ERIYARARE 16 - Efik Old Bible With Sectional Headings

Eŋwaŋa Eso Iyaresit Abasi Itiaba Eduɔk ke Isɔŋ Nte Ubiomikpe Idiɔk-Ŋkpɔ

1EKEM ŋkop ɔkpɔsɔŋ uyo emi otode ke temple ɔdɔhɔ angel itiaba oro ete, Mbufo eka ekeŋwaŋa eso iyaresit Abasi itiaba oro eduɔk ke isɔŋ.

2Akpa angel aka akaŋwaŋa eso esie ɔduɔk ke obot, ndien idiɔk oyo, eke abiakde eti-eti, omum mme owo emi enyenede idiɔŋɔ unam ke idem, enyuŋ etuakde ibuot enɔ mbiet esie.

3Udiana angel akaŋwaŋa eso esie ɔduɔk ke inyaŋ; ndien inyaŋ akabare iyip, ebiet iyip okpo owo; kpukpru ŋkpɔ eke edude uwem enyuŋ ekpaŋa, kpa ŋkpɔ eke edude ke inyaŋ.

4Ɔyɔhɔ angel ita aŋwaŋa eso esie ɔduɔk ke mme akpa ye mme idim mmɔŋ, ndien mmɔ ekabare iyip.

5Ndien ŋkop nte angel emi akarade mmɔŋ ɔdɔhɔde ete, O Edisana Abasi, emi odude-du, okonyuŋ odude-du, Afo emenen ke ikpe emi ekpede ntem;

6koro owo ema eduɔk iyip nti ikɔt Fo ye mme prophet Fo; ndien Afo omonyuŋ ɔnɔ mmɔ iyip eŋwɔŋ: mmɔ edot ufen emi.

7Ndien ŋkop itie-uwa nte ɔdɔhɔde ete, Edi akpanikɔ, O Ɔbɔŋ Abasi, Andikara kpukpru ŋkpɔ, mme ikpe Fo enen enyuŋ edi akpanikɔ.

8Ɔyɔhɔ angel inaŋ aŋwaŋa eso esie ɔduɔk ke utin; ndien enɔ utin ndifɔp owo ikaŋ-ikaŋ.

9Akwa ufiop onyuŋ ɔfɔp owo; ndien mmɔ esuŋi enyiŋ Abasi emi enyenede odudu ndida mme ufen oro mmia owo; inyuŋ ikabakere esit inɔ Enye ubɔŋ.

10Ɔyɔhɔ angel ition aŋwaŋa eso esie ɔduɔk ke ebekpo unam oro; ndien obio ubɔŋ esie akabare okim, mbiobio esie enyuŋ eta edeme mmɔ enɔ ubiak,

11enyuŋ esuŋi Abasi heaven, ebaŋa ubiak ye oyo mmɔ; mmɔ inyuŋ ikabakere esit ikpɔŋ mme utom mmɔ.

12Ɔyɔhɔ angel itiokiet aŋwaŋa eso esie ɔduɔk ke akwa akpa Euphrates; mmɔŋ akpa oro onyuŋ akabare asat, man etim afaŋ enim enɔ ndidem emi editode ke edem usiaha-utin edi.

13Ndien ŋkut spirit ndek ita, emi ebietde ikwɔt, nte ewɔŋɔde ke inua dragon ye ke inua unam oro ye ke inua prophet nsu;

14mmɔ edi spirit mme demon emi enamde mme idiɔŋɔ, emi enyuŋ ewɔŋɔde eka ke ɔtɔ ndidem kpukpru ekondo, nditaŋ mmɔ mbok ɔtɔ kiet edi ekɔŋ akwa usen Abasi, Andikara kpukpru ŋkpɔ.

15Sese, ndidi nte inɔ; ɔfɔfɔn ɔnɔ owo eke esinede edisine-ŋkpɔ etie ekpeme; mbak enye edisaŋa iferi, owo edinyuŋ okut mbubiam esie.

16Enyuŋ etaŋ mmɔ oro ekebok ke ebiet emi ekotde ke usem Hebrew, ete, Har-Magedon.

17Ɔyɔhɔ angel itiaba aŋwaŋa eso esie ɔduɔk ke ofim; ndien ɔkpɔsɔŋ uyo oto ke ebekpo emi odude ke temple ɔwɔrɔ, ete, Ama okure ama.

18Ndien emireŋ-mireŋ ye mme uyo, ye obuma etibe, akamba unyek-isɔŋ onyuŋ odu, ke utɔ ido nte akanam miduhe tɔŋɔ ini owo ekedude ke isɔŋ.

19Unyek-isɔŋ oro okpon, onyuŋ ɔsɔŋ eti-eti. Akwa obio onyuŋ abahare ke mbak ita, mme obio eke mme idut enyuŋ ewure. Ndien Abasi eti akwa obio Babylon, ete inɔ enye cup wine ikaŋ-ikaŋ iyaresit Imɔ.

20Ndien kpukpru isuo efeŋe ebe efep, ikpɔ obot enyuŋ esop ke enyin.

21Ikpɔ edim itiat, eke udop mmɔ edide pound aba ye duop aba ye duop, eto ke enyɔŋ edep eduɔŋɔ owo ke idem. Owo enyuŋ esuŋi Abasi ke ntak ufen edim-itiat oro; koro ufen edimitiat ɔsɔŋ eti-eti.