EZRA 8 - Efik Old Bible With Sectional Headings

Mme Ibuot Ekpuk Emi Ekenyɔŋde ke Ntaŋ Mfep Edi

1NDIEN mme mmɔ emi edi mme etubom mme ete, ye ŋwed emana mmɔ emi eketode ke Babylon etiene mi edɔk, ke eyo ɔbɔŋ Artaxerxes edidem.

2Ke nditɔ Phinehas; Gershom: ke nditɔ Ithamar; Daniel: ke nditɔ David; Hattush.

3Ke nditɔ Shecaniah, ke nditɔ Parosh; Zechariah: ndien mmɔ ewet irenowo ikie ye aba ye duop, edian enye ke ŋwed emana.

4Ke nditɔ Pahath-moab; Eliehoenai eyen Zerahiah, ye irenowo ikie iba ŋko.

5Ke nditɔ Shecaniah; eyen Jahaziel, ye irenowo ikie ita ŋko.

6Ye ke nditɔ Adin; Ebed eyen Jonathan, ye irenowo aba ye duop ŋko.

7Ye ke nditɔ Elam, Jeshaiah eyen Athaliah, ye irenowo ata ye duop ŋko.

8Ye ke nditɔ Shephatiah; Zebadiah eyen Michael, ye irenowo anaŋ ŋko.

9Ye ke nditɔ Joab; Obadiah eyen Jehiel, ye irenowo ikie iba ye ata ŋko.

10Ye ke nditɔ Shelomith; eyen Josiphiah, ye irenowo ikie ye ata ŋko.

11Ye ke nditɔ Bebai; Zechariah eyen Bebai, ye irenowo edip ye itiaita ŋko.

12Ye ke nditɔ Azgad; Johanan eyen Hakkatan, ye irenowo ikie ye duop ŋko.

13Ndien ke ekperedem nditɔ Adonikam, emi enyiŋ mmɔ ekerede ntem, Eliphelet, ye Jeuel, ye Shemaiah, ye irenowo ata ŋko.

14Nditɔ Bigvai; Uthai, ye Zabbud, ye irenowo ata ye duop ŋko.

15Ekem nsop mmɔ ɔtɔ kiet ke mben akpa emi osukde aka Ahava; ndien nnyin itie do ke tent ke usen ita: ami nnyuŋ nse kpukpru owo, ye mme oku, edi ŋkwe baba eyen Levi kiet do.

16Ndien ndɔŋ ekekot Eliezer, ye Ariel, ye Shemaiah, ye Elnathan, ye Jarib, ye Elnathan, ye Nathan, ye Zechariah, ye Meshullam, ikpɔ owo; ye Joiarib ŋko, ye Elnathan, mbon eti ibuot.

17Ndien ntobo mmɔ etop ke ɔtɔ Iddo etubom, ke ebiet Casiphia, nnyuŋ nsin mmɔ ikɔ ke inua, eke editiŋde enɔ Iddo, ye nditɔ-ete esie mme Nethinim, ke ebiet Casiphia, man mmɔ eda mme anam-ŋkpɔ ufɔk Abasi nnyin edisɔk nnyin.

18Ndien oto eti ubɔk Abasi nnyin emi odude ye nnyin, mmɔ eda ɔniɔŋ owo kiet ke otu nditɔ Mahli, eyen Levi, eyen Israel, edi; ye Sherebiah, ye nditɔ esie, ye nditɔ-ete esie, owo efureta;

19ye Hashabiah, ye Jeshaiah ŋko emi otode ke nditɔ Merari, ye nditɔ-ete esie ye nditɔ mmɔ, owo edip:

20ye ndusuk mme Nethinim oro David ye ikpɔ owo ekenimde, ete enam utom enɔ mme Levite, Nethinim ikie iba ye edip: ekewet mmɔ kpukpru enyiŋ ke enyiŋ.

21Ndien ŋkwɔrɔ utre-udia do ke mben akpa Ahava, man nnyin ituk idem nnyin ke iso Abasi nnyin, inyuŋ ibeŋe enye edinen usuŋ inɔ idem nnyin, ye nditɔ-wɔŋ nnyin, ye kpukpru inyene nnyin.

