MME ŊKE 5 - Efik Old Bible With Sectional Headings

Nduri-utɔŋ Ke Owo Ndisabare Idem Esie

1EYEN mi, nim ibuot ke ɔniɔŋ mi, kpaŋ utɔŋ fo ke mbufiɔk mi.

2Man afo ekpeme nti ekikere, man mkpɔk-inua fo ŋko enim ifiɔk.

3Koro mkpɔk-inua esen aŋwan etɔide aran-ɔkwɔk, nsiŋ esie onyuŋ ɔfiɔnɔ akan aran:

4Edi utit esie odoro nte etidot ekpe, ɔsɔp nte ofut iso iba.

5Ukot esie ɔsuhɔre aka mkpa; ikpat esie osim obio ekpo.

6Man enye okudomo usuŋ uwem, enye oyoyo aka edem eke enye mifiɔkke.

7Mbufo nditɔwɔŋ, ekop ndien uyo mi, ekunyuŋ ekpɔŋ ikɔ inua mi.

8Da usuŋ fo kpɔŋ enye enyan ebiet, kunyuŋ usaŋa ukpere enyin-usuŋ ufɔk esie:

9Mbak afo edinɔ owo efen uyai fo, edinyuŋ ada isua fo ɔnɔ mfiomo:

10Mbak isen owo ediyuhɔ inyene fo: mbak ɔkpɔsɔŋ utom fo edinyuŋ odu ke ufɔk esen owo;

11Ndien afo eyetua ke ukperedem fo, ke ini ikpɔhidem fo ye obukidem fo ebiarade,

12Ndien afo eyedɔhɔ ete, Nsinam ŋkasuade item, esit mi okonyuŋ esede ntunɔ ke ndek?

13Mmeŋkonyuŋ ŋkopke uyo mmɔ eke etemede mi, ŋkonyuŋ ŋkpaŋke utɔŋ nnɔ mmɔ eke ekpepde mi?

14Ayak esisit ŋkpodu ke kpukpru mme idiɔk-ŋkpɔ ke ufɔt esop eke esopde.

15Ŋwɔŋ mmɔŋ ke obube mmɔŋ fo, ye mbit-mbit mmɔŋ ke idim fo.

16Enyin idim fo eyesiaha ke esien, akpa mmɔŋ ke aŋwa;

17Eyedi okuo ikpɔŋ, ndien ididige eke esen owo ŋko.

18Yak ɔfɔn ɔnɔ obube mmɔŋ fo, nyuŋ dara ŋwan uyen fo.

19Edima okoyo, ediye edop; yak eba esie enem fi kpukpru ini; yak ima esie osuk oyuhɔ fi.

20Ndien, eyen mi, esen aŋwan edinam didie ɔyuhɔ fi, afo edinyuŋ anam didie afat ikpanesit aŋwan idut?

21Koro mme usuŋ owo enade iŋwaŋ ke iso Jehovah, enye onyuŋ odomo kpukpru ido owo.

22Oburobut ido idiɔk owo eyemum enye, uruk idiɔk-ŋkpɔ esiemɔ eyenyuŋ ɔsɔŋɔ esike enye.

23Enye eyekpa ke unana item; eyenyuŋ ɔduɔ ke uwak ndisime esie.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help