EZEKIEL 22 - Efik Old Bible With Sectional Headings

Mme Idiɔk Ido ke Jerusalem

1NDIEN uyo Jehovah osim mi, ete, Nte afo, eyen owo, eyenyuŋ ekpe ikpe, ekpe ikpe obio iyip?

2Wut enye, ndien, kpukpru mbubiam esie.

3Nyuŋ dɔhɔ ete, Ntem ke Ɔbɔŋ Jehovah ɔdɔhɔ, ete, Obio ke ɔduɔk iyip ke esit, man ini esie edi, enyuŋ anam mbiet ŋkpɔ otuk idem esie man enye edehe.

4Afo emedue isop ke iyip fo emi afo ɔkɔduɔkde, omonyuŋ edehe ke ibɔk emi afo akanamde, ndien afo anam mme usen fo esaŋa ekpere, omonyuŋ osim ke isua fo: oto oro nnim fi ke se mme idut esuenede, ye se kpukpru mme obio esede ke ndek.

5Mmɔ eke ekperede fi, ye mmɔ eke eyomde usuŋ ye afo, eyese fi ke ndek, emi enyiŋ fo edehede, afo onyuŋ etie otime-otime.

6Sese, mbɔŋ Israel kpukpru owo ke ukeme mmɔ edu ke ufɔt fo, man eduɔk iyip.

7Mmɔ ese ete ye eka ke ndek ke ufɔt fo: enam esen owo nnama ke ufɔt fo: efik ebe-akpa ye eyen-akpa ke ufɔt fo.

8Afo ese ndisana ŋkpɔ mi ke ndek; onyuŋ asabare mme sabbath mi.

9Mmɔ eke esaŋade mbia man eduɔk iyip, ke edu ke ufɔt fo: mmɔ enyuŋ edia ŋkpɔ ke enyɔŋ obot ke ufɔt fo: enam oburobut ido ke ufɔt fo.

10Efuhɔre ete mmɔ iferi ke ufɔt fo: ebiat ŋwan eke odude ke esien ke ufɔt fo:

11owo onyuŋ anam oburobut ye ŋwan mbɔhiduŋ esie; owo onyuŋ asabare ŋwan eyen esie ata oburobut oburobut; owo onyuŋ abiat idem eyen-ete esie aŋwan ke ufɔt fo.

12Ebɔ inyene ke ufɔt fo, ete iduɔk iyip; afo ada udori ye nkɔri, onyuŋ adia mbɔhiduŋ fo ke ŋwo, onyuŋ efre mi. Uyo Ɔbɔŋ Jehovah edi emi.

13Ndien, sese, mmakwak ubɔk mi mbaŋa ŋwo fo emi afo owode, ye iyip fo emi afo ɔduɔkde ke ufɔt fo.

14Nte esit fo eyeda, nte ubɔk fo eyenyuŋ ɔsɔŋɔ ke usen eke ami ndinamde ntem ye afo? Ami Jehovah mmɔdɔhɔ, nyenyuŋ nnam.

15Ndien ami nyesuan fi ke otu mme idut, nnyuŋ ŋkpɔri fi nsin ke mme obio, nnyuŋ nsobo ndek fo ke ufɔt fo mma.

16Afo eyenyuŋ asabare idem fo ke enyin mme idut, ndien afo eyefiɔk ete ke ami ndi Jehovah.

17Ndien uyo Jehovah osim mi, ete,

18Eyen owo, ufɔk Israel emekabare edi mbukpeŋ enɔ mi: kpukpru mmɔ edi okpoho, ye idaŋ, ye ukwak, ye ŋket ke ufɔt ikaŋ; mmɔ edi mbukpeŋ silver.

19Mmɔdo ntem ke Ɔbɔŋ Jehovah ɔdɔhɔ, ete, Koro kpukpru mbufo ekabarede edi mbukpeŋ, mmɔdo, sese, ami mmɔŋ ntaŋ mbufo mbok ke ufɔt Jerusalem;

20kpa nte etaŋde silver, ye okuk, ye ukwak, ye ŋket ye idaŋ, esin ke ufɔt ikaŋ, man ebara ikaŋ ke esit etara enye; kpa ntre ke nditaŋ mbufo ke iyaresit mi ye ke ifuresit mi mbon, nnyuŋ ŋkpɔŋ mbufo, nnyuŋ ntara mbufo.

21Ndien nyetaŋ mbufo mbon, nnyuŋ mfuri mbufo ke ikaŋ ifuresit mi, nnyuŋ ntara mbufo ke esit.

22Kpa nte etarade silver ke ufɔt ikaŋ, kpa ntre ke editara mbufo ke esit; ndien mbufo eyefiɔk ete ke ami Jehovah ŋŋwaŋa mbufo ifuresit mi ke idem.

23Ndien uyo Jehovah osim mi, ete,

24Eyen owo, dɔhɔ enye, Afo edi isɔŋ eke minamke enye asana, eke edim midepke ke esit, ke usen ikpahesit.

25Odu mme prophet esie odu ke esit, kpa nte lion okunide awai ŋkpɔ; mmɔ emeta ukpɔŋ; emeda inyene ye ŋkpɔuto: emenam mme ebe-akpa esie ewak ke esit.

26Mme oku esie emebiat mbet mi, enyuŋ esabare ndisana ŋkpɔ mi: mmɔ idianakede ŋkpɔ Abasi ye ŋkpɔ owo inim isio; inyuŋ idiɔŋɔke se idehede ye se isanade; mmɔ enyuŋ ebɔp enyin mmɔ ebaŋa mme sabbath mi; ami nnyuŋ ntie nte ŋkpɔ ndek ke otu mmɔ.

27Mbɔŋ esie ke otu mmɔ ebiet wolf eke ewaide ŋkpɔ, ke eriduɔk iyip, nnyuŋ nsobo ukpɔŋ, man mmɔ edia udori utuk.

28Mme prophet esie enyuŋ eyet mmɔ ndom, ekut nsu, enyuŋ ebre idiɔŋ abiaŋa enɔ mmɔ, edɔhɔ ete, Ntem ke Ɔbɔŋ Jehovah ɔdɔhɔ, ndien Jehovah idɔhɔke.

29Mbio isɔŋ enam nnama, enyuŋ ewo ŋwo, enyuŋ efik eyen ukut ye ubuene, enyuŋ etuk esen owo ke ido eke minenke.

30Ndien ami nyom owo eke edinamde ɔkɔ, onyuŋ adade ke ebiet emi owurede ke iso mi, ke abaŋa isɔŋ, man enye okubiara: edi ŋkwe.

31Ndien ŋŋwaŋa mmɔ ikpahaesit mi ke idem; nnyuŋ nsobo mmɔ ke ifuresit mi; nnyuŋ nda usuŋ mmɔ ndori mmɔ ke ibuot. Uyo Ɔbɔŋ Jehovah edi emi.