ISAIAH 28 - Efik Old Bible With Sectional Headings

Nduri-Utɔŋ Ɔnɔ Obio Israel Edere-Edere Ke

1IFƆNKE fɔn inɔ edikoŋ anyanya mbon mmin Ephraim, ye ediyemere ikɔŋ ediye mbana esie emi odorode ke ibuot eti itihere isɔŋ mmɔ eke wine amiade.

2Sese, Ɔbɔŋ emenyene ŋkpɔ eke ɔsɔŋde sɔŋ, ebiet edim-itiat ye oyobio nsobo, ebiet ɔkpɔsɔŋ mmɔŋ edim eke ɔtɔde, enye ada ubɔk ɔduɔk enye ke isɔŋ.

3Eyeda ukot edigi edikoŋ anyanya mbon mmin Ephraim.

4Ndien ediyemere flower ediye mbana esie emi odorode ke ibuot eti itihere isɔŋ esie, eyebiet ŋwara-ndat fig ke ini utet mika-ikemke kaŋa: emi andise okutde, ndien ke osuk odude ke ubɔk esie, emen enye adia.

5Ke usen oro Jehovah mme udim eyekebare edi diadem uyai, ye anyanya ubɔŋ ikɔt esie eke esuhɔde;

6onyuŋ edi spirit ikpe mmɔ eke etiede ke itie ikpe, onyuŋ edi odudu mmɔ eke ebinde ekɔŋ efep ke inua-otop.

7Edi wine esin kpa mme mmɔ emi ŋko edue, mmin onyuŋ anam mmɔ etun usuŋ; mmin esin oku ye prophet edue, wine emen mmɔ esin ke idibi, mmin anam mmɔ etun usuŋ; mmɔ edue ke ŋkukut, eteŋ ke itie ikpe.

8Koro ikpɔhi ye ndek eyɔhɔde kpukpru mme okpokoro, baba ebiet iduhe.

9“Enye edikpep anie ifiɔk? Anie ŋko ke enye edisian se enye okopde? Mmɔ eke edahade ke mmɔŋ-eba? mmɔ eke mmɔ ekebɔde ke eba?

10Koro (ekɔtde) ibet ke ibet, ibet ke ibet; ewuhɔ ke ewuhɔ, ewuhɔ ke ewuhɔ; mi esisit, do esisit.”

11Koro enye edidade mkpɔk-inua ekek ye edeme efen, ɔdɔhɔ ye mbio emi;

12emi enye ɔkɔdɔhɔde ye mmɔ, ete, Emi edi nduɔk-odudu, mbufo eyak mbon mba eduɔk odudu; emi onyuŋ edi nsukidem: edi mmɔ inyimeke ndikop.

13Ndien ikɔ Jehovah odu ke otu mmɔ, ibet ɔkɔrɔ ke ibet, ibet ke ibet, ewuhɔ ke ewuhɔ, ewuhɔ ke ewuhɔ; mi esisit, do esisit; kpaŋ mmɔ ekpeka, ekpenyuŋ eduɔ edem-edem, enyuŋ enuaha, enyuŋ esike, enyuŋ emum (ke afia).

14Ekop ndien uyo Jehovah, mbufo mbio nsahi, mbɔŋ mbio emi edude ke Jerusalem.

15Koro mbufo edɔhɔde, ete, Nnyin imediomi ediomi ye mkpa, inyuŋ isobo esop ye obio ekpo; ke ini ikpa ebede ofuk, idisimke nnyin: koro nnyin inimke nsu ke ebiet ubɔhɔ nnyin, inyuŋ idibede ke abiaŋa.

16Mmɔdo ntem ke Ɔbɔŋ Jehovah ɔdɔhɔ, ete, Sese, ami mmonim itiat ke Zion, itiat eke edomode, ɔsɔŋ-urua itiat inuk, emi etimde esin ke idak ibibene: owo eke ɔbuɔtde idem idinyeneke ndifehe.

17Ndien nyenim ikpe ke uruk udomo, nyenim se inende ke plummet: ndien edim itiat eyekpɔri ubɔhɔ nsu efep, mmɔŋ eyenyuŋ ɔtɔ ofuk ebiet udibe.

18Ndien eyesɔhi ediomi emi mbufo ediomide ye mkpa efep, ndien esop emi mbufo esopde ye udi ididaha; ke ini ikpa eke ɔtɔde ofuk, ebede, mbufo eyedi se enye edidigide.

19Adaŋa ini nte ebede, enye eyeda mbufo, koro enye eyebe kpupkru usenubɔk, ke uwemeyo ye ke okoneyo: ndien erifiɔk ŋkpɔ eke edikopde edidi ndik-ndik.

20Koro bed ɔmuhɔde akan nte owo anyanarede ana: ufuhɔ-ŋkpɔ onyuŋ afaha akan nte owo adade enye ofuk idem.

21Koro Jehovah eyedaha ke enyɔŋ, kpa nte ke obot Perazim, eyenyuŋ akpahesit, kpa nte ke itihere Gibeon, man anam ŋkpɔ, utibe ŋkpɔ esie, onyuŋ anam utom, utibe utom esie.

22Mbufo ekusak, ndien, nsahi, mbak ŋkpkɔbi mbufo edisɔŋɔ: koro ŋkopde ete ke Ɔbɔŋ Jehovah mme udim omowuk nditaha ke ofuri ererimbot.

23Mbufo ekpaŋ utɔŋ, enyuŋ ekop uyo mi; etiŋ enyin, enyuŋ ekop ikɔ mi.

24Nte ofuŋ-isɔŋ ofuŋ kpukpru usen man ɔtɔ ŋkpɔ? Nte enye asiak onyuŋ ɔdiɔŋ isɔŋ esie kpukpru usen?

25Adaŋemi enye ama ɔdiɔŋ isɔŋ iso, nte enye iwarike dill, inyuŋ isuanke cummin, inyuŋ isin wheat ke udim, ye barley nte asiakde, ye spelt ke mben esie?

26Ntem ke Abasi esie eteme enye nte otimde anam, onyuŋ ekpep enye.

27Koro owo midaha ukpat-ŋkpɔ ibet dill, minyuŋ iyutke wheel ukpat-ŋkpɔ isin ke cummin; edi emia dill ke eto, emia cummin ke esaŋ.

28Enyene ndinuak ibokpot uyo, koro minyimeke ndibek enye ke nsinsi; enye anam wheel ukpat-ŋkpɔ esie oyut ke esit, edi iyakke mme horse esie enuak enye.

29Kpa emi ŋko oto Jehovah mme udim; enye aduak utibe ŋkpɔ, onyuŋ okpon ke ifiɔk.