22Koro but akanamde mi ndika ŋkebeŋe edidem mbon-ekɔŋ ye mbio horse eke edinyaŋade nnyin, mbak mme asua ke usuŋ: koro nnyin ikɔdɔhɔde edidem, ite, Ubɔk Abasi nnyin ada ke ufɔn ɔnɔ kpukpru mme andiyom enye; edi odudu esie ye iyaresit esie eŋwana ye kpukpru mme andikpɔŋ enye.

23Ntem ke nnyin iketre udia, inyuŋ ikpe Abasi nnyin ubɔk ibaŋa ŋkpɔ emi; ndien enye okop ɔnɔ nnyin.

24Ndien ndianare owo duopeba ke mbɔŋ oku, Sherebiah, ye Hashabiah, ye nditɔ-ete mmɔ duop ŋko.

25Ndien ndomo silver, ye gold, ye mkpoduoho nnɔ mmɔ, kpa enɔ ufɔk Abasi nnyin oro edidem, ye mme ɔnɔ-item esie, ye mbɔŋ esie, ye ofuri Israel eke edude do, ekenɔde:

26ntre ke ndomo silver ke talent ikie itiokiet ye aba ye duop, nsin mmɔ ke ubɔk, ye mkpoduoho silver ke talent ikie, ye eke gold talent ikie:

27ye ikpɔ bowl o-gold edip emi ekemde tɔsin dram; ye edisem ŋkpɔ okpoho iba emi esɔŋde urua nte gold.

28Ndien ndɔhɔ mmɔ, nte, Mbufo edi edisana ikɔt Jehovah; mkpoduoho emi enyuŋ edi edisana: silver ye gold enyuŋ edi se enɔde Jehovah Abasi mme ete mbufo ke ima esit.

29Mbufo ekpeme, ndien enyuŋ enim mmɔ, tutu mbufo edomo mmɔ ke iso mbɔŋ mme oku, ye eke mme Levite, ye mbɔŋ mme ete Israel, ke Jerusalem, ke ubet ufɔk Jehovah.

30Ndien mme oku ye mme Levite eda udop silver, ye eke gold, ye eke mkpoduoho, man eda mmɔ edi ke Jerusalem ke ufɔk Abasi nnyin.

31Ekem nnyin idaŋa ke akpa Ahava ke ɔyɔhɔ usen duopeba, ke akpa ɔfiɔŋ, ite ika ke Jerusalem: ndien ubɔk Abasi nnyin ada ye nnyin, onyuŋ anyaŋa nnyin osio ke ubɔk mme asua, ye eke mmɔ eke enade ke usuŋ ebet.

32Ekem nnyin isim Jerusalem, inyuŋ itie do ke usen ita.

33Ndien ke ɔyɔhɔ usen inaŋ mmɔ edomo silver, ye gold, ye mkpoduoho oro ke ufɔk Abasi nnyin, esin ke ubɔk Meremoth eyen Uriah oku; Eleazar eyen Phinehas onyuŋ ada ye enye; Jozabad eyen Jeshua, ye Noadiah eyen Binnui, Levite, enyuŋ edu ye mmɔ;

34nte ibat ye udop kpukpru ŋkpɔ esaŋade: ndien mmɔ ewet ofuri udop ke ini oro.

35Ndien mmɔ eke etode ke itie ntaŋ-mfep edi, kpa nditɔ mbon ntaŋ-mfep, eda edifɔp uwa esɔk Abasi Israel, enaŋ duopeba, ebaŋa ofuri Israel, ye okukim erɔŋ anaŋ ye efurekiet, ye nditɔ-erɔŋ ata ye efureba, ye okpo ebot duopeba ke uwa idiɔk ido: kpukpru mmɔ emi edi edifɔp uwa Jehovah.

36Mmɔ enyuŋ eda ewuhɔ edidem enɔ mme satrap edidem, ye mme andikara ke edem akpa oko: ndien mmɔ eŋwam mbon oro ye ufɔk Abasi.