DEUTERONOMY 9 - Efik Old Bible With Sectional Headings

Abasi Oyosobo Ofuri Isɔŋ Canaan

1O ISRAEL kop: afo ɔmɔŋ edibe Jordan mfin emi okoduk, man ada mme idut emi ekponide enyuŋ esɔŋde ekan fi, enyene, ikpɔ obio emi enyenede ŋkokoŋo ibibene.

2Mbio emi ekponide enyuŋ ekoŋide, nditɔ Anakim, emi afo ɔfiɔkde, onyuŋ okopde abaŋa, ete, Anie ekeme ndida ke iso nditɔ Anak?

3Fiɔk ndien mfin emi, ete ke Jehovah Abasi fo emi ebemde fi iso ebe, edi ikaŋ eke atade, enye eyesobo mmɔ, enye eyenyuŋ ɔsuhɔre mmɔ ke iso fo onim: ndien afo eyewara ebin mmɔ efep, onyuŋ osobo mmɔ, kpa nte Jehovah ɔkɔdɔhɔde fi.

4Kudɔhɔ ke esit fo, ke adaŋemi Jehovah Abasi fo ama ekebin mmɔ efep ke iso fo ama, ete, Ke edi eti ido mi esin Jehovah ada mi oduk, ete nda isɔŋ emi nnyene: koro ke edi idiɔk ido mme idut emi esin Jehovah ebin mmɔ ke iso fo efep.

5Idige eti ido fo, inyuŋ idige eti esit fo esin fi oduk aka akada isɔŋ mmɔ: koro edi idiɔk ido mme idut emi esin Jehovah Abasi fo osio mmɔ ke iso fo efep, man enye onyuŋ anam ikɔ esie osu nte Jehovah ɔkɔŋwɔŋɔde ɔnɔ mme usɔ, Abraham, ye Isaac, ye Jacob.

6Fiɔk, ndien, ete idige eti ido fo esin Jehovah Abasi fo ɔnɔ fi eti isɔŋ emi enyene; koro mbufo edide mbon nsɔŋ-ibuot.

7Ti, kufre nte afo akayatde Jehovah Abasi fo esit ke wilderness: ɔtɔŋɔde ke usen emi afo otode ke isɔŋ Egypt, tutu mbufo edisim ebiet emi, mbufo emesɔŋ ibuot ye Jehovah.

8Ndien ŋko ke Horeb mbufo ekeyat Jehovah esit, ndien Jehovah ofiop esit ye mbufo ete isobo mbufo.

9Ke adaŋemi ŋkɔdɔkde obot ŋka ndibɔ itiat-ŋwed ediomi emi Jehovah odiomide ye mbufo, ntie ke obot ke ofuri uwemeyo aba ye okoneyo aba, ndiaha udia, nnyuŋ ŋŋwɔŋke mmɔŋ,

10ndien Jehovah ɔnɔ mi itiat-ŋwed iba emi nnuen-ubɔk Abasi ekewetde; ndien kpukpru ikɔ oro Jehovah eketiede ke ufɔt ikaŋ ɔdɔhɔ ye mbufo ke usen esop oro, edu mmɔ ke esit.

11Edikem ke utit uwemeyo aba ye okoneyo aba, Jehovah ɔnɔ mi itiat-ŋwed ediomi iba oro.

12Ndien Jehovah ɔdɔhɔ mi, ete, Wawara daha ke ebiet emi suhɔre; koro oruk fo emi afo okosiode ke Egypt, emekabare ediɔk: mmɔ emewara ndiwaha ŋkpɔŋ usuŋ emi ŋketemede mmɔ; emenam editara mbiet enɔ idem mmɔ.

13Ndien Jehovah ɔdɔhɔ mi, ete, Mmokut mbio emi, ndien, sese, mmɔ edi mbon nsɔŋ-ibuot:

14yak mi man nsobo mmɔ, nnyuŋ nsɔhi enyiŋ mmɔ ke idak enyɔŋ mfep: ndien nyenam fi akabare edi idut eke ɔsɔŋde onyuŋ awakde akan mmɔ.

15Ndien ŋkabare nto ke obot nsuhɔre, obot onyuŋ asak ikaŋ itiat-ŋwed iba ediomi enyuŋ edu mi ke ubɔk mbiba.

16Ndien ŋkut, ndien, sese, mbufo ema edue Jehovah Abasi mbufo, ema enam editara mbiet eyen enaŋ enɔ idem mbufo: ema ewara ewaha ekpɔŋ usuŋ emi Jehovah eketemede mbufo:

17ndien mmum itiat-ŋwed iba oro ke ubɔk mi mbiba, ntop mmɔ nduɔk ke isɔŋ ke iso mbufo mbom.

18Nnyuŋ nduɔ ke isɔŋ ke iso Jehovah, kpa nte eke akpa ini, ke uwemeyo aba, ye okoneyo aba; ndiaha udia, nnyuŋ ŋŋwɔŋke mmɔŋ, mbaŋa kpukpru mme idiɔk ido emi mbufo ekenamde, ke erinam se idiɔkde ke iso Jehovah, nnyuŋ nyat enye esit.

19Koro ndikhere iyaresit ye ifiopesit, emi Jehovah okofiopde ye mbufo ete isobo mbufo.

20Edi Jehovah okop uyo mi ke ini oro ŋko. Jehovah onyuŋ ayat esit ye Aaron ŋko eti-eti, ete isobo enye; ndien nnam mkpe-ubɔk nnɔ Aaron ŋko ke ini oro.

21Ndien mmen idiɔk-ŋkpɔ mbufo, kpa eyen enaŋ emi mbufo ekenamde, nda mfɔp ke ikaŋ, ndien nda obu esie nduɔk ke idim emi otode ke obot ɔsuhɔre.

22Mbufo ekenyuŋ eyat Jehovah esit ke Taberah, ye ke Massah, ye ke Kibroth-hattaavah.

23Ndien ke ini Jehovah ɔdɔŋde mbufo, ete mbufo ewɔŋɔ ke Kadesh-barnea, edɔk eka ekeda isɔŋ emi nnɔde mbufo, mbufo eneni uyo Jehovah Abasi mbufo, inyuŋ inimke uyo esie ke akpanikɔ, inyuŋ ikopke uyo esie.

24Mbufo esuk esɔsɔŋ ibuot ye Jehovah, toto ke usen emi ŋkɔfiɔkde mbufo.

25Ntem ke ami nduɔ ke isɔŋ ke iso Jehovah ke uwemeyo aba ye ke okoneyo aba, nte ŋkɔduɔde: koro Jehovah ɔkɔdɔhɔde ete iyesobo mbufo.

26Ndien ŋkpe Jehovah ubɔk, nte, O Jehovah ɔbɔŋ, kusobo ikɔt fo, kpa udeme fo, emi afo akadade ubom fo afak, emi afo akadade ɔkpɔsɔŋ ubɔk osioŋo mmɔ ke Egypt.

27Ti ikɔt fo, Abraham, ye Isaac, ye Jacob; kuse nsɔŋ-ibuot mbon emi, ye mme idiɔk ido mmɔ, ye mme ukwaŋkpɔ mmɔ:

28mbak idut oro afo okosiode nnyin ke esit edidɔhɔ ete, Koro Jehovah mikekemeke ndida mmɔ nduk ke isɔŋ emi enye ɔkɔdɔhɔde mmɔ, koro enye onyuŋ asuade mmɔ, esin enye osio mmɔ okowot ke wilderness.

29Edi mmɔ edi ikɔt fo, ye udeme fo, emi afo akadade akwa odudu fo ye edimenere ubɔk fo osio mmɔ efep.