DEUTERONOMY 14 - Efik Old Bible With Sectional Headings

Usuŋ Emi Ekemede Ndifuhɔ Mmɔ Emi Ekpaŋade

1MBUFO edi nditɔ Jehovah Abasi mbufo: ekukpeŋe idem mbufo, ekunyuŋ enam ibɔ ke ufɔt enyin mbufo, ebaŋa akpa-mkpa,

2koro afo edide edisana mbio Jehovah Abasi fo, Jehovah ama onyuŋ emek fi ete edi ata ikɔt esiemɔ, akan kpukpru mme idut emi edude ke iso isɔŋ.

3Kuta baba ndek-ndek ŋkpɔ kiet.

4Mme unam emi ke mbufo edita; enaŋ ye erɔŋ,

5ye ebot, ye okoyo, ye edop, ye ebet, ye ebot ikɔt, ye pygarg, ye enaŋ ikɔt, ye chamois.

6Mbufo eta kpukpru eke ebaharede ikpat, enyuŋ esiahade ufaŋ mbak iba, enyuŋ ekpɔhide eta ke otu mme unam.

7Edi mbufo ekuta mme mmɔ emi ke otu mmɔ emi ekpɔhide eta, ye ke otu mmɔ emi ebaharede ikpat mbak iba; nte camel, ye hare, ye coney: koro mmɔ ekpɔhide eta, edi ibahakede ikpat mbak iba; mbufo ese mmɔ ke ŋkpɔ ndek.

8Mbufo enyuŋ enim edi ke ŋkpɔ ndek: koro enye abaharede ikpat, edi mikpɔhike ita: mbufo ekuta unam mmɔ, ekunyuŋ etuk okpo mmɔ.

9Mbufo eta mme mmɔ emi ke otu kpukpru se idude ke mmɔŋ: kpukpru se inyenede mba ye ikpɔk ke mbufo edita:

10edi ekuta baba kiet eke minyeneke mba ye ikpɔk; mbufo ese enye ke ŋkpɔ ndek.

11Mbufo eta kpukpru edisana inuen.

12Edi ama edi mme mmɔ emi, mbufo ekuta mmɔ: ntrukpom, ye gier eagle, ye ospray,

13ye vulture, ye mbukpo, ye falcon,

14ke oruk mmɔ, ye kpukpru raven ke oruk mmɔ,

15ye ostrich, ye ayara ostrich, ye ituen, ye utere ke oruk mmɔ,

16ye ikurikut, ye akpantana,

17ye swan, ye pelican,

18ye cormorant, ye ikpaŋ, ye stork, ye heron ke oruk mmɔ, ye lapwing, ye emiaŋ.

19Ndien mbufo eda kpukpru mme andinyɔni eke enyenede mba enim ke ŋkpɔ ndek: ekuta mmɔ.

20Mbufo eta kpukpru edisana inuen.

21Mbufo ekuta baba unam kiet eke akpade ikpɔŋ: da enye nɔ esen owo emi odude ke obio fo, ete ata enye; midige, men enye nyam nɔ eyen idut efen: koro afo edide edisana ikɔt Jehovah Abasi fo. Kutem eyen ebot ke mmɔŋ-eba eka esie.

22Kutre ndi nɔ ɔyɔhɔ ubak duop ke kpukpru se mkpasip fo oŋwumde, eke otode ke inwaŋ fo, kpukpru isua.

23Nyuŋ tie ke iso Jehovah Abasi fo ke ebiet emi enye edimekde ndinim enyiŋ esiemɔ ke esit, dia ɔyɔhɔ ubak ibokpot fo duop, ye eke obufa wine fo, ye eke aran fo, ye eke akpa nditɔ ufene fo; man afo ekpep ndibak Jehovah Abasi fo kpukpru ini.

24Edi ke adaŋemi usuŋ oyomde fi akan nte afo ekemede ndibiom enye: koro ebiet emi Jehovah edimekde ndisin enyiŋ esie ke esit oyomde fi usuŋ akan, adaŋemi Jehovah Abasi fo ama ɔkɔdiɔŋ fi:

25ndien da enye kpuhɔ silver, nyuŋ bɔp silver oro kama ke ubɔk fo, ka ebiet emi Jehovah Abasi fo edimekde:

26ndien nɔ silver oro ke ŋkpɔ ekededi eke ukpɔŋ fo ediyomde: ndien dia ŋkpɔ oro ke iso Jehovah Abasi fo, nyuŋ dat esit, afo, ye ufɔk fo.

27Ndien kufre Levite eke odude ke mme obio fo: koro enye minyeneke ubak minyuŋ inyeneke udeme ye afo.

28Ke utit isua ita sio kpukpru ɔyɔhɔ ubak duop mbuŋwum ŋkpɔ fo ke isua oro, da di nim ke mme obio fo:

29ndien Levite, (koro enye minyeneke ubak ye udeme ye afo,) ye esen owo, ye eyen-akpa, ye ebe-akpa, eke edude ke mme obio fo, edi edidia eyuhɔ; man Jehovah Abasi ɔdiɔŋ fi ke kpukpru utom ubɔk fo eke afo edinamde.