɔ ete, Nditreke nditiene fi ŋka: edi ududaha ukpono ke usuŋ emi afo asaŋade: koro Jehovah eyenyam Sisera esin ŋwan kiet ke ubɔk Ndien Deborah adaha ke enyɔŋ etiene Barak aka Kedesh.

10Ndien Barak owuk Zebulun ye Naphtali ete edi ke Kedesh; ndien tɔsin owo duop etiene enye edɔk: Deborah onyuŋ etiene enye ɔdɔk.

11Ndien Heber Kenite ama adianare ye mme Kenite (eken), nditɔ Hobab, ukot Moses; ndien enye owuk tent esie ke ɔtɔ ofriyo ke Zaanannim, emi ekperede Kedesh.

12Ekem etiŋ enɔ Sisera, ete, Barak eyen Abinoam ama ɔdɔk ke akamba obot Tabor.

13Ndien Sisera owuk kpukpru chariot esie, chariot ukwak ikie usukkiet, ye kpukpru owo eke edude ye enye, ete eto ke Harosheth mme idut, edi ke akpa mmɔŋ Kishon.

14Ndien Deborah ɔdɔhɔ Barak, ete, Daha ke enyɔŋ; koro mfin emi edide usen emi Jehovah edidade Sisera esin fi ke ubɔk: nte Jehovah ibemke fi iso iwɔrɔ? Ndien Barak oto ke obot Tabor ɔsuhɔre, ye tɔsin owo duop oro etienede enye ke edem.

15Ndien Jehovah ada iso ofut asuan Sisera, ye kpukpru chariot esie, ye kpukpru mbon-ekɔŋ esie, ke iso Barak; ndien Sisera oto ke chariot esie ɔsuhɔre, efehe ke ikpat.

16Edi Barak ebine mme chariot ye mbon-ekɔŋ oro, tutu osim ke Harosheth mme idut: ndien kpukpru mbon-ekɔŋ Sisera eduɔŋɔ ke iso ofut; baba owo kiet isuhɔke.

17Edi Sisera efehe ke ikpat esie, aka ke tent Jael ŋwan Herber Kenite: koro Jabin edidem Hazor amanade iman ye ufɔk Herber Kenite.

18Ndien Jael ɔwɔrɔ okosobo ye Sisera, onyuŋ ɔdɔhɔ enye, ete, Kabare, ɔbɔŋ mi, kabare, waha di ken. Kufehe ndik. Ndien enye awaha oduk ke tent esie, ndien enye (ŋwan) ada ufuhɔ-ŋkpɔ ofuk enye.

19Ndien Sisera ɔdɔhɔ enye, ete, Mbɔk nɔ mi mmɔŋ esisit ŋŋwɔŋ: koro itɔŋ asatde mi. Ndien enye afahare ikpa mmɔŋ-eba, ɔnɔ enye ɔŋwɔŋ, ndien ofuk enye.

20Ndien enye ɔdɔhɔ ŋwan, ete, Da ke enyin-usuŋ tent, ndien ama ekem, edieke owo edibupde fi, ete, Mme owo odu mi? dɔhɔ, ete, Iduhe.

21Ekem Jael ŋwan Heber ada ɔkpɔhɔ tent, onyuŋ esin hammer ke ubɔk; ndien asaŋa suŋ suŋ aka ɔtɔ esie, onyuŋ ada ɔkpɔhɔ owuk enye ɔkpɔ-iso ɔkɔŋ adian ke isɔŋ: koro enye edede idap eti-eti, onyuŋ akpa mba. Ntre ke enye akpa.

22Ndien, sese, ke ini Barak ebinede Sisera, Jael ɔwɔrɔ okosobo ye enye, onyuŋ ɔdɔhɔ enye, ete, Di, nyewut fi owo emi afo oyomde. Ndien adaŋemi enye odukde ke tent esie, sese Sisera ana do akpa, ye ɔkpɔhɔ ke ɔkpɔ-iso esie.

23Ntre ke Abasi anam Jabin edidem Canaan osuk ibuot ke iso nditɔ Israel ke usen oro.

24Ndien ubɔk nditɔ Israel ɔdɔdiɔŋ ɔsɔŋ aka iso akan Jabin edidem Canaan, tutu mmɔ esibe Jabin edidem Canaan efep.