ISAIAH 40 - Efik Old Bible With Sectional Headings

Abasi Ɔdɔŋ Zion Esit

1ABASI mbufo eyedɔhɔ ete, Mbufo edɔŋ ikɔt mi esit, edɔŋ ikɔt mi esit.

2Edɔhɔ ye Jerusalem ufan-ufan, enyuŋ ekwɔrɔ enɔ enye, ete, Ke ekɔŋ esie ɔmɔyɔhɔ, ke emefen idiɔk ido esie: ke enye ɔmɔbɔ Jehovah ke ubɔk utim ikaba abaŋa kpukpru mme idiɔk ido esie.

3Kop! uyo andifiori ke wilderness, ete, Mbufo ediɔŋ usuŋ Jehovah, emenere ɔkpɔ-usuŋ enɔ Abasi nnyin ke desert.

4Kpukpru itihere ebiet eyemenere ke enyɔŋ, kpukpru ikpɔ ye ŋkpri obot eyenyuŋ esuhɔre: se ikwaŋade eyenyuŋ akabare enen, ibombom eyenyuŋ akabare edi una-isɔŋ:

5ndien ubɔŋ Jehovah eyeyarare, kpukpru owo ɔtɔ kiet eyenyuŋ ekut enye: koro uyo Jehovah ɔdɔhɔde.

6Uyo ɔdɔhɔ, ete, Fiori, Ndien owo ɔdɔhɔ, ete Nso ke ndifiori? Ofuri obukidem edi mbiet, ofuri mfɔn esie onyuŋ ebiet ediye ikɔŋ ikɔt: mbiet amasat,

7ediye ikɔŋ onyuŋ akpa: koro ibifik Jehovah ofuride ke esit: ke akpanikɔ kpukpru owo edi mbiet.

8Mbiet amasat, ediye ikɔŋ onyuŋ akpa: edi ikɔ Abasi nnyin eyeda ke nsinsi.

9Afo Zion emi obukde eti mbuk, dɔk ke edikoŋ obot; O Jerusalem emi obukde eti mbuk, sɔŋɔ menere, uyo fo; menere, kudige; dɔhɔ mme obio Judah, ete, Se Abasi mbufo!

10Sese, Ɔbɔŋ Jehovah eyeda odudu edi, ubɔk esie eyenyuŋ akara ɔnɔ enye: sese, utip esie odu ye enye, ŋkpɔ-eyen-utom onyuŋ odu enye ke iso.

11Enye eyebɔk ikɔt esiemɔ nte ɔbɔk ufene: eyetaŋ nditɔ erɔŋ ke ubɔk esie, akama ke ikpanesit esie, onyuŋ ada mme ɔnɔ-mmɔŋeba usuŋ.

12Anie odomo mmɔŋ ke eka-ubɔk esie, onyuŋ ada eka-ubɔk odomo enyɔŋ, onyuŋ akama ntan isɔŋ ke udomo-ŋkpɔ, onyuŋ odomo udop ikpɔ obot ke scales, ye ekpri obot ke balance?

13Anie owo odomo spirit Jehovah ese, onyuŋ edi andinɔ enye item nnyuŋ ŋkpep enye?

14Enye obup anie owo item, ndien enye eteme Enye? onyuŋ owut Enye usuŋ ikpe, onyuŋ ekpep Enye ifiɔk, onyuŋ owut Enye usuŋ asian?

15Sese, mme idut ebiet ntɔi mmɔŋ ke abaŋ, enyuŋ ebat mmɔ nte obu ke balance: sese, enye eyemen mme isuo nte ata ekpri ŋkeŋe.

16Lebanon inyuŋ ikemke ke eke edade efɔp, unam esie inyuŋ ikemke ke edifɔp uwa.

17Kpukpru mme idut edi ikpikpu ke iso esie; enyuŋ ebat mmɔ ete ke mmɔ ekpri ekan se miduhe, ke enyuŋ edi ikpikpu ye enye.

18Ndien mbufo edidomo Abasi ye anie? Enyuŋ eda nso idomo edomo enye?

19Owo-usɔ anam editara mbiet, odom-gold onyuŋ ada gold ofuk enye, onyuŋ atara silver anam ŋkpɔkɔbi.

20Owo eke ananade ŋkpɔ uwa emek eto eke midibuhu: oyom enyene-ibuot owo-usɔ ke idem esie, eke edinamde edisɔi mbiet, eke midisehekede.

21Nte mbufo ifiɔkke? Nte mbufo ikopke? Nte akanam itiŋke inɔ mbufo toto ke eritɔŋɔ? Nte mbufo ifiɔkke nte ekewukde ererimbot ke itie?

22Enye emi odorode ke ekara ererimbot, ndien mme andiduŋ enye ebiet ŋkukuŋkpɔyɔriyɔ; emi anyanarede ikpa-enyɔŋ nte ukara, onyuŋ eneŋerede enye nte tent eke eduŋde:

23emi onimde mbɔŋ ke se miduhe du; anam mme ebier-ikpe ererimbot edi ikpikpu.

24Itimke itɔ mmɔ ke isɔŋ ima: ndien enye ofuri mmɔ, ndien mmɔ ekpaŋa, idio eyenyuŋ ɔkpɔri mmɔ efep nte mbio.

25Mbufo edida anie ndien edomo mi? Ami ndinyuŋ ndi ukem ye anie? Emi edi uyo Edisana Abasi.

26Emenere enyin mbufo ke enyɔŋ, enyuŋ ese! Anie okobot mme mmɔ emi? Anie ada otu mmɔ ɔwɔrɔ ke ibat mmɔ? Enye osio kpukpru mmɔ enyiŋ: koro nsɔŋidem esie okponde, enye onyuŋ ɔsɔŋ odudu; baba owo mmɔ kiet isopke.

27Nsinam afo Jacob ɔdɔhɔde, nsinam afo Israel etiŋde, ete, Usuŋ mi odibe Jehovah, ikpe mi onyuŋ ebe ɔkpɔŋ Abasi mi.

28Nte afo ufiɔkke? nte afo akanam ukopke? Jehovah emi okobotde mme utit ererimbot edi nsinsi Abasi; enye ikpaha mba, inyuŋ ikpɔtke; idige nte eduŋɔrede asian esie.

29Enye ɔnɔ mbon mba odudu; onyuŋ anam ukeme awak ɔnɔ mmɔ eke minyeneke nsɔŋ-idem.

30Idem mkparawa eyekpa mba enyuŋ ekpɔt, nyara owo eyenyuŋ eduɔŋɔ:

31edi mmɔ eke eberede ye Jehovah eyekop obufa nsɔŋidem; eyedɔk ke mba nte ntrukpom; eyefeŋe, ndien idikpɔtke; eyesaŋa, edi idikpaha mba.