EZEKIEL 41 - Efik Old Bible With Sectional Headings

Mme edisana Ebiet ye Mme Nsio Nsio Ikpeghe Efen Emi Edude ke Temple

1NDIEN enye ada mi oduk ke temple, onyuŋ odomo mme adaha, ubom edi ibio-idomo-okuk itiokiet ke edem kiet, ye ibio-idomo-okuk itiokiet ke edem eken, emi edide ubom temple.

2Ndien ubom enyin-usuŋ edi ibio-idomo-okuk duop; mme ufaŋ inua-otop enyuŋ edi ibio-idomo-okuk ition ke edem kiet, ye ibio-idomo-okuk ition ke edem eken: ndien enye odomo uniɔŋ esie ibio-idomo-okuk aba; ye ubom ibio-idomo-okuk edip.

3Ndien enye oduk ke esit okodomo adaha enyin-usuŋ ibio-idomo-okuk iba, ye enyin-usuŋ ibio-idomo-okuk itiokiet; ye ubom enyin-usuŋ ibio-idomo-okuk itiaba.

4Ndien enye odomo uniɔŋ esie ibio-idomo-okuk edip; ye ubom esie ibio-idomo-okuk edip ke iso temple: ndien enye ɔdɔhɔ mi, ete, Emi edi ata edisana ubet.

5Ndien enye odomo ibibene ufɔk ekem ibio-idomo-okuk itiokiet; onyuŋ odomo ubom ubet ŋkaŋ ufɔk, ibio-idomo-okuk inaŋ akan ofuri ufɔk okuk.

6Ndien mme ubet ŋkaŋ edi ubet ke enyɔŋ ubet, ubet ke enyɔŋ ubet, ke itie ita, mmɔ enyuŋ edi utim ikedip ye duop; ndien mmɔ esim ke ibibene ufɔk, ke eke ubet ŋkaŋ ekan ekuk, man emum mmɔ ekanma, edi mmɔ imumke ibibene ufɔk.

7Ndien ubom ubet ŋkaŋ amana okpon akan okuk, nte edɔkde ke enyɔŋ; koro ufɔk afarade nte ɔdɔkde ke enyɔŋ akan ufɔk okuk: mmɔdo ubom ubet amanade okpon nte ɔdɔkde; ndien ntem eto ke ubet isɔŋ ebe ke esine-ufɔt edɔk ke eke enyɔŋ.

8Ndien ŋkut idaha ufɔk ŋkan ŋkuk: isɔŋ mme ubet edi ofuri eto ibio-idomo-okuk itiokiet tutu osim isobo.

9Ubom ibibene mme ubet ŋkaŋ ke esien edi ibio-idomo-okuk ition, ye se isuhɔde ke esit mme ubet ŋkaŋ ufɔk.

10Ufaŋ ibio-idomo-okuk edip onyuŋ odu ke ufɔt mme ubet (oku) emi ekande ofuri ufɔk ekuk.

11Ndien enyin-usuŋ mme ubet ŋkaŋ odu ke ɔtɔ emi anade ikpikpu; enyin usuŋ kiet ese edem edere, enyin-usuŋ eken onyuŋ ese usuk; ndien ubom ebiet emi anade ikpikpu edi ibio-idomo-okuk ition akan okuk.

12Ndien ufɔk emi odude ke iso ebiet eridianare mfep edem usop-utin edi ibio-idomo-okuk ata ye duop ke ubom; ndien ibibene ufɔk oro edi ibio-idomo-okuk ition ke ubom akan okuk, uniɔŋ esie onyuŋ edi ibio-idomo-okuk anaŋ ye duop.

13Ndien enye odomo ufɔk; uniɔŋ ibio-idomo-okuk ikie; ye ebiet eridianare mfep, ye ufɔk eŋwen oro, ye ibibene esie, ibio-idomo-okuk ikie ke uniɔŋ.

14Ndien ubom ufaŋ emi odude ke iso ufɔk ye ebiet eridianare mfep ke edem usiahautin, edi ibio-idomo-okuk ikie.

15Ndien enye odomo uniɔŋ ufɔk eken ke iso ebiet eridianare mfep, emi ediande enye ke edem-edem, ye mme gallery esie ke edem mbiba, ibio-idomo-okuk ikie, ye temple emi odude ke esit, ye etehe esa;

16ye mme asaŋudɔk, ye mme window eke miberekede, ye mme gallery emi ekande ekuk ke mme deck mmɔ mbita ekem ye asaŋudɔk emi enamde ke obukpɔk ekan ekuk, onyuŋ ɔtɔŋɔde ke isɔŋ tutu osim ke mme window, ndien mme window efuhɔ;

17enyuŋ etɔŋɔ ke enyɔŋ enyin-usuŋ edomo idomo tutu esim ufɔk emi odude ke esit, ye ke esien, enyuŋ esaŋa ke ofuri ibibene ekan ekuk ke esit ye ke edem.

18Ekenyuŋ enam cherubim ye eyop, eyop kiet onyuŋ odu ke ufɔt cherub ye cherub: cherub kiet onyuŋ enyene iso iba;

19ndien iso owo ese eyop ke edem kiet, iso lion onyuŋ ese eyop ke edem eken; ekenam mmɔ esin ke ofuri ufɔk ekan ekuk.

20Ekenam mme cherubim ye eyop, ɔtɔŋɔde ke isɔŋ tutu osim enyɔŋ enyin-usuŋ, ye ke ibibene temple.

21Ama edi temple, ekesɔi obubɔk enyin-usuŋ esin ŋwɔ inaŋ; iso edisana ebiet onyuŋ etie nte akam esitiede.

22Ndien itie-uwa eto edi ibio-idomo-okuk ita ke idaha, uniɔŋ esie onyuŋ edi ibio-idomo-okuk iba; ndien inuk esie, ye uniɔŋ esie, ye ibibene esie edi eto. Ndien enye ɔdɔhɔ mi, ete, Emi edi okpokoro emi odude ke iso Jehovah.

23Temple ye edisana ubet enyuŋ enyene itim iba.

24Ndien mme itim edi itim iba-iba; itim iba eke eyutde; ubak iba ke eke itim kiet, ye itim ubak iba ke eke itim eken.

25Ekenyuŋ enam cherubim ye eyop esin mmɔ ke esit, kpa mme itim temple, kpasuk nte ekenamde ke ibibene; edidobi obukpɔk onyuŋ odu ke iso etehe ke esien.

26Window eke miberekede ye eyop enyuŋ edu ke edem mbiba, ke ŋkaŋ etehe, ye ke mme ubet ŋkaŋ ufɔk ye edidobi obukpɔk.