EZRA 4 - Efik Old Bible With Sectional Headings

Mme Asua Edi Nditre Utom Edibɔp Temple

1EKEM adaŋemi mme asua Judah ye eke Benjamin ekopde ete ke nditɔ ntaŋ-mfep ebɔp temple enɔ Jehovah Abasi Israel;

2mmɔ edi ke ɔtɔ Zerubbabel, ye eke mme etubom mme ete, edidɔhɔ mmɔ, ete, Yak nnyin itiene mbufo ibɔp; koro nnyin ibinede Abasi mbufo, kpa nte mbufo enamde; inyuŋ iwa uwa inɔ enye, toto ke eyo Esar-haddon edidem Assyria, emi akadade nnyin ɔdɔk edi ken.

3Edi Zerubbabel, ye Jeshua, mme etubom mme ete Israel emi esuhɔde, edɔhɔ mmɔ, ete, mbufo isaŋake ye nyin ke eribɔp ufɔk nnɔ Abasi nnyin; edi nnyin ke idem nnyin iyebɔp inɔ Jehovah Abasi Israel, kpa nte edidem Cyrus, edidem Persia, okowukde nnyin.

4Ndien nditɔ idut oro emem nditɔ Judah ubɔk enyuŋ esin mmɔ ndutime ke ebɔpde:

5enyuŋ ekpe mme ɔnɔ-item ebaŋa mmɔ, ete enam uduak mmɔ okpu, ke ofuri eyo Cyrus edidem Persia, tutu osim ini ubɔŋ Darius edidem Persia.

6Ekem ke ini Ahasuerus adade ubɔŋ, ke eritɔŋɔ ini ubɔŋ esie, mmɔ ewet ŋwed ikɔ-edem ebaŋa mme andiduŋ Judah ye Jerusalem.

7Ndien ke eyo Artaxerxes, Bishlam, ye Mithredath, ye Tabeel, ye mme nsaŋa mmɔ efen, ewet ŋwed enɔ esɔk Artaxerxes edidem Persia; ndien mmɔ ewet ŋwed oro ke usem Syria, enyuŋ esiak enye ke usem Syria.

8Rehum ekpeme-ŋwed-ewuhɔ, ye Shimshai andiwet ŋwed ewet ŋwed kiet ebaŋa Jerusalem, enɔ esɔk edidem Artaxerxes, ntem;

9ke ini oro Rehum ekpeme-ŋwed-ewuhɔ, ye Shimshai andiwet-ŋwed, ye mme nsaŋa mmɔ efen, mme Dinaite, mme Apharsath-chite, ye mme Tarpelite, ye mme Apharsite, ye mme Archevite, ye mme Babylonian, ye mme Shushanchite, ye mme Dehaite, ye mme Elamite,

10ye mme idut efen emi akamba ɔbɔŋ Osnappar akataŋde edi edinim ke mme obio Samaria, ye mmɔ efen ke edem akpa emi, ye ntre ntre, ewet.

11Emi edi se ekekaŋade ke ŋwed oko enɔde esɔk enye, kpa Artaxerxes edidem. Ikɔt fo, mbio edem akpa emi, ye ntre ntre.

12Yak edidem ɔfiɔk, ete ke mme Jew emi eketode ke edem fo etiene nnyin, emesim Jerusalem, ke enyuŋ ebɔp obio nsɔŋibuot ye idiɔk ido oro, emenyuŋ ema ibibene esie, enyuŋ ediɔŋ isɔŋ ibibene.

13Yak edidem ɔfiɔk, ndien ete ke ema ebɔp obio emi, ema enyuŋ ema ibibene esie, mmɔ idinɔŋɔ utomo, ye comey, ye utip, ndien afo eyenam ŋkpɔ edidem atak.

14Mmɔdo, koro nnyin idiade inuŋ ke ufɔk edidem, ndien ifɔnke nnyin ndikut nte ŋkpɔ edidem abiarade, oro esin nnyin idɔŋ, ite esian edidem;

15man owo ɔduŋɔre ŋwed ŋkpɔ eyo mme usɔ; ndien afo eyekut ke ŋwed ŋkpɔ eyo oro, onyuŋ ɔfiɔk, ete ke obio emi edi obio nsɔŋibuot, onyuŋ abiat ŋkpɔ ndidem, ye eke mme province, mmɔ ekenyuŋ enam nsɔŋibuot ke esit toto ke eyo oko; oro esin ekebiatde obio emi.

16Nnyin isian edidem, ite ke ema ediɔŋ obio emi, ema enyuŋ ema ibibene esie, ntem ke afo udunyeneke aba udeme ke edem akpa emi.

17Edidem ɔnɔ ŋwed esɔk Rehum ekpeme-ŋwed-ewuhɔ, ye Shimshai ewetŋwed, ye mme nsaŋa mmɔ efen eke eduŋde ke Samaria, ye mmɔ eken eke eduŋde ke edem akpa oko, ete, Ekɔm do ke ini ntem.

18Emetim ekot ŋwed oro mbufo ekenɔde esɔk nnyin, ke iso mi.

19Ndien ami ŋwuk ewuhɔ, ndien mmɔ eduŋɔre, ekut, ete ke obio emi ama emenere idem esie, aŋwana ye ndidem toto ke eyo oko, ekenyuŋ enam nsɔŋibuot ye ndutime ke esit.

20Mkpɔsɔŋ ndidem ekenyuŋ edu ke Jerusalem, enyuŋ eda ubɔŋ ke ofuri edem akpa emi; mmɔ enyuŋ edia utomo, ye comey, ye utip.

21Mbufo ewuk ndien ewuhɔ, ete, yak mbon emi etre, ekunyuŋ ediɔŋ obio emi, tutu ami ŋwuk ewuhɔ.

22Mbufo etim ekpeme, ndien, ekufre ndi-nam ŋkpɔ emi: anam didie edidiɔŋde ɔdiɔŋ ebiat ŋkpɔ edidem eka iso?

23Ekem ke ini ekotde ŋwed edidem Artaxerxes emi ekaŋade, ke iso Rehum, ye Shimshai ewet-ŋwed, ye mme nsaŋa mmɔ, mmɔ ewara edɔk eka ke Jerusalem, etiene mme Jew, enyuŋ eda nsɔŋ-ubɔk ye odudu enam mmɔ edop.

24Ntre ke utom ufɔk Abasi ke Jerusalem odop, onyuŋ ana tutu osim ke udiana-akpa isua ubɔŋ Darius, edidem Persia.