DEUTERONOMY 24 - Efik Old Bible With Sectional Headings

Usio Ndɔ ye Nditɔŋɔ Ntak Ndɔ Owo Efen

1KE adaŋemi owo adade ŋwan ɔdɔ, ama ekem edieke ŋwan minemke enye esit, koro okutde enye ŋkpɔ but ke idem: ndien yak enye ewet ŋwed usio-ndɔ ɔnɔ ŋwan, esin enye ke ubɔk, ndien anam enye ɔwɔrɔ ke ufɔk esie.

2Ndien adaŋemi enye ɔwɔrɔde ke ufɔk esie, onyuŋ akade ɔkɔdɔ owo efen;

3utɔŋɔ ntak ebe oro onyuŋ asua enye, onyuŋ ewet ŋwed usio-ndɔ ɔnɔ enye, esin enye ke ubɔk, onyuŋ anam enye ɔwɔrɔ ke ufɔk esie; mme onyuŋ edieke utɔŋɔ ntak ebe oro ɔkɔdɔde enye, akpa;

4akpa ebe esie oro okosiode enye, ikemeke nditɔŋɔ ntak nda enye ndɔ, ke adaŋemi enye ama akabiara: koro Jehovah esede oro ke mbubiam: kunam ndien isɔŋ emi Jehovah Abasi fo ɔnɔde fi ke udeme, edue isop.

5Ke adaŋemi owo ɔdɔde ɔbufa ŋwan, enye okuka ekɔŋ, ekunyuŋ edɔŋ enye baba utom kiet: eyak enye enɔ ufɔk esie isua kiet, man enye adat ŋwan esie emi enye ɔdɔde esit.

6Owo okumum itiat-ɔkɔk isɔŋ-isɔŋ, mme itiat enyɔŋ-enyɔŋ ke ukat: koro enye omumde uwem owo ukat.

7Edieke edikutde owo eke oyipde owo ke otu nditɔ-ete esie, kpa nditɔ Israel, mme edinyuŋ onim enye ke ofin, mme anyanyam enye; inɔ oro enyene ndikpa; ke ntre ke afo edisio idiɔk ke otu fo efep.

8Tiŋ enyin ke udɔŋɔ akpa-mfia, man afo otim ekpeme, onyuŋ anam kpukpru se mme oku, kpa mme Levite, editemede mbufo: kpa nte ŋketemede mmɔ, kpa ntre ke mbufo edikpeme ndinam.

9Ti se Jehovah Abasi fo akanamde Miriam ke usuŋ, ke ini mbufo etode ke Egypt ewɔŋɔ.

10Ke ini afo ɔbuɔtde mbɔhiduŋ fo ŋkpɔ ekededi, kuduk ke ufɔk esie ŋkɔbɔ enye ubiɔŋ.

11Da ke esien, ndien owo eke afo ɔbuɔtde enye eyeda ubiɔŋ ɔwɔrɔ ɔsɔk fi ke esien.

12Ndien edieke owo oro ebuenede, kuda ubiɔŋ esie ude idap:

13kutre ndiyak ubiɔŋ nnɔ enye ke utin osopde, man enye ada ekura esie ede idap, onyuŋ ɔkɔm fi; ndien eyebat oro enɔ fi ke se inende ke iso Jehovah Abasi fo.

14Kufik owo eke ekpede utom, eke ananade ŋkpɔ onyuŋ ebuenede, edide ke otu nditɔ-usɔ, onyuŋ edide ke otu isen owo eke edude ke isɔŋ fo, ke obio fo:

15nɔ enye okuk ke usen esie, utin okunyuŋ ɔsuhɔre ke esit; koro enye ananade ŋkpɔ, enye eberi esit esie ke esit: mbak enye ediseme ɔnɔ Jehovah abaŋa fi, ndien afo edue isop.

16Mme ete ekukpa ebaŋa nditɔ, nditɔ ekunyuŋ ekpa ebaŋa mme ete yak owo akpa abaŋa idiɔk-ŋkpɔ esiemɔ.

17Kuyut ikpe esen owo, mme eke eyen-akpa; kunyuŋ uda ɔfɔŋidem ebe-akpa ke ubiɔŋ:

18nyuŋ ti nte afo ekedide ofin ke Egypt, ndien Jehovah Abasi fo akafak fi osio ke esit: oro esin ami nteme fi anam ŋkpɔ emi.

19Ke adaŋemi afo ekpeŋede ukpeŋe fo ke iŋwan fo, onyun efre ebek kiet ke iŋwan, kufiak edem ukemen enye: yak ana ɔnɔ esen owo, ye eyen-akpa, ye ebe-akpa: kpaŋ Jehovah Abasi fo ɔkpɔdiɔŋ fi ke kpukpru utom ubɔk fo.

20Ke adaŋemi afo oyibide eto olive fo, kutɔŋɔ ntak ukese ŋkɔk: yak enye ana ɔnɔ esen owo, ye eyen-akpa, ye ebe-akpa.

21Ke adaŋemi afo etetde mfri iŋwaŋ vine fo, kufiak edem uka mfiɔhɔ: yak ana ɔnɔ esen owo, ye eyen-akpa ye ebe-akpa.

22Nyuŋ ti nte afo ekedide ofin ke isɔŋ Egypt: oro esin ami ŋwuk fi nte anam ŋkpɔ emi.