2 PETER 1 - Efik Old Bible With Sectional Headings

Yak Ikot ye Edimek Emi Abasi Emekde Nnyin Okuwɔrɔ Ikpuikpu

1SIMON PETER, emi edide owo ye apostle Jesus Christ, ewet ŋwed emi ɔnɔ esɔk mmɔ emi ekɔbɔde utɔ ɔsɔŋ-urua mbuɔtidem eke ebietde eke nnyin, ke edinen ido Abasi nnyin ye Andinyaŋa Jesus Christ.

2Mfɔn ye emem akpakam oto ke erifiɔk Abasi ye Jesus Ɔbɔŋ nnyin etiene mbufo uwak-uwak.

3Sia Odudu Abasi ama ɔkɔnɔ nnyin kpukpru ŋkpɔ eke esaŋade ye uwem ye uteŋe Abasi, oto erifiɔk Enye emi akadade ubɔŋ ye nti ido Esie okot nnyin;

4emi Enye okonyuŋ adade ɔnɔ nnyin mme uŋwɔŋɔ eke esɔŋde urua enyuŋ ekponde eti-eti; man mbufo eda mmɔ ekabare ebuana ke uduot Abasi, ke ema ekebɔhɔ mbiara emi idiɔk itɔŋ esinde ke ererimbot;

5ke ntak emi ndien, mbufo ke ŋkaŋ mbufo esin ifik ke ofuri ukeme edian eti ido ke mbuɔtidem mbufo, enyuŋ edian ifiɔk ke eti ido, enyuŋ edian erifara ke idem ke ifiɔk,

6ye ime ke erifara ke idem,

7ye uteŋe Abasi ke ime, ye iman ke uteŋe Abasi, ye ima ke iman.

8Koro edieke mme ŋkpɔ emi edude ke esit mbufo ɔyɔhɔ-ɔyɔhɔ, mmɔ eyenam mbufo ekutie ifu, ekunyuŋ enana mfri ke erifiɔk Ɔbɔŋ nnyin Jesus Christ.

9Koro owo eke minyeneke mme ŋkpɔ emi edi nnan, itimke ikut usuŋ, onyuŋ efre ete, ema eyet imɔ ŋkani mme idiɔk-ŋkpɔ efep, enyuŋ enam imɔ isana.

10Ntre nditɔ-ete, edɔdiɔŋ esin ifik enam ikot eke ekekotde mbufo ye erimek eke emekde mbufo ɔsɔŋɔ ada: koro edieke mbufo enamde mme ŋkpɔ emi mbufo idikɔmɔke iduɔ;

11koro edi ntem ke edinɔ mbufo ɔyɔhɔ odudu ndibe nduk ke nsinsi Obio Ubɔŋ Ɔbɔŋ ye Andinyaŋa nnyin Jesus Christ.

12Ke ntak emi nduak nditi mbufo ŋkpɔ emi kpukpru ini, okposuk edi nte mbufo efiɔkde mmɔ, enyuŋ esɔŋɔde eda ke akpanikɔ eke odude ye mbufo.

13Nnyuŋ mbat nte enen mi ndidemere mbufo ke eriti mbufo ŋkpɔ emi, adaŋa ini nte ndodu ke ataya emi;

14sia mfiɔkde nte eyewara ndifut ataya mi nnim ŋkaŋ kiet, nte Ɔbɔŋ nnyin Jesus okowutde mi.

15Ke akpanikɔ nyesin ifik nti mbufo, man mma ndaha, mbufo ekpekeme nditi mme ŋkpɔ emi kpukpru ini.

16Koro nnyin ikeyireke ikpikpu mbuk, eke owo edade mbufiɔk etibi, ke adaŋemi nnyin inamde mbufo efiɔk odudu ye eridi Ɔbɔŋ nnyin Jesus Christ; edi nnyin ke idem nnyin iketie ise ubom Esie.

17Koro Enye ɔkɔbɔ ukpono ye ubɔŋ ke ubɔk Abasi Ete, ke adaŋemi uyo otode ke akakan ubɔŋ oro osim Enye ntem, ete, Emi edi Eyen mi, Eyen ima Mi, emi esit enemde Mi ye Enye:

18nnyin ke idem nnyin ikokop uyo oro, nte otode ke enyɔŋ ɔwɔrɔ, ke ini nnyin idude ye Enye ke edisana obot oro.

19Ndien ema edɔdiɔŋ esɔŋɔ ikɔ mme prophet ekan enɔ nnyin; ndien mbufo eyetim enam, edieke mbufo edibiɔŋde utɔŋ ke ikɔ oro, nte owo esese utuenikaŋ eke ayamade ke ŋkim-ŋkim ebiet, tutu eyo esiere, utin onyuŋ asiaha ke esit mbufo;

20sia mbufo efiɔkde ke akpa itie, ete, baba ikɔ prophet kiet ke Ŋwed Abasi idige se owo ekemede ndisiak ke usuŋ esie mmɔ.

21Koro akanam baba ikɔ prophet itoho ke uduak owo: edi mme owo etiŋ ikɔ eke otode Abasi, nte Edisana Spirit esinde mmɔ etiŋ.