ISAIAH 8 - Efik Old Bible With Sectional Headings

Ebak Abasi

1NDIEN Jehovah ɔdɔhɔ mi, ete, Da akamba ikpa-ŋwed ke idem fo, nyuŋ da nta ŋwed owo wet ke esit, ete, Eke Maher-shalal-hash-baz; (Mbume, wara! Uŋwo, sɔp ukot!)

2Ndien nyeda ntiense akpanikɔ ndian idem, man etie ese, kpa Uriah oku, ye Zechariah eyen Jeberechiah.

3Ndien ntiene prophet aŋwan; ndien enye oyomo, aman eyen-eren. Ndien Jehovah ɔdɔhɔ mi, ete, Sio enye enyiŋ Maher-shalal-hash-baz.

4Koro ke eyenɔwɔŋ emi mika-ifiɔkke nte okotde, ete, Ete mi, ye eka mi! mmɔ eyemen inyene Damascus, ye mbume Samaria, ebiom ke iso edidem Assyria.

5Ekem Jehovah ɔtɔŋɔ ntak ɔdɔhɔ mi ŋko, ete,

6Koro mbio-obio emi esede mmɔŋ Shiloah emi asaŋade suŋ, ke ndek, enyuŋ edatde esit ebaŋa Rezin ye eyen Remaliah: mmɔdo, sese,

7Ɔbɔŋ ke ada mkpɔsɔŋ ye akamba mmɔŋ akpa, kpa edidem Assyria, ye ofuri ubɔŋ esie, ɔdɔk etiene mmɔ: ndien enye eyetɔ ɔyɔhɔ ke ofuri akpa esie, onyuŋ emen ofuri mben esie:

8ndien enye eyebe oduk ke Judah: eyetɔ onyuŋ asaŋa ebe, eyesim ke itɔŋ; ndien eritara mba esie eyedi se iyɔhɔde ubom isɔŋ fo, O Immanuel.

9Mbufo mme idut edama, ndien enuaha; kpukpru mme anyan idut, ekpaŋ utɔŋ mbufo, ebɔbɔ ŋkpɔ ke idem, ndien enuaha; ebɔbɔ ŋkpɔ, ndien enuaha.

10Mbufo eduak uduak, ndien eyekpu: edɔhɔ ikɔ, ndien ididaha: koro Abasi odude ye nnyin.

11Koro ntem ke Jehovah ɔkɔdɔhɔ mi ke ɔkpɔsɔŋ ubɔk esie: onyuŋ eteme mi, ete ŋkusaŋa ke usuŋ mbio-obio emi,

12ete Mbufo ekudɔhɔ, ete, “Odu,” edian kpukpru ŋkpɔ emi mbio-obio emi edɔhɔde ete, “Odu,” edian enye; ekenyuŋ eyak ndik emi anamde mmɔ anam mbufo, ekunyuŋ enyek.

13Mbufo enim idem Jehovah mme udim ke edisana; eyak enye onyuŋ edi se mbufo ebakde enyuŋ edikhede.

14Ndien enye eyedi se ufɔk Israel mbiba enimde ke edisana, ye itiat utuaha, ye akwa itiat eke esinde mmɔ eduɔŋɔ, ye afia ye mfine mme andiduŋ Jerusalem.

15Ndien ediwak owo ke otu mmɔ eyetuak ukot ke esit, enyuŋ eduɔŋɔ, enyuŋ enuaha, enyuŋ esike, enyuŋ eduɔ ke mfine.

16Bɔp ŋwed ntiense, fik seal ke ewuhɔ ke otu mmɔ emi ntemede.

17Ndien nyebet Jehovah emi odipde ufɔk Jacob iso esie, nyenyuŋ ndori enye enyin mi.

18Sese ami ye nditɔ emi Jehovah ɔnɔde mi, idi mme idiɔŋɔ ye ŋkpɔ ndyɔ ke Israel, ito Jehovah mme udim emi oduŋde ke obot Zion.

19Ndien adaŋemi mmɔ edɔhɔde mbufo, ete, Mbufo ebup ndem, ye mbia-idiɔŋ emi ekunide, enyuŋ enunde ikɔ: nte mbio ikpobupke Abasi mmɔ? (Nte ekpebup) mme akpa-mkpa enɔ mme odu-uwem?

20Ebup ewuhɔ ye ŋwed ntiense: ke mmɔ minyimeke ndidɔhɔ nte ekemde ye ikɔ emi, ke edi mmɔ eke midikwe usiere.

21Ndien mmɔ eyesaŋa ke esit ebe ke nnanenyin ye biɔŋ: ndien ama ekem ke biɔŋ ɔdɔŋde mmɔ, mmɔ eyeyat esit, enyuŋ esuŋi edidem mmɔ ye Abasi mmɔ, enyuŋ emenere iso mmɔ ke enyɔŋ.

22Ndien mmɔ eyewuk enyin ese isɔŋ; ndien sese nnanenyin ye ekim, ekim ukut, eyenyuŋ ebin enye esin ke ɔkpɔsɔŋ ekim.