JEREMIAH 11 - Efik Old Bible With Sectional Headings

Nditɔ Israel ye Judah Ebiat Ediomi Mmɔ ye Abasi

1IKƆ emi okoto Jehovah edisim Jeremiah, ete,

2Mbufo ekop ikɔ ediomi emi, enyuŋ etiŋ enɔ nditɔ Judah ye mme andiduŋ Jerusalem;

3nyuŋ dɔhɔ mmɔ, ete, Ntem ke Jehovah Abasi Israel ɔdɔhɔ, ete, Osuk ɔdɔdiɔk ɔnɔ owo eke midikopke ikɔ ediomi emi,

4Kpa se ŋkowukde mme ete mbufo ke usen oro ŋkosiode mmɔ ke isɔŋ Egypt, ke akwa ikaŋ ukwak, nte, Mbufo ekop uyo mi, enyuŋ enam mmɔ, kpa nte asaŋade ye kpukpru se ŋkowukde mbufo: ndien mbufo eyedi ikɔt mi, ndien ami nyedi Abasi mbufo:

5man nnim uŋwɔŋɔ oro ŋkɔŋwɔŋɔde nnɔ mme ete mbufo, nte ke ndinɔ mmɔ isɔŋ emi ɔfiɔrɔde mmɔŋ-eba ye aran-ɔkwɔk, kpa nte edide mfin emi. Ndien ami mbɔrɔ, nte, Amen, O Jehovah.

6Ndien Jehovah ɔdɔhɔ mi, ete, Taŋa kpukpru ikɔ emi ke mme obio Judah, ye ke mme efak Jerusalem, ete, Mbufo ekop ikɔ ediomi emi, enyuŋ enam mmɔ.

7Koro mma ntim ŋwuk mme ete mbufo ke usen oro ŋkadade mmɔ ke isɔŋ Egypt ndɔk, tutu osim mfin emi, mbabak ŋwuk, nte,

8Mbufo ekop uyo mi. Edi mmɔ ikopke, inyuŋ ikpaŋke utɔŋ mmɔ, edi kpukpru owo kiet kiet esaŋa ke itun idiɔk esit mmɔ. Ndien nyeda kpukpru ikɔ ediomi oro ŋkowukde nte enam, ndien mmɔ minamke, nda ntiene mmɔ.

9Ndien Jehovah ɔdɔhɔ mi, ete, Idiɔk ediomi mmɔ ke otu nditɔ Judah ye mme andiduŋ Jerusalem.

10Mmɔ efiak edem ke mme idiɔk ido akpa mme ete mmɔ oro mikenyimeke ndikop ikɔ mi; ndien mmɔ ebine abasi efen enyuŋ enam ŋkpɔ mmɔ: ufɔk Israel ye ufɔk Judah emebiat ediomi mi oro ŋkanamde ye mme ete mmɔ.

11Mmɔdo ntem ke Jehovah ɔdɔhɔ, ete, Sese, ami nyeda idiɔk ŋkpɔ kiet eke mmɔ mikemeke ndiwɔrɔ ke esit, ntiene mmɔ; ndien mmɔ eyeseme enɔ mi, edi ami ndikopke uyo mmɔ.

12Ndien mme obio Judah ye mme andiduŋ Jerusalem eyeka ekeseme enɔ mme abasi oro mmɔ ekefɔpde ŋkpɔ enɔ mmɔ: edi mmɔ idikemeke ndinyaŋa mmɔ ke ini ukut mmɔ.

13Koro mme abasi fo ekemde ke ibat mme obio fo, O Judah; mbufo emenyuŋ enim itie-uwa ekem ke ibat mme efak Jerusalem, enɔ oburobut ŋkpɔ oro, kpa itie-uwa eke efɔpde ŋkpɔ enɔ Baal.

14Afo kunam mkpeubɔk ndien, unɔ mbio emi, kunyuŋ umenere mfiori ye eseme ubaŋa mmɔ: koro mmendikopde ke ini eke mmɔ esemede ekot mi ebaŋa idiɔk itie ukut mmɔ.

15Edima ikɔt mi esaŋa nso ke ufɔk mi, eke mmɔ enamde oburobut ŋkpɔ emi ewakde ntem? Ndien edisana unam eyedaha ɔkpɔŋ fi: koro afo anamde idiɔk, ndien ebre mbre.

16Jehovah okosio fi enyiŋ, ete, Awawa olive, ediye ke mfri ye ke idem. Ke uyo akwa mkpo ke enye okokim ikaŋ ke esit, ndien ŋkɔk esie emebuŋɔ.

17Ndien Je-hovah mme udim emi ɔkɔtɔde fi ke isɔŋ, ɔdɔhɔ idiɔk abaŋa fi, abaŋa idiɔk ido ufɔk Israel, ye eke ufɔk Judah oro mmɔ ekenamde ke idem mmɔ, enyuŋ eyatde mi esit ke erifɔp ŋkpɔ nnɔ Baal.

18Ndien Jehovah asian mi, ndien mfiɔk: ndien afo owut mi ido mmɔ.

19Ndien ami mbiet suŋ-suŋ eyen erɔŋ eke edade ekewot. Ndien ami mfiɔkke nte ekeduakde uduak ebaŋa mi, ete, Eyak nnyin isobo eto ye mfri esie, inyuŋ isibe enye ifep ke isɔŋ mme andidu uwem: ndien mmɔ iditihi aba enyiŋ esie.

20Edi O Jehovah mme udim, emi ekpede edinen ikpe, odomo nsia ye esit, nyekut nte afo osiode usiene ye mmɔ: koro mmayarade ikɔ mi nnɔ fi.

21Mmɔdo, ntem ke Jehovah ɔdɔhɔ abaŋa nditɔ Anathoth, emi eyomde uwem fo, ete, Kuda enyiŋ Jehovah utiŋ prophecy, mbak afo edikpa ke ubɔk nnyin:

22mmɔdo ntem ke Jehovah mme udim ɔdɔhɔ, ete, Sese, ami nyenɔ mmɔ ufen; mkparawa mmɔ eyekpaŋa ke ofut: nditɔ-iren mmɔ ye nditɔ-iban mmɔ eyekpaŋa ke akaŋ:

23ndien baba owo kiet idisuhɔke inɔ mmɔ: koro nyeda idiɔk ntiene mbio-obio Anathoth, kpa isua ufen mmɔ.