EZEKIEL 17 - Efik Old Bible With Sectional Headings

Ŋke Emi Ebaŋade Ntrukpom Iba ye Eto Vine

1EKEM uyo Jehovah osim mi, ete,

2Eyen owo, top ŋke, nyuŋ tiŋ parable nɔ ufɔk Israel; nyuŋ dɔhɔ ete,

3Ntem ke Ɔbɔŋ Jehovah ɔdɔhɔ ete, Akwa ntrukpom emi mba okponide, ntaŋ mba enyuŋ eniɔŋide, ntaŋ enyuŋ eyɔhɔde enye ke idem, emi ewerede nsio-nsio, aka Lebanon akada nsom cedar:

4enye okibi nsehe ibuot esie; onyuŋ emen enye edi ke isɔŋ urua, onyuŋ ɔtɔ enye ke obio mbon-urua.

5Enye onyuŋ ada ndusuk mkpasip isɔŋ ɔkɔtɔ enye ke iŋwaŋ mkpasip; ada aka ke mben akwa mmɔŋ, ɔtɔ enye nte willow.

6Ndien enye otibe, onyuŋ akabare edi vine eke asiahade onyuŋ ɔmuhɔde idaha; mme ŋkɔk esie enyuŋ ekabare ese enye, oruŋ esie onyuŋ odu enye ke idak; ndien enye akabare edi vine, onyuŋ anam ŋkɔk, onyuŋ asiaha ikɔŋ.

7Akwa ntrukpom eŋwen onyuŋ odu emi mba esie ekponide, ntaŋ esie enyuŋ ewakde; ndien, sese, vine emi akabare oruŋ esie oyom enye, onyuŋ anyanare ubɔk esie ɔnɔ enye, ke ibombom emi eketɔde enye, man ebit enye.

8Eketɔ enye ke eti isɔŋ ke mben ediwak mmɔŋ, man asiaha ŋkɔk, onyuŋ oŋwum mfri, man enye akabare edi ata akamba vine.

9Dɔhɔ, ete, Ntem ke Ɔbɔŋ Jehovah ɔdɔhɔ, ete, Nte enye edikut unen? Nte owo ididibekede enye oruŋ, idinyuŋ isibeke mfri esie ifep, man enye asat? Ofuri nsehe ikɔŋ esie eyesat, idinyuŋ idige akamba ubɔk ye ediwak owo edidibere enye ke oruŋ esie efep.

10Ndien, sese, emi eketɔde enye, nte enye edikut unen? Nte enye idisatke ke ini ofum ikɔrabak otukde enye? Enye eyesat ke ibombom emi etɔde enye.

11Ndien uyo Jehovah osim mi, ete,

12Dɔhɔ ndien ufɔk nsɔŋ-ibuot, ete, Nte mbufo ifiɔkke se ŋkpɔ emi edide? Dɔhɔ, ete, Sese, edidem Babylon okosim Jerusalem, okonyuŋ ada edidem esie ye mbɔŋ esie, onyuŋ emen mmɔ ke idemesie ɔnyɔŋ ke Babylon;

13ndien enye ada owo oruk edidem, onyuŋ odiomi ediomi ye enye, onyuŋ anam enye oduk ke uŋwɔŋɔ; onyuŋ ada mkpɔsɔŋ owo isɔŋ efep:

14man ubɔŋ ɔsuhɔre, man ekumenere idem esie ke enyɔŋ, edi onim ediomi esie man enye ɔsɔŋ ada.

15Ndien enye ɔsɔŋ ibuot ye enye, onyuŋ ɔdɔŋ mme isuŋ esie utom ke Egypt, ete enɔ imɔ horse ye ediwak owo. Nte enye eyekut unen? Nte owo eke anamde ŋkpɔ emi eyebɔhɔ? Nte owo eyebiat ediomi, ndien ɔbɔhɔ?

16Ɔbɔŋ Jehovah ɔdɔhɔ, ete, Ma uwem mi, ŋkɔm ke ɔtɔ edidem oro okonimde enye ke edidem, emi enye ekesede uŋwɔŋɔ esie ke ndek, emi enye okonyuŋ abiatde mbet esie, ke enye edikpa ke ɔtɔ esie ke ufɔt Babylon.

17Ndien Pharaoh ŋko ididaha akwa udim ye ediwak otu owo inam ŋkpɔ inɔ enye ke ekɔŋ, ke erikubi ibombom ye ke erikɔŋ akwa ufɔk ekɔŋ, man esibe ediwak ukpɔŋ efep:

18koro enye esede uŋwɔŋɔ ke ndek, onyuŋ abiatde ediomi, (ndien, sese, enye ɔkɔnɔ ubɔk esie) onyuŋ anam kpukpru ŋkpɔ emi, enye idibɔhɔke.

19Mmɔdo ntem ke Ɔbɔŋ Jehovah ɔdɔhɔ ete, Ma uwem mi, ŋkɔm edi uŋwɔŋɔ mi ke enye ekesin ke ndek, onyuŋ edi ediomi mi ke enye akabiat; ndien nyeda enye ndori enye ke ibuot.

20Ndien nyeda iyire mi nduɔk enye ke idem, ndien enye eyemum ke afia mi, ndien nyeda enye ŋka ke Babylon, nnyuŋ ŋkpe ikpe ye enye do, mbaŋa ndudue esie emi enye ekeduede ye ami.

21Ndien kpukpru owo esie eke ebɔhɔde, ye kpukpru mbon-ekɔŋ esie eyeduɔŋɔ ke ofut; ndien mmɔ emi esuhɔde eyesuana esine ke kpukpru mme ofum; ndien mbufo eyefiɔk ete ke edi ami Jehovah ndɔhɔ.

22Ntem ke Ɔbɔŋ Jehovah ɔdɔhɔ ete, Ami nyenyuŋ nda nsom edikoŋ cedar, ntɔ enye ke isɔŋ; nyekibi ibuot nsehe ŋkɔk esie, ndien ami nyetɔ enye ke obot eke okoŋde onyuŋ emenerede ke enyɔŋ:

23nyetɔ enye ke edikoŋ obot Israel: ndien enye eyesiaha ŋkɔk, onyuŋ ŋwum mfri, onyuŋ akabare edi ata akamba cedar: ndien kpukpru inuen kpukpru oruk mba eyeduŋ ke idak esie; mmɔ eyeduŋ ke mfut ŋkɔk esie,

24ndien kpukpru eto ikɔt eyefiɔk ete ke ami Jehovah nduɔk edikoŋ eto, mmenere edinuhɔ eto ke enyɔŋ, nnam nsehe eto asat, nnyuŋ nnam edisat eto esehe: ami Jehovah ndɔhɔ nnyuŋ nnam.