ŊWED MME PSALM 106 - Efik Old Bible With Sectional Headings

Nturutɔŋ Nditɔ Israel ye Mfɔnido Abasi Ɔnɔ Ikɔt Esie

1MBUFO etoro Jehovah. Oh Mbufo ekɔm Jehovah; koro enye ɔfɔnde;

2koro ima esie ebigide ke nsinsi. Anie ekeme nditaŋ ese Jehovah, nnyuŋ mbuk ofuri itoro esie?

3Ɔfɔfɔn ɔnɔ mmɔ eke ekpemede se inende; (ɔfɔfɔn ɔnɔ) owo eke anamde eti ido kpukpru ini.

4O Jehovah, da mfɔnido ikɔt fo ti mi; da erinyaŋa fo tiene mi:

5man ŋkut nti ŋkpɔ mbon emi afo emekde, nnyuŋ ndat esit ke idaresit ikɔt fo, nnyuŋ mbure mbure ye udeme fo.

6Nnyin imetiene mme ete nnyin inam idiɔk; imanam ukwaŋŋkpɔ, imanam idiɔk.

7Mme ete nnyin ke Egypt iketimke ikere mme utibe ŋkpɔ fo; mmɔ itihi uwak ŋkpɔ ima fo; edi esɔŋ ibuot ke inyaŋ, kpa Ididuot Inyaŋ.

8Ndien enye anyaŋa mmɔ ke abaŋa enyiŋ esiemɔ; man anam mmɔ efiɔk odudu esie. Enye onyuŋ aduari Ididuot Inyaŋ, ndien Inyaŋ asat:

9enye onyuŋ ada mmɔ asaŋa ke udem, kpa nte ke wilderness.

10Ndien enye anyaŋa mmɔ osio andisua ke ubɔk, onyuŋ afak mmɔ osio ke ubɔk owo utɔk.

11Ndien mmɔŋ ofuk mme asua mmɔ: baba owo mmɔ kiet isuhɔke.

12Ndien mmɔ enim ikɔ esie ke akpanikɔ; mmɔ ekwɔ itoro esie.

13Mmɔ esɔp ndifre se enye akanamde; mmɔ ibetke item esie.

14Ndien idiɔk itɔŋ ɔdɔŋ mmɔ ke wilderness; mmɔ enyuŋ edomo Abasi ke desert.

15Ndien enye ɔnɔ mmɔ se eyomde; edi esin mmɔ ndiɔkidem ke ukpɔŋ.

16Mmɔ enyuŋ efube ye Moses ke nna, ye Aaron edisana owo Jehovah ŋko.

17Isɔŋ asiaha emen Dathan, onyuŋ ofuk udim Abiram.

18Ndien ikaŋ obubere ke otu udim mmɔ; edem-ikaŋ onyuŋ ɔfɔp mme idiɔk owo.

19Mmɔ enam eyen-enaŋ ke Horab, enyuŋ etuak ibuot enɔ editara mbiet.

20Ntem ke mmɔ eda ubɔŋ mmɔ ekpuhɔ ke se ibietde enaŋ eke atade mbiet.

21Mmɔ efre Abasi, andinyaŋa mmɔ, emi akanamde ikpɔ ŋkpɔ ke Egypt;

22mme utibe ŋkpɔ ke isɔŋ Ham, ye ŋkpɔ ndik ke Ididuot Inyaŋ.

23Ndien enye ɔdɔhɔ, ete ke imɔ ikposobo mmɔ, ke mikpedige Moses edimek owo esie akada enye ke iso ke ɔtɔ ŋwure, onyuŋ akabare iyaresit esie efep, mbak edisobo mmɔ.

24Mmɔ enyuŋ ese ediye isɔŋ oro ke ndek, inyuŋ inimke uyo esie ke akpanikɔ.

25Ndien mmɔ esuk uyo ke mme tent mmɔ; ikopke uyo Jehovah.

26Ndien enye emenere ubɔk esie abaŋa mmɔ, ete imen mmɔ iduɔk ke wilderness:

27inyuŋ iduɔk ubon mmɔ ke otu mme idut, inyuŋ isuan mmɔ ke ererimbot.

28Ndien mmɔ edian idem-mmɔ ye Baal-peor, enyuŋ eta mme uwa mme akpa-mkpa.

29Ntre ke mmɔ eyat enye esit ke mme idiɔk ido mmɔ: ndien ufen obumere ke otu mmɔ.

30Ndien Phinehas adaha ke enyɔŋ ekpe-ikpe: ntre ke ufen odop.

31Ndien ebat oro ke eti ido enɔ enye, ke ofuri emana ke nsinsi.

32Mmɔ enyuŋ eyat enye esit ke ɔtɔ mmɔŋ Meribah, ndien ɔdiɔk ye Moses abaŋa mmɔ:

33koro mmɔ eyatde enye esit, ndien enye ɔsɔp inua ɔdɔhɔ ikɔ.

34Mmɔ isoboke mme idut oro Jehovah ɔkɔdɔhɔde mmɔ.

35Edi ebuana ŋkpɔ ye mme idut, enyuŋ ekpep ido mmɔ.

36Enyuŋ enam ŋkpɔ ndem mmɔ: ndien mmɔ ekabare edi mfine ye mmɔ.

37Enyuŋ ewa nditɔ mmɔ iren ye iban enɔ demon,

38enyuŋ eduɔk iyip owo eke miduehe isop, kpa iyip nditɔ mmɔ iren ye iban, emi mmɔ ewade enɔ ndem Canaan: ndien isɔŋ abiara ke iyip.

39Ntre ke mmɔ esabare idem-mmɔ ke ŋkpɔ eke mmɔ ekenamde, enyuŋ enam use ke idiɔk ido mmɔ.

40Ndien iyaresit Jehovah obumere ye ikɔt esie, enye onyuŋ asua udeme esie eti-eti.

41Ndien enye ada mmɔ esin mme idut ke ubɔk; ndien mmɔ eke esuade mmɔ enyuŋ ekara mmɔ.

42Ndien mme asua mmɔ etuk mmɔ; ndien mmɔ esuk idem ke idak ubɔk mmɔ.

43Enye anyaŋa mmɔ ediwak ini, ndien mmɔ esɔŋ ibuot ke uduak mmɔ, ndien etaha ke idiɔk ido mmɔ.

44Ndien enye ese ukut mmɔ, ke ini enye okopde eseme mmɔ:

45onyuŋ eti ediomi esie ɔnɔ mmɔ, onyuŋ atua mmɔ mbɔm ke uwak ima esie.

46Ndien enye esin kpukpru mmɔ oro etaŋde mmɔ efep etua mmɔ mbɔm.

47O Jehovah Abasi nnyin, nyaŋa nnyin, nyuŋ taŋ nnyin ke mme idut di bon, man nnyin ikɔm edisana enyiŋ fo, inyuŋ ibure mbure ke itoro fo.

48Mbufo etoro Jehovah Abasi Israel, ke nsinsi-nsinsi. Yak ofuri obio enyuŋ edɔhɔ, ete, Amen.

Mbufo etoro Jehovah.