JOSHUA 7 - Efik Old Bible With Sectional Headings

Ukwaŋ Ido Emi Achan Akanamde ye Ufen Esie

1EDI nditɔ Israel ebiat mbet ke ikɔ ŋkpɔ nsobo: koro Achan, eyen Carmi, eyen Zabdi, eyen Zerah, owo esien Judah, akadade ndusuk ŋkpɔ nsobo: ndien Jehovah ayat esit ye nditɔ Israel.

2Ekem Joshua etie ke Jericho ɔdɔŋ owo, ete eka Ai, emi ekperede Beth-aven, ke edem Bethel emi utin asiahade, onyuŋ ɔdɔhɔ mmɔ, ete, Mbufo edɔk ekeyep isɔŋ oro. Ndien mbon oro edɔk ekeyep Ai.

3Ekem mmɔ efiak etiene Joshua, enyuŋ edɔhɔ enye, ete, Kunam kpukpru owo edɔk; yak tɔsin owo iba, mme tɔsin owo ita edɔk ekesobo Ai, kunam kpukpru owo eka utom do: koro mmɔ oro edide esisit.

4Ndien adaŋa tɔsin owo ita edɔk eka do: ndien mmɔ efeŋe itɔk ke iso nditɔ Ai.

5Nditɔ Ai enyuŋ ewot mmɔ osim adaŋa owo edip ye efurekiet: ndien ebine mmɔ, ɔtɔŋɔde ke inua-otop obio tutu osim ke Shebarim, enyuŋ ewot mmɔ ke usuhɔre: mmɔdo esit ɔduɔde kpukpru owo, onyuŋ akabarede emem nte mmɔŋ.

6Ndien Joshua awai ɔfɔŋidem esiemɔ, onyuŋ ɔduɔ ke isɔŋ okubi iso esie ke iso Jehovah, tutu osim ke mbubreyo, enye ye mbiowo Israel, mmɔ enyuŋ eda ntɔŋ eduɔk ke ibuot mmɔ.

7Ndien Joshua ɔdɔhɔ ete, O Jehovah ɔbɔŋ, nsinam afo adade mbio emi ebe Jordan, onyuŋ adade nnyin esin mme Amorite ke ubɔk, man esobo nnyin? Nnyin ikpekam ima nditie ke edem Jordan oko!

8O Ɔbɔŋ, ndidɔhɔ didie, ke Israel ekpade edem enɔ mme asua mmɔ?

9Mme Canaanite ye kpukpru mme andiduŋ isɔŋ emi, eyenyuŋ ekop, enyuŋ ekan nnyin ekuk, enyuŋ esibe enyiŋ nnyin ke isɔŋ efep: ndien afo edinam didie ye akwa enyiŋ fo?

10Ndien Jehovah ɔdɔhɔ Joshua, ete, Daha ke enyɔŋ: nsinam afo ɔduɔde ke isɔŋ okubi iso fo ntem?

11Israel ama anam idiɔk ŋkpɔ, mmɔ ema enyuŋ ebiat ediomi mi emi ŋkowukde mmɔ; ema enyuŋ eda ndusuk ŋkpɔ nsobo, enyuŋ eyip, enyuŋ edip, enyuŋ esin ke otu ŋkpɔ mmɔ

12Ndien nditɔ Israel ikwe nte edade ke iso mme asua mmɔ, mmɔ ekpa edem enɔ mme asua mmɔ, koro mmɔ edide ŋkpɔ nsobo: ndinyuŋ nduhe aba ye mbufo, ke mbufo misoboke ŋkpɔ nsobo ke otu mbufo ifep.

13Daha ke enyɔŋ, nam kpukpru owo esana, nyuŋ dɔhɔ mmɔ, ete, Mbufo enam idem mbufo esana ebeŋe mkpɔŋ: koro ntem ke Jehovah Abasi Israel ɔdɔhɔ ete, Nkpɔ nsobo mmɔdo ke otu mbufo, O Israel; mbufo idikwe nte edada ke iso mme asua mbufo, tutu esio ŋkpɔ nsobo ke otu mbufo efep.

14Ndien yak eda mme esien mbufo esaŋa ke usenubɔk ekpere: ndien ama ekem, yak esien emi Jehovah edidade edi ke ubon, ke ubon; ndien yak ubon emi Jehovah edidade edi ke ufɔk, ke ufɔk; ndien yak ufɔk emi Jehovah edidade edi owo kiet kiet.

15Ndien ama ekem, yak eda owo emi edimumde enye ŋkpɔ nsobo ke ubɔk, efɔp ke ikaŋ ye kpukpru se enye enyenede: koro enye ama abiat ediomi Jehovah: koro enye ama onyuŋ anam oburobut ido ke Israel.

16Ekem, Joshua abak ke usenubɔk adaha ke enyɔŋ, ndien ada Israel edi ke esien, ke esien, ndien eda esien Judah.

17Ndien enye ada ubon Judah edi; ndien eda ubon mme Zerahite. Ndien enye ada ubon mme Zerahite, owo kiet kiet, edi, ndien eda Zabdi.

18Ndien enye ada ufɔk esie owo kiet kiet, edi; ndien eda Achan, eyen Carmi, eyen Zabdi, eyen Zerah, owo esien Judah.

19Ndien Joshua ɔdɔhɔ Achan, ete, Mbɔk, eyen mi, kpono Jehovah Abasi Israel, nyuŋ toro enye; nyuŋ men se afo akanamde tiŋ nɔ mi, mbɔk, kudip mi.

20Ndien Achan ɔbɔrɔ Joshua, ete, Kakpan ke ami ndue Jehovah, Abasi Israel, mma nnyuŋ nnam ntem ye ntem:

21ke adaŋa emi ŋkutde eti ekura Shinar kiet, ye shekel silver ikie iba, ye edeme o gold kiet, emi udobi esie edide shekel aba ye duop, ke otu ŋkpɔ mbume, nsin mmɔ esit mi ke esit, nnyuŋ nda mmɔ; ndien sese, mmɔ ebuhɔ ke isɔŋ ke ufɔt tent mi, silver onyuŋ edu ke idak.

22Ndien Joshua ɔdɔŋ mme isuŋ-utom, ndien mmɔ efeŋe eka tent esie; ndien, sese, ŋkpɔ oro ebuhɔ ke ufɔt tent esie, silver onyuŋ odu mmɔ ke idak.

23Ndien mmɔ esio mmɔ ke ufɔt tent esie, eda edisɔk Joshua, ye kpukpru nditɔ Israel, enyuŋ ebon mmɔ ke iso Jehovah.

24Ekem Joshua ada Achan eyen Zerah, ye silver oro, ye ekura ye edeme o gold, ye nditɔ-iren esie, ye nditɔ-iban esie, ye enaŋ esie, ye mme ass esie, ye ŋkpri ufene esie, ye tent esie, ye kpukpru se enye enyenede, ofuri Israel enyuŋ esaŋa ye enye: ndien eda mmɔ edɔk ke ebedeŋ Achor.

25Ndien Joshua ɔdɔhɔ ete, Nsinam afo ɔkɔtuhɔrede nnyin? Jehovah eyetuhɔ fi mfin emi. Ndien ofuri Israel etɔŋɔ enye ke itiat, enyuŋ efɔp mmɔ ke ikaŋ, enyuŋ etomo itiat efuk mmɔ.

26Ndien mmɔ ekubi enye akamba ebok itiat ke idem, tutu osim mfin emi. Ntem ke Jehovah akabare ɔkpɔŋ ikaŋ iyaresit esie. Mmɔdo enyiŋ ebiet oro ekerede ebedeŋ Achor (ndutuhɔ), tutu osim mfin emi.