EZEKIEL 32 - Efik Old Bible With Sectional Headings

Eda Edidem Egypt Edomo ye Ofiom

1EDIKEM ke ɔyɔhɔ isua duopeba, ke ɔyɔhɔ ɔfiɔŋ duopeba, ke akpa usen ɔfiɔŋ, uyo Jehovah edisim mi, ete,

2Eyen owo, men ikwɔ eseme baŋa Pharaoh edidem Egypt, nyuŋ dɔhɔ enye, ete,

Afo ekebiet akparawa lion mme idut, afo onyuŋ edi ofiom ke akwa mmɔŋ, onyuŋ oto ke mme akpa mmɔŋ fo obumere ɔwɔrɔ, onyuŋ etimere mmɔŋ ke ukot fo, onyuŋ anam mmɔŋ mmɔ edehe.

3Ntem ke Ɔbɔŋ Jehovah ɔdɔhɔ, ete, Nyetat ndien iyire mi nduɔk fi ke idem ke otu ediwak mme idut; ndien mmɔ eyeda iyire mi ekot fi esio.

4Ndien nyekpɔŋ fi ke isɔŋ, nyeduɔk fi ke isɔŋ, nnyuŋ nnam kpukpru mme inuen enyɔŋ esɔrɔ fi ke idem, nnyuŋ nda fi nyuhɔ mme unam ofuri ererimbot.

5Nyenyuŋ nnim unam fo ke ikpɔ obot, nnyuŋ nda ubom fo nyɔhɔ ke mme itihere.

6Nyenyuŋ nda se itode fi ke idem kpa ke iyip fo emi edisimde ikpɔ obot nnɔ isɔŋ ɔŋwɔŋ; se itode fi ke idem eyenyuŋ ɔyɔhɔ ke mme itihere.

7Ndien ke ini nnimede fi nyefuk ikpa-enyɔŋ, nnyuŋ nnam ntanta-ɔfiɔŋ mmɔ ebire; nyenyuŋ nda obubit enyɔŋ mfuk utin, ɔfiɔŋ idinyuŋ iyamake uyama esie.

8Nyenam kpukpru mme uŋwana emi eyamade ke ikpa-enyɔŋ ebire ebaŋa fi, nnyuŋ nda ekim mfuk isɔŋ fo: uyo Ɔbɔŋ Jehovah edi emi.

9Nyenyuŋ nyat ediwak owo esit ke ini ndidade ŋwure fo nsin mme idut ke edem eke afo mufiɔkke.

10Nyenyuŋ nnam ediwak obio ekpa idem ebaŋa fi, nsia eyenyuŋ oyomo ndidem mmɔ ebaŋa fi, ke ini mfuŋde ofut mi ke iso mmɔ; ndien idem eyenyek kpukpru owo abaŋa uwem mmɔ kpukpru ini ke usen iduɔ fo.

11Koro ntem ke Ɔbɔŋ Jehovah ɔdɔhɔ, ete, Ofut edidem Babylon eyesim fi.

12Nyeda ofut mbon-uko, kpa mme idut enyene-ndik kpukpru mmɔ nduɔk mme udim fo, ndien mmɔ eyebiat iseri Egypt, ofuri otu owo esie eyenyuŋ esobo.

13Nyenyuŋ nsobo kpukpru ufene esie ke mben akamba mmɔŋ mfep; ndien ukot owo iditimekede aba mmɔ, ikpat ufene idinyuŋ itimekede aba mmɔ.

14Nyenyuŋ nnam mmɔŋ osuk, nnyuŋ nnam mmɔŋ mmɔ asaŋa aka nte aran; emi edi uyo Ɔbɔŋ Jehovah.

15Ke ini nnimde isɔŋ Egypt ndon-ndon, ke ini enyuŋ esobode se iyɔhɔde ke isɔŋ, ke ini nsuande kpukpru mme andiduŋ ke esit: ndien mmɔ eyefiɔk ete ke ami ndi Jehovah.

16Emi edi ikwɔ eseme, ndien mmɔ eseme enye; nditɔ-iban mme idut eyeseme enye; mmɔ eyeseme enye, kpa Egypt ye ofuri otu owo esie. Uyo Ɔbɔŋ Jehovah edi emi.

17Edikem ke ɔyɔhɔ isua duopeba, ke usen ɔfiɔŋ efut, uyo Jehovah edisim mi, ete,

18Eyen owo, tua baŋa akwa otu owo Egypt, nyuŋ nam mmɔ, kpa enye, ye nditɔ-iban mkpɔsɔŋ mme idut esuhɔre ke idak isɔŋ, ye mme mmɔ emi esuhɔrede ke obube.

19Afo enem anie akan? Suhɔre na ye mbon edut.

20Mmɔ eduɔŋɔ ke otu mmɔ emi ekewotde mmɔ ke ofut; emeda enye enɔ ofut: mbufo edudi enye ke ofuri otu owo esie.

21Mbɔŋ mbon-uko eyetie ke obio ekpo edɔhɔ enye ye mme mmɔ emi eŋwamde enye: mmɔ emesuhɔre, ena do, kpa mbon edut emi ekewotde mmɔ ke ofut.

22Asshur mmɔdo ye ofuri udim esie: mme udi esie ekan enye ekuk, ekewot mmɔ kpukpru, mmɔ ekeduɔŋɔ ke ofut:

23emi ekenimde udi mmɔ ke ŋkaŋ obube, ndien otu owo esie ekan mme udi esie ekuk: ekewot kpukpru mmɔ, mmɔ ekeduɔŋɔ ke ofut, kpa mmɔ oro ekesinde owo ndik ke isɔŋ mme odu-uwem.

24Elam mmɔdo, ofuri otu owo esie enyuŋ ekan mme udi esie ekuk, kpukpru mmɔ eda unan eduɔŋɔ ke ofut; emi esuhɔrede nte mbon edut ke idak isɔŋ, emi enamde mmɔ edikhe ke isɔŋ mme odu-uwem; mmɔ enyuŋ ebiom esuene mmɔ ye mmɔ oro ekesuhɔrede ke obube.

25Mmɔ enim bed enɔ enye ye ofuri otu owo esie ke otu mmɔ emi ekewotde: mme udi esie ekan enye ekuk: kpukpru mmɔ edi mbon edut emi ekekimde ke ofut: koro enamde owo edikhe mmɔ ke isɔŋ mme odu uwem, ndien mmɔ eyebiom esuene mmɔ ye mmɔ emi esuhɔrede ke obube: enim enye ke otu mmɔ emi ekewotde.

26Meshech mmɔdo, ye Tubal ye ofuri otu owo mmɔ: mme udi mmɔ ekan mmɔ ekuk: kpukpru mmɔ edi mbon edut, ekewot kpukpru mmɔ ke ofut, koro eke-namde owo edikhe mmɔ ke isɔŋ mme odu-uwem.

27Ndien mmɔ idisuhɔkede ina ye mbon uko ke otu mbon edut emi ekeduɔŋɔde, emi ekesuhɔrede ke obio ekpo ye ŋkpɔ ekɔŋ mmɔ. Enyuŋ eda ofut mmɔ edak mmɔ ke ibuot; idiɔk ido mmɔ onyuŋ odoro mmɔ ke ɔkpɔ, koro ndik mmɔ ekenamde mbon uko ke isɔŋ mme odu-uwem.

28Afo ŋko eyenuaha ke otu mbon edut, eyenyuŋ ana ye mmɔ emi ekewotde ke ofut.

29Edom mmɔdo ye ndidem esie ye kpukpru mbɔŋ esie, emi ekedade mmɔ ye uko mmɔ enim ye mmɔ emi ekewotde mmɔ ke ofut: mmɔ eyena ye mbon edut, ye mmɔ ŋko emi esuhɔrede ke obube.

30Mbon edem edere kpukpru mmɔ do, ye kpukpru mme Zidonian emi eketienede mmɔ oro ekekpaŋade afai, esuhɔre; ndik mmɔ emi okotode ke uko mmɔ esin mmɔ but; ndien mmɔ esuhɔre nte mbon edut ena ye mmɔ oro ekewotde ke ofut, mmɔ enyuŋ ebiom esuene mmɔ ye mmɔ emi esuhɔrede ke obube.

31Pharaoh eyekut mmɔ, onyuŋ okop ndɔŋesit abaŋa ofuri otu owo esie emi ekewotde ke ofut, kpa Pharaoh ye ofuri udim ekɔŋ esie: uyo Ɔbɔŋ Jehovah edi emi.

32Koro mmada ndik mi ndori isɔŋ mme odu-uwem: ndien enye eyesuhɔre ana ke ufɔt mbon edut, ye mmɔ emi ekewotde ke ofut, kpa Pharaoh ye ofuri otu owo esie. Uyo Ɔbɔŋ Jehovah edi emi.