ISAIAH 65 - Efik Old Bible With Sectional Headings

Abasi Eyenɔ Kpukpru mbon Nsɔŋibuot Ufen

1MMƆ eke mikebupke emebine mi; mmɔ eke mikoyomke mi emekut mi: mmɔdɔhɔ idut eke mikereke enyiŋ mi, nte, Se mi, se mi.

2Ke ofuri usen ke nnyanare ubɔk mi nnɔ mbon nsɔŋ-ibuot, emi esaŋade ke usuŋ eke mifɔnke, ebine ekikere idem mmɔ;

3mbio emi eyatde mi esit aŋwa-aŋwa kpukpru ini; eke ewade uwa ke iŋwaŋ-esa, enyuŋ efɔpde incense ke mme brick:

4emi etiede ke mme udi, enyuŋ edaŋde ke ndibe ebiet ke okoneyo, eta unam edi, ndien ŋkpri mbai edidehe unam edu ke eso mmɔ; emi edɔhɔde, ete,

5Da do, kusaŋa ukpere mi, koro nsanade ŋkan fi. Mmɔ emi edi nsuŋikaŋ ke ibuo mi, ikaŋ eke asakde ke ofuri usen.

6Jehovah ɔdɔhɔ ete, Sese, emewet enye ke iso mi: ndidopke uyo, ibɔhɔke ini nsosio usiene, nsosio mme idiɔk ido mbufo, ye eke mme idiɔk ido mme ete mbufo, ini kiet, nsin mmɔ ke ikpanesit;

7koro mmɔ ekefɔpde ŋkpɔ ke enyɔŋ ikpɔ obot, enyuŋ esuenede mi ke enyɔŋ ŋkpri obot: mmɔdo ndidomode akpa utom mmɔ nsin mmɔ ke ikpanesit.

8Ntem ke Jehovah ɔdɔhɔ, ete, Kpa nte ekutde obufa wine ke etuek vine, owo onyuŋ ɔdɔhɔ ete, Kusobo enye: koro eti ŋkpɔ odude enye ke esit: kpa ntre ke ndinam mbaŋa ikɔt mi, man ŋkusobo kpukpru.

9Ndien nyeda mkpasip ke Jacob, ye owo eke adade ikpɔ obot mi enyene ke Judah, ŋwɔrɔ: ndien ndimek owo mi eyeda enye enyene, ikɔt mi eyenyuŋ eduŋ do.

10Ndien Sharon eyekabare edi ebiet eke ŋkpri ufene eduŋde, ebedeŋ Achor eyenyuŋ akabare edi ebiet eke enaŋ edinade, ɔnɔ ikɔt mi emi ebinede mi.

11Edi ama edi mbufo emi ekpɔŋde Jehovah, enyuŋ efrede edisana obot mi, emi ebride okpokoro enɔ Gad, enyuŋ edade mbuaha esin enɔ Meni etɔhɔ;

12mmen mbufo nnim nnɔ ofut, kpukpru mbufo eyenyuŋ enuhɔ enɔ afai: koro ami ŋkotde, edi mbufo iyereke; ndɔhɔ, edi mbufo ikopke; mbufo enyuŋ enam se idiɔkde mi ke enyin, enyuŋ emek se mme-mmaŋa.

13Mmɔdo, ntem ke Ɔbɔŋ Jehovah ɔdɔhɔ, ete, Sese, ikɔt mi eyedia ŋkpɔ, edi biɔŋ eyedɔŋ mbufo: sese, ikɔt mi eyeŋwɔŋ, edi itɔŋ eyesat mbufo: sese, ikɔt mi eyedat esit, edi but eyenam mbufo: sese,

14ikɔt mi eyekwɔ ke idaresit, edi mbufo eyeseme ke ubiak esit, enyuŋ etuaŋa ke ndutuhɔ spirit.

15Ndien mbufo eyekpɔŋ enyiŋ mbufo enim ke ŋkpɔ isuŋi enɔ edimek ikɔt mi: ndien Ɔbɔŋ Jehovah eyewot fi, onyuŋ osio ikɔt esiemɔ enyiŋ efen:

16eke owo eke edidiɔŋde idem esie ke isɔŋ edidade Abasi akpanikɔ ɔdiɔŋ; ye owo eke ediŋwɔŋɔde ke isɔŋ edidade Abasi akpanikɔ ɔŋwɔŋɔ; koro emefre akpa ndutuhɔ: koro mmɔ enyuŋ edibede mi ke enyin.

17Koro, sese, mmɔŋ mbot mbufa enyɔŋ ye obufa isɔŋ, ndien owo iditihi aba akpa oro, idinyuŋ idukke owo ke esit.

18Edi mbufo edat esit, enyuŋ ebre nsinsi ke se ami mbotde: koro, sese, ami mbot Jerusalem ke ŋkpɔ inemesit, mbot mbio esie ke ŋkpɔ idaresit.

19Ndien Jerusalem eyenem mi esit, ikɔt mi eyenyuŋ edat mi: ndien idikopke aba uyo eyet ye uyo eseme ke esit.

20Ndien eyen-nsek ke usen, ye mbiowo eke miyɔhɔke ini esie, idiwɔrɔke aba do: koro akparawa eyekpa ke osimde isua ikie; ndien isuŋi eyeda anam-idiɔk ke osimde isua ikie.

21Ndien mmɔ eyebɔp ufɔk enyuŋ eduŋ ke esit: eyenyuŋ etɔ iŋwaŋ-vine, enyuŋ edia mfri mmɔ.

22Mmɔ idibɔpke, ndien owo eŋwen oduŋ; iditɔhɔ, ndien owo efen adia: koro usen ikɔt mi ebietde usen eto, ndien nedimek ikɔt mi eyedia se ubɔk mmɔ enamde.

23Mmɔ idinamke utom ke ikpikpu, idinyuŋ imanke nditɔ inɔ ŋkpɔ ndik: koro mmɔ ye ubon mmɔ ŋko edide nditɔ mmɔ eke Jehovah ɔdiɔŋde.

24Ndien ama ekem, ke mmɔ mika-ikotke kaŋa, ami nyeyere: ke mmɔ esuk edɔhɔde ikɔ, ami nyekop.

25Wolf ye eyen-erɔŋ eyedia ŋkpɔ ɔtɔ kiet, lion eyenyuŋ ata nnyanyaŋa nte enaŋ: ndien ama edi urukikɔt, ntan eyedi udia esie, Owo idinamke idiɔk, idinyuŋ ibiatke ŋkpɔ ke ofuri edisana obot mi: uyo Jehovah edi emi.