HABAKKUK 2 - Efik Old Bible With Sectional Headings

Abasi Ɔnɔ Habakkuk Ibɔrɔ

1NYEDA ke itie-ukpeme mi, nnyuŋ nnim idem ke enyɔŋ ɔkpɔsɔŋ ɔtɔ obio, nnyuŋ ntiŋ enyin man ŋkut se enye edidɔhɔde mi, ye se ndibɔrɔde mbaŋa nduari mi.

2Ndien Jehovah ɔbɔrɔ mi onyuŋ ɔdɔhɔ, ete, Wet ŋkukut emi, nyuŋ kap enye sin ke itiat ŋwed, man andikot enye ɔsɔp ukot.

3Koro ŋkukut anade kaŋa ɔnɔ ini emi enimde; ndien enye eyesioro uyo ke utit, idinyuŋ isuhɔ nsu: enye ama ebigi, bet enye; koro enye miditreke ndidi, midinyuŋ ibehe ini.

4Sese, owo ntaŋidem! ukpɔŋ esie inenke enye ke idem: ndien edinen owo eyedu uwem ke mbuɔtidem esie.

5Ndien ŋko wine abiaŋa, enye edi owo iseri, ndien itiehe suŋ: koro udɔŋ esie aŋwaŋade nte udi, enye onyuŋ ebiet mkpa, inyuŋ iyuhɔke, onyuŋ ataŋ kpukpru mme idut ke idem-esie, onyuŋ obon kpukpru mme obio ke ɔtɔ esie.

6Nte mme mmɔ emi kpukpru idimenke ikwɔ ibaŋa enye, imen ŋke nsahi ituk enye, inyuŋ idɔhɔ, ite, Osuk ɔdiɔk ɔnɔ owo eke ɔkɔde ediwak ŋkpɔ eke minyeneke enye: adaŋa didie? onyuŋ adade mbiomo ŋkpɔ ubɔŋ odori idem esie.

7Nte mmɔ eke ediade fi akwa udori ididahake ke enyɔŋ ini kiet? Nte mmɔ eke ekɔbɔde fi idinyuŋ idemekede? ndien afo akabare edi mbume mmɔ.

8Koro afo owode ediwak mme idut, kpukpru mme idut eke esuhɔde eyenyuŋ ebume fi, ebaŋa iyip owo, ye afai isɔŋ, ye eke obio, ye eke kpukpru mme andiduŋ ke esit.

9Osuk ɔdɔdiɔk ɔnɔ owo eke adiade idiɔk udori ɔnɔ ufɔk esie, onyuŋ emenerede efɔk esie onim ke enyɔŋ:

10man enye ɔbɔhɔ ubɔk idiɔk-ŋkpɔ! Afo amaduak but ɔnɔ ufɔk fo ke erikpok ediwak owo,

11omonyuŋ anam idiɔk ye ukpɔŋ fo. Koro itiat etiede ke ibibene eseme, ndien eto umum ufɔk etiede ke obukpɔk eke ekɔŋde eyere enye (ete),

12Osuk ɔdɔdiɔk ɔnɔ owo eke adade iyip ɔbɔp obio,

13onyuŋ ɔsɔŋɔde onim obio ke ukwaŋ-ŋkpɔ! Sese, nte idige Jehovah mme udim esin mme idut ekpa utom enɔ idem ikaŋ,

14esin mme obio ekpa mba ke ikpikpu? Koro ifiɔk ubɔŋ Jehovah eyeyɔhɔ ke ererimbot, kpa nte mmɔŋ ofukde inyaŋ.

15Osuk ɔdɔdiɔk ɔnɔ owo eke ɔnɔde mbɔhiduŋ esie ŋkpɔ ɔŋwɔŋ; eke ɔtɔhɔde ifuresit fo, onyuŋ anamde enye ɔŋwɔŋ akpa, man enye okut mmɔ iferi!

16But ɔyɔhɔ fi ke idem, idige ubɔŋ: afo ŋwɔŋ ŋko; ndien eyekut ete ke unaŋa mbobi: cup ubɔk nnasia Jehovah eyekanade osim fi:

17ikpɔhi ye but eyenyuŋ edoro ke ubɔŋ fo. Koro afai Lebanon eyefuk fi, ye nsobo mme unam emi ekesinde mmɔ ndik, ebaŋa iyip owo, ye afai isɔŋ, ye eke obio, ye eke kpukpru mme andiduŋ ke esit.

18Edisɔi mbiet odoro owo nso udori koro andibot enye ɔsiɔide enye? Editara mbiet ye andikpep nsu edoro owo nso udori, koro andibot ŋkpɔ-usɔ esie ɔbuɔtde idem ke esit, onyuŋ anamde ŋkpɔ eke edide ikpikpu ye imum?

19Osuk ɔdɔdiɔk ɔnɔ owo eke ɔdɔhɔde eto, ete, Demere! men Idem! ɔdɔhɔ imum itiat, ete, Enye eyeteme! Sese, mmɔ ekubi enye gold ye silver;

20baba ibifik inyuŋ iduhe enye ke esit. Ndien Jehovah odu ke edisana temple esie: ofuri ererimbot, dop uyo ke iso esie.