ESTHER 1 - Efik Old Bible With Sectional Headings

Ɔbɔŋ-Aŋwan Vashti Ɔsɔŋ Ibuot ye Edidem Ndien Edidem Ebin Enye Osio

1EDIKEM ke eyo Ahasuerus (enye Ahasuerus edi edidem province ikie ye edip ye itiaba, ɔtɔŋɔde ke India tutu osim ke Ethiopia:)

2ke mme usen oro, adaŋemi Ahasuerus etiede ke ebekpo ubɔŋ esie, emi odude ke palace Shushan,

3ke ɔyɔhɔ isua ubɔŋ esie ita, enye anam akamba udia ɔnɔ kpukpru ikpɔ owo esie ye ikɔt esie; odudu Persia ye Media, ikpɔ owo ye mbɔŋ mme province enyuŋ edu enye ke iso:

4ke ini enye owutde inyene ubɔŋ itie edidem esie, ye ukpono ata ubom esie, ke ediwak usen, kpa usen ikie ye anaŋ.

5Ekem ke ini mme usen emi ekurede, edidem anam udia usen itiaba ɔnɔ kpukpru owo emi edude ke palace Shushan; enɔ ikpɔ ye ŋkpri, ke okure iŋwaŋ-esa ufɔk edidem;

6ndien eda uruk eti linen ye purple eyiri ikpehe afia linen, ye afia ɔfɔŋ, ye awawa, ke mkpanuen silver, ye mme adaha marble: mkpana gold ye silver ediɔhɔ ke pavement porphyre, ye eke afia marble, ye pearl, ye awawa itiat.

7Ndien enɔ mmɔ ŋkpɔ eŋwɔŋ ke cup o-gold, mme cup enyuŋ edi nsio-nsio, wine onyuŋ edi eke edidem, ediwak, nte ekemde ye ubɔk edidem.

8Ndien mmɔ enwɔŋ nte ewuhɔ asaŋade: kiet inyikke kiet: koro ntem ke edidem okowuk kpukpru mme ndidaha esie, ete enam nte kpukpru owo kiet kiet emade.

9Vashti ɔbɔŋ-aŋwan ŋko onyuŋ anam akwa udia ɔnɔ iban ke ufɔk edidem emi enyenede edidem Ahasuerus.

10Ekem ke ɔyɔhɔ usen itiaba, adaŋemi esit edidem adarade ke wine, enye ɔdɔhɔ Mehuman, Biztha, Harbona, Bigtha, ye Abagtha, Zethar, ye Carcas, eunuch itiaba emi enamde ŋkpɔ ke iso edidem Ahasuerus,

11ete eda Vashti ɔbɔŋ-aŋwan edi ke iso edidem, ayara anyanya ubɔŋ, man ewut kpukpru owo ye mbɔŋ uyai esie: koro enye eyede ndise.

12Edi Vashti ɔbɔŋ-aŋwan esin ndidi ke uyo edidem oro enye ɔnɔde ke ubɔk mme eunuch: ndien esit ayat edidem eti-eti, esit onyuŋ ofiop enye.

13Ekem edidem ɔdɔhɔ mme enyene-ibuot owo oro efiɔkde ini, (koro ntem ke uyo edidem odu ke iso kpukpru mme ɔfiɔk-ewuhɔ ye ikpe:

14ndien mbet esie edi Carshena, ye Shethar, ye Admatha, ye Tarshish, ye Meres, ye Marsena, ye Memucan, mbɔŋ Persia ye Media itiaba, emi ekutde iso edidem, enyuŋ etiede ke akpa itie ubɔŋ;) ete,

15Nnyin idinam nso ye Vashti ɔbɔŋ-aŋwan, nte asaŋade ke ewuhɔ, koro enye minyimeke ndinam ke uyo edidem Ahasuerus ke ubɔk mme eunuch?

16Ndien Memucan ɔdɔhɔ ke iso edidem ye mbɔŋ, ete, Idige edidem ikpɔŋ-ikpɔŋ ke Vashti ɔbɔŋ-aŋwan edue, edi edue kpukpru mbɔŋ, ye kpukpru owo emi edide ke kpukpru mme province edidem Ahasuerus.

17Koro se ɔbɔŋ-aŋwan akanamde eyewɔrɔ osim kpukpru iban,esin mmɔ esin mme ebe mmɔ ke ndek, ke ini edɔhɔde, ete, Edidem Ahasuerus ɔkɔdɔhɔ, ete eda Vashti ɔbɔŋ-aŋwan edi ke iso imɔ, ndien enye idige.

18Ntem ke iban ikpɔ owo Persia ye Media, emi ekopde uyo ɔbɔŋ-aŋwan, edidɔhɔ ye kpukpru ikpɔ owo edidem mfin emi.

19Ndien but ye iyaresit eyewak. Edieke enemde edidem, yak ewuhɔ edidem ɔwɔrɔ enye ke iso, enyuŋ ewet enye esin ke otu mme ewuhɔ Persia ye Media, man okubiara, ete, Yak Vashti okudi aba ke iso edidem Ahasuerus; ndien yak edidem ada itie ɔbɔŋ-aŋwan esie ɔnɔ mbɔhiduŋ esie eke ɔfɔnde akan enye.

20Ndien adaŋemi mmɔ edikopde ebaŋa ewuhɔ edidem emi enye edinamde ke ofuri isɔŋ ubɔŋ esie (koro enye okponde) kpukpru iban, ŋkpri ye ikpɔ, eyenɔ mme ebe mmɔ ukpono.

21Ndien ikɔ oro enem edidem ye mbɔŋ esie esit; edidem onyuŋ anam ke uyo Memucan:

22ndien enye ɔnɔ ŋwed esɔk kpukpru mme province edidem, province kiet kiet nte ŋwed esie asaŋade, ye obio kiet kiet, nte usem esie asaŋade, ete, Yak kpukpru owo edi etubom ke ufɔk mmɔ, enyuŋ etiŋ emi ke usem mbio-obio mmɔ